ეროვნული ლიგა. III ტური: როცა გამოცდილება და კლასი ყველაფერს წონის...

16.03. ქუთაისი. რამაზ შენგელია
(უმაყურებლოდ)

ტორპედო 4-0 ლოკომოტივი
1:0 კუტალია (37), 2:0 კაპანაძე (45. დოლიძის პასით), 3:0 კუტალია (63. კუხიანიძის პასით), 4:0 არველაძე (79-საკ. კარში)

ტორპედო (4-2-3-1): კვასხვაძე - ტაბატაძე, ხურცილა, გურული, ქიმაძე - გიგაური, კუხიანიძე (64. წიქარიძე) - დოლიძე, კუტალია, სარდალიშვილი (46. მამასახლისი) - კაპანაძე (80. ლიპარტია).

სათადარიგოები: ქვილითაია, ჭიჭინაძე, ბოხაშვილი, ტუღუში
მწვრთნელი: კახა ჩხეტიანი

ლოკომოტივი (4-3-3): თევდორაძე - კომახიძე, ქურდაძე, ჭანტურია, გაბაძე - სამურკასოვი (77. ღონღაძე), შონია, გვალია (61. კიკაბიძე) - დათიაშვილი (73. კიკნაძე), არველაძე, გავაშელიშვილი.

სათადარიგოები: შეროზია, ძებნიაური, დ.ჯიქია, კობახიძე
მწვრთნელი: ლაშა ჭაღიაშვილი

გაფრთხილება: გვალია (35), გიგაური (48), ჭანტურია (56), არველაძე (8

გამოუყენებელი მომენტები,
დასჯილი სტუმარი

ქვეყნის მოქმედმა ჩემპიონმა პირველ ტურში განცდილი მოულოდნელი მარცხის შემდეგ, ზედიზედ მეორე შეხვედრა მოიგო. "ლოკომოტივისა" და "ტორპედოს" გულშემატკივრებს შორის გასულ სეზონში მომხდარი დაპირისპირების გამო, ქუთაისური მატჩი ქომაგების გარეშე ჩატარდა.

უმაყურებლო შეხვედრაში კახა ჩხეტიანის გუნდმა მეტოქე დიდი ანგარიშით 4:0 დაამარცხა. თუმცა, პირველი ტაიმის ბოლომდე ისეთი თამაში მიდიოდა, ეს შედეგი ძნელად სავარაუდო იყო.

ქუთაისელთა თამაშში თავიდან ბევრი ხარვეზი ჩანდა. ტორპედოელები უპირატესობას კი ფლობდნენ, მაგრამ რამდენჯერმე ცენტრში, უწყინარ სიტუაციაში დაკარგეს ბურთი და საკუთარ კართან მწვავე შეტევები მიიღეს.

რომ არა გამოცდილი როინ კვასხვაძის დიდებული თამაში, შესაძლებელი იყო, მატჩის სცენარი სულ სხვანაირად განვითარებულიყო. მე-4 წუთზე მან მამია გავაშელიშვილის სახიფათო დარტყმა მოიგერია, შემდეგ ვატო არველაძეს არ დაანება გატანა, 27-ე წუთზე კი, იმავე არველაძის პასით, მასთან პირისპირ გასულ გავაშელიშვილს აჯობა და საკუთარი გუნდი აშკარა გოლისგან იხსნა.

ერთი სიტყვით, მატჩის ამ მონაკვეთში ახალგაზრდული "ლოკომოტივი" უფრო გამართულ ფეხბურთს აჩვენებდა, ვიდრე გამოცდილი "ტორპედო", მაგრამ... გამოცდილებამ და გაცილებით მაღალმა კლასმა თავისი გაიტანა...

37-ე წუთზე ქუთაისელებმა პირველივე საგოლე მომენტი გამოიყენეს - მეკარე რევაზ თევდორაძის შეცდომით ლევან კუტალიამ ისარგებლა და მასპინძლები დააწინაურა. ტაიმის უკანასკნელ წუთზე კი თორნიკე კაპანაძემ დაახლოებით 30 მეტრიდან "დააქუხა" და მეტოქეს გასახდელში ულამაზესი გოლი "გააყოლა"...

ჰეთ-თრიკის სურვილი...

"ტორპედომ" ორი გატანილი გოლით, ფაქტობრივად, პირველივე ტაიმში მოილია საქმე და მეორე ნახევარში გაცილებით ლაღი და სანახაობრივი ფეხბურთი ითამაშა. რამდენიმე მწვავე შეტევის შემდეგ კუტალია მარცხენა ფლანგიდან საჯარიმოსკენ შეიწია და მეკარეს შორეულ დაბალ კუთხეში გაუტანა - 3:0.

ის მოგვიანებით კიდევ ერთხელ აღმოჩნდა მოვლენების ეპიცენტრში, როცა მეკარე მოატყუა და შეეძლო საგოლე გადაცემის ავტორი გამხდარიყო, თუმცა ხელსაყრელ პოზიციაში მყოფი ჯაბა ლიპარტიასთვის პასის გაკეთებას კარში დარტყმა ამჯობინა და ბურთი ხარიხას გადააცილა. ამ ეპიზოდისას უკვე 4:0 იყო "ტორპედოს" სასარგებლოდ და აშკარად გამოჩნდა, რომ კუტალიას ჰეთ-თრიკის შესრულების სურვილმა სძლია...

მატჩის გმირები და  ანტიგმირები

ფეხბურთი გუნდური სპორტია და იშვიათი გამონაკლისების გარდა, შეხვედრას ერთი კონკრეტული ფეხბურთელი არ იგებს ან არ აგებს. ამ შეხვედრაშიც ყველაფერი კომპლექსურად მოხდა. მატჩის გმირად შეიძლება დავასახელოთ მეკარე როინ კვასხვაძე, რომელმაც 0:0-ზე სამი ურთულესი დარტყმა მოიგერია.

ან იგივე კუტალია, რომლის გოლიც "ტორპედოსთვის" გარდამტეხი აღმოჩნდა და შემდეგ დუბლიც შეასრულა... კაპანაძეც, რომელმაც თითქმის გასახდელში გატანილი გოლით სტუმრები საბოლოოდ გატეხა... კარგი იყო დაცვაში დავით ხურცილავა, მარჯვენა ფლანგზე კი ტრადიციულად შეუჩერებელი იყო გრიგოლ დოლიძე.

რაც შეეხება ანტიგმირებს, 16 მარტის წვიმიანი საღამო "ლოკომოტივისთვის" უიღბლო გამოდგა... გავაშელიშვილმა გასატანი ვერ გაიტანა, გამოცდილი მეკარე თევდორაძე, როგორც მას სჩვევია ხოლმე, ისე დამაჯერებლად ვერ გაისარჯა, ბოლოს კი არველაძემ საკუთარ კარში "ეფექტური" ავტოგოლით საბოლოო ანგარიში დააფიქსირა...

თუმცა ეს ფეხბურთია და მსგავსი შეცდომებისგან არავინაა დაზღვეული. "ლოკომოტივი" ახალგაზრდული, ტექნიკური, მოძრავი გუნდია და თუ მსგავს ხარვეზებს მინიმუმამდე დაიყვანს, მომდევნო შეხვედრებში სატურნირო მდგომარეობასაც გამოასწორებს. მესამე ტურის შემდეგ კი თბილისელები ჯერაც უქულოდ არიან..

მომდევნო ტური

ლოკომოტივი-ჩიხურა 31.03. 16:00
რუსთავი-საბურთალო 31.03. 18:30
დილა-სიონი 31.03. 20:30
დინამო (თბ)-ტორპედო 01.04. 16:00
სამტრედია-კოლხეთი 01.04. 19:00

ყოველდღიური სპორტული გაზეთი "ლელო"
712
მკითხველის კომენტარები / 0 /
მსგავსი ამბები
რუბრიკის სხვა სიახლეები
;