ეროვნული ლიგა. III ტური: "ჩიხურა" თავის სტილს არ ღალატობს

17.03. თბილისი. დავით პეტრიაშვილი არენა

ჩიხურა 1-0 რუსთავი
1:0 იონანიძე (90+2. ჩიხლაძის პასით)

ჩიხურა (4-2-3-1): ჰამზიჩი - კაშია, მაისაშვილი, მირცხულავა, მეგრელიშვილი - კაკუბავა (79. ჩიხლაძე), ჩიკვაიძე - ლექვთაძე (70. გუგა), მარკოზაშვილი, გაბედავა - ბუღრიძე (84. იონანიძე).

სათადარიგოები: მწყერაშვილი, ჩიტეიშვილი