ეროვნული ლიგა. III ტური: "დინამოს" რევანში და დაცული პრესტიჟი

16.03. თბილისი. დინამო არენა

დინამო(თბ) 3-1 სამტრედია
1:0 ზივზივაძე (10. ივანიშვილის პასით), 2:0 შულაია (13. კიტეიშვილის პასით), 3:0 კუცია (84. ძალამიძის პასით), 3:1 ვეილი (89-პენ)

დინამო (4-2-3-1): ბულისკერია - რუხაია, თოთაძე, კობოური, ხარაბაძე - კუცია, ივანისენია (90. ქოჩლაძე) - შულაია (90. ერგემლიძე), ო. კიტეიშვილი, ივანიშვილი (77. ძალამიძე) - ზივზივაძე.

სათადარიგოები: ნინუა, დარცმელია, ბაბუნაძე, გოშაძე
მწვრთნელი: კახა კაჭარავა

სამტრედია (4-1-4-1): მიგინეიშვილი - ლობჟანიძე (60. ხაჩიძე), ნდონგი, ფატიჩი, ბაჩიაშვილი - დაუშვილი - ჩაჩუა, სანია (46. ერისთავი), განუგრავა (46. კერძევაძე), დ. კირკიტაძე - ვეილი.

სათადარიგოები: ქარქუზაშვილი, ოლხოვი, გიორბელიძე, ი. სტურუა
მწვრთნელი: უჩა სოსიაშვილი

გაფრთხილება: დ. კირკიტაძე (81), ბაჩიაშვილი (84)
არბიტრი: გ. ყრუაშვილი


ჯერ მარტო პირველ ტაიმში...

წინა სეზონში ჩემპიონატის დასრულებას ბევრი არაფერი აკლდა, კახა კაჭარავას დამოძღვრილმა თბილისის "დინამომ" საშინაო მატჩი რომ დათმო უჩა სოსიაშვილის "სამტრედიასთან". არადა, ამ მატჩში "დინამოს" თუნდაც ქულა რომ აეღო, ბოლო ტურის ინტრიგა აღარ იქნებოდა...

და აი, რევანშიც შედგა, თანაც, ისეთი, სრულფასოვანზე მეტიც რომ შეიძლება ვუწოდოთ. ეგ კი არა, სტუმრები იმაზეც კმაყოფილნი უნდა დარჩენილიყვნენ, ბევრად უფრო დიდი ანგარიშით რომ არ დამარცხდნენ.

მატჩის ერთ-ერთ გამორჩეულ ფეხბურთელ აკაკი შულაიას, სულ მცირე, ჰეთ თრიკის შესრულება შეეძლო. "დინამოს" კაპიტან ოთარ კიტეიშვილსაც (წინა ტურის მსგავსად, ამჯერადაც ჩინებულად რომ ითამაშა) მართებდა ზედიზედ მეორე დუბლის შესრულება. არანაკლებ ჩინებული შანსი ჰქონდა ბუდუ ზივზივაძესაც...
...და ეს ყველაფერი პირველი ტაიმის მოვლენებია!

რესურსი, ხარისხი და დანაკლისი

არაერთხელ გვითქვამს, რომ ეროვნულ ლიგაში ყველაზე, ასე ვთქვათ, ხარისხიანი ლეგიონერები სწორედ "სამტრედიაში" თამაშობენ. თუმცა იმერული გუნდის გულშემატკივართათვის სამწუხაროდ, "დინამოსთან" მატჩში არ უთამაშიათ "სამტრედიას" ორ მართლაც გამორჩეულ შემტევს - მაიკლ ოლაიტანსა და ინტერს გიის.

დანარჩენმა ოთხმა ლეგიონერმა კი "დინამოსთან" მატჩში თავი ვერაფრით დაგვამახსოვრა და საერთოდაც, "სამტრედიას" ფეხბურთელები ერთმანეთთან აშკარად შეუთამაშებლები რომ არიან, აშკარად გამოჩნდა.

ერთადერთი დასამახსოვრებელი, რაც ვნახეთ, ჰოლანდიელი შემტევის ლუკას ვეილის ჩინებული პასი იყო პირველ ტაიმში, როცა დავით კირკიტაძე მასპინძელთა მეკარესთან პირისპირ დატოვა, მაგრამ 18 წლის დემეტრე ბულისკერიამ ჩინებულად ითამაშა.

"სამტრედიას" მარცხი მხოლოდ ლეგიონერების ბრალი არ ყოფილა - "დინამომ" თამაშის ყველა კომპონენტში დაჯაბნა ძლიერი მეტოქე და აბსოლუტურად დამსახურებულადაც გაიმარჯვა.

არადა, კაჭარავას ამ სეზონში (წინას მსგავსად) შეზღუდული რაოდენობის ფეხბურთელებით უწევს ასპარეზობა და გუნდის საკვანძო მოთამაშის, ბაქარ ქარდავას ტრავმაც "დინამოსთვის" სერიოზული საკადრო პრობლემაა.

თუმცა, ამ მატჩმა კიდევ ერთხელ დაამტკიცა, რომ რაოდენობა სულაც არ ნიშნავს ხარისხს და მოკრძალებული რესურსის პირობებშიც არის შესაძლებელი სასურველი შედეგის მიღწევა...

ცალკარა

მასპინძელთა კოლოსალური უპირატესობა ჯერ კიდევ პირველ ტაიმში გამოიხატა ორბურთიანი სხვაობით. ჯერ ვნახეთ მართლაც ეფექტური კომბინაცია, რომელიც ბუდუ ზივზივაძემ ზუსტი დარტყმით დააგვირგვინა:

2016 წლის გარდამავალი ჩემპიონატის საუკეთესო ბომბარდირმა და ფეხბურთელმა "დინამოს" მაისურით თავის ყოფილ გუნდს გაუტანა. აქვე აღსანიშნავია დინამოელთა კიდევ ერთი ახალწვეულის, გიორგი ივანიშვილის ჩინებული საგოლე პასიც...

პირველი გოლიდან ძალიან ცოტა დრო იყო გასული, მასპინძლებმა მეორე გოლი რომ გაიტანეს და თამაშის ბედიც, ფაქტობრივად, აქ გადაწყდა: გიორგი კუციამ მეტოქის ნახევარზე ართმევაზე ითამაშა, კიტეიშვილმაც არ დაუხანა ზუსტი პასი შულაიას და "დინამოს" მარჯვენა გარემარბმაც (მთელი მატჩის განმავლობაში პირწმინდად რომ დაჯაბნა მეურვეები) ზედიზედ მეორე მატჩში გამოიჩინა თავი.

ისე, პირველ ტაიმზე ვსაუბრობთ და ისიც უნდა ვთქვათ, რომ, ცოტა არ იყოს, მოულოდნელადაც გვეჩვენა "სამტრედიას" უკანახაზელთა მართლაც უპატიებელი შეცდომები: ერთი-ორჯერ ომარ მიგინეიშვილმა გადაარჩინა თავისი გუნდი, დანარჩენ ეპიზოდებში კი მასპინძლები სცოდავდნენ დამაგვირგვინებელ ფაზაში, თორემ ახალი სეზონის სარეკორდო ანგარიშსაც ვნახავდით...

კუცია!

შესვენების შემდეგ სტუმართა ახალგაზრდა თავკაცმა ორმაგი ცვლილება განახორციელა, ტაქტიკაც შეცვალა (4-4-2 გახდა), რამდენიმე ფეხბურთელს პოზიციაც შეუცვალა, მაგრამ "სამტრედიას" ვერც ამ გადაადგილებებმა უშველა. ეგ კი არა, მეორე ტაიმის დასაწყისში, იმავე შულაიასა და კიტეიშვილს ორი ჩინებული მომენტი ჰქონდათ...

მატჩის მიწურულს, სამტრედიელებმა მაინც შეძლეს პრესტიჟის გოლის გატანა (პენალტით), თუმცა მანამდე ხომ ამ შეხვედრის ერთ-ერთი გამორჩეული ფეხბურთელის, გიორგი კუციას ჩინებული გოლი ვიხილეთ - 18 წლის ნახევარმცველმა წინა მატჩშიც ჩინებული შთაბეჭდილება დატოვა, როცა "ლოკომოტივთან" შეცვლაზე შევიდა, ახლა კი ძირითადში გამოჩნდა და 90 წუთის განმავლობაში, ფაქტობრივად, არც ერთი ორთაბრძოლა არ წაუგია მოედნის ცენტრში. აღარაფერს ვამბობთ მის მიერ 30 მეტრიდან გატანილ ერთობ ეფექტურ გოლზე...

ყოველდღიური სპორტული გაზეთი "ლელო"
372
მკითხველის კომენტარები / 0 /
მსგავსი ამბები
რუბრიკის სხვა სიახლეები