ეროვნული ლიგა. III ტური: თავბრუდამხვევი "საბურთალო" და დამაჯერებელი გამარჯვება

18.03. მიხეილ მესხი

საბურთალო 2-0 დილა
1:0 დიასამიძე (41. ვოლკოვის პასით), 2:0 კოხრეიძე (59-პენ)

საბურთალო (4-2-3-1): კუპატაძე - ჩაბრაძე, მარგველაშვილი, რეხვიაშვილი, ნადარაია (60. ცნობილაძე) - მამუჩაშვილი, გორგიაშვილი (68. თარხნიშვილი) - ვაგნერი, დიასამიძე, ვოლკოვი - კოხრეიძე (62. ტატანაშვილი).

სათადარიგოები: ქურდაძე, გოშთელიანი, გვარაძე, ალთუნაშვილი
მწვრთნელი: გიორგი ჭიაბრიშვილი

დილა (4-2-3-1): ბეგაშვილი - კორიფაძე, გოგიაშვილი, მაჩაიძე, სუხიაშვილი - ნონდი, რაზმაძე (66. ლემპტი) - ნ. ქავთარაძე, რაჟამაშვილი (77. კოვტალიუკი), ნონიკაშვილი (53. ფორტისი) - ფანცულაია.

სათადარიგოები: გულუაშვილი, აშორტია, კვახაძე, გ. სამუშია, ფორტისი
მწვრთნელი: გიორგი დარასელია

გაფრთხილებები: კოხრეიძე (45), ფორტისი (58), კორიფაძე (77), თარხნიშვილი (78)

არბიტრი: ჯ. ხორავა

ინტრიგა

"საბურთალოსა" და "დილას" მატჩს ყველა ინტერესით ელოდა. გიორგი ჭიაბრიშვილის გუნდმა სეზონი მშვენივრად დაიწყო, საკმაოდ გამართულ ფეხბურთს აჩვენებდა და ერთადერთი კლუბი იყო, რომელსაც დანაკარგი არ ჰქონდა...

ჩემპიონატი გორელებმაც კარგად დაიწყეს - გიორგი დარასელიას გუნდმა 4 ქულა დააგროვა და ჩემპიონ "ტორპედოსთან" გასვლაზე მოგებით აჩვენა, რომ წლეულს შარშანდელზე უკეთაა მომზადებული...

საინტერესო იყო სტატისტიკაც: მიუხედავად იმისა, რომ "საბურთალო" ახალგაზრდული გუნდია, "დილასთან" შეხვედრებში მაინც უპირატესობა ჰქონდა: ოფიციალურ შეხვედრებში გუნდები ერთმანეთს 4-ჯერ დაუპირისპირდნენ და 3 მატჩი საბურთალოელთა გამარჯვებით დასრულდა, ერთხელაც "დილამ" მოიგო...

პროცესი

ჭიაბრიშვილის გუნდი თავის თავს არ ღალატობდა. "საბურთალო" პირველივე წუთებიდან შეეცადა, ბურთის კონტროლით და გამუდმებული მოძრაობებით მეტოქეზე უპირატესობა მოეპოვებინა.

თავიდან მასპინძლებს ეს არ გამოსდიოდათ. გორელები ძალიან ფრთხილად მოქმედებდნენ და მჭიდრო თამაშით თბილისელებს გასაქანს არ აძლევდნენ.

მაგრამ თამაში პროცესია. "საბურთალოს" წლევანდელი თამაში კი ამ პროცესში მოლოდინს ემყარება - მეტოქეს საკუთარ თამაშს გეგმაზომიერად ახვევს თავს. გუნდების უმრავლესობა ამ ტემპში ვერ ჰყვება და "საბურთალო" მიზანს აღწევს. ამჯერადაც ასე მოხდა.

თუმცა იყო ეპიზოდი, როცა გორელები პენალტის დანიშვნას ითხოვდნენ: 21-ე წუთზე, ანზორ სუხიაშვილის გადაცემის შემდეგ, მეკარესთან პირისპირ გადიოდა გიორგი ფანცულაია, რომელიც გიორგი რეხვიაშვილთან შეჯახების შემდეგ წაიქცა. პენალტი? არბიტრმა ლაინსმენთან მოლაპარაკების შემდეგ ჩათვალა, რომ ფანცულაიამ ბურთი თამაშგარეში მიიღო. თუმცა ამ გადაწყვეტილებამ კამათი გამოიწვია - პასის მომენტში ფანცულაია მცველზე წინ არ იყო.

დიასამიძის ეფექტური...

თბილისელები მთელი პირველი ტაიმის განმავლობაში თავიანთ შანსს ელოდნენ, ტაიმის ბოლოს შეტევები გააძლიერეს და მიზანსაც მიაღწიეს. დავით ვოლკოვისა და ლადო მამუჩაშვილის შორეულმა დარტყმებმა შედეგი არ გამოიღო.

თუმცა გორელებმა კონცენტრაცია მაინც დაკარგეს და 41-ე წუთზე ანგარიში გაიხსნა: თორნიკე გორგიაშვილმა მეტოქის საჯარიმოში ჩააწოდა, სადაც ვოლკოვმა ბურთი მკერდით დაუგდო გეგა დიასამიძეს და ამანაც სტუმართა კარი ეფექტური, ტექნიკური დარტყმით აიღო - 1:0.

"დილამ" ტაიმის ბოლო წუთებზე შეუტია და ანგარიშის გათანაბრება სცადა. სახიფათო იყო გორელთა შორის ყველაზე აქტიური ნოდარ ქავთარაძის მიერ შესრულებული ჯარიმა, რომლის დროსაც მეკარე ლაზარე კუპატაძემ საიმედოდ ითამაშა.

წაუგებელი სერია

გორელებს შეტევაში არაფერი გამოსდიოდათ. ანგარიშის შემცირების ყველაზე რეალური შანსი მათ 69-ე წუთზე ჰქონდათ - ქავთარაძის გადაცემის შემდეგ საჯარიმოში მყოფმა განელმა ფორვარდმა, ისუფუ ლემპტიმ, ბურთი ძლიერად დაარტყა, მაგრამ მხოლოდ ძელი "მოიკითხა".

მასპინძლები კი დამშვიდდნენ. ჭიაბრიშვილი ამით უკმაყოფილო იყო - ის ფეხბურთელებისგან აქტიურ შეტევებს ითხოვდა. მაგრამ "საბურთალოს" თავი აღარ მოუკლავს. საბოლოოდ - 2:0.

ამ მოგების შემდეგ თბილისელებს ასპროცენტიანი შედეგი აქვთ, რითიც ეროვნულ ლიგაში ერთადერთი გუნდია. აღსანიშნავია, რომ ოფიციალურ და ამხანაგურ შეხვედრებში ერთად "საბურთალოს" 15-მატჩიანი წაუგებელი სერია აქვს. ჭიაბრიშვილის გუნდი ბოლოს გასული წლის 5 ნოემბერს, საჩხერის "ჩიხურასთან" დამარცხდა (1:2).

საკამათო მომენტი

მეორე ნახევარში "საბურთალომ" შეტევები გააძლიერა. 49-ე წუთზე მასპინძლები პენალტს ითხოვდნენ: გოდერძი მაჩაიძესთან შეჯახების შემდეგ, საჯარიმოში შეჭრილი გიორგი კოხრეიძე წაიქცა, მაგრამ ჯენერი ხორავამ თამაშის გაგრძელება ბრძანა. ფანცულაიას ეპიზოდის არ იყოს, ესეც სადავო ჩანდა, რადგან მცველმა შემტევს ფეხი წამოსდო...

ვაგნერ გონსალვესი ფორმაში შედის და გუშინ საკმაოდ კარგადაც გამოიყურებოდა. 55-ე წუთზე მან მოხდენილი პასით მეკარესთან მარტო დატოვა კოხრეიძე, რომელმაც ბურთს ვერ მოუსწრო და მომენტი დაიკარგა.

56-ე წუთზე სწრაფი შეტევის დასრულებას უკვე გორგიაშვილი შეეცადა, მაგრამ გიორგი ბეგაშვილმა პოზიცია კარგად შეარჩია და სახიფათო დარტყმას გადაეღობა.

ამ პერიოდში გორელებმა სახიფათოდ მხოლოდ ერთხელ შეუტიეს - მარცხენა ფლანგზე ისევ ქავთარაძემ იაქტიურა, თუმცა კუპატაძემ დარტყმა მოიგერია.

59-ე წუთზე "საბურთალომ" პენალტის დარტყმის უფლება მოიპოვა: გორგიაშვილმა მეკარესთან პირისპირ დატოვა კოხრეიძე, რომელიც ალვინ ფორტისმა წააქცია და 11-მეტრიანი კი უნაკლოდ შეასრულა თავად დაზარალებულმა - 2:0.

ყოველდღიური სპორტული გაზეთი "ლელო"
559
მკითხველის კომენტარები / 0 /
მსგავსი ამბები
რუბრიკის სხვა სიახლეები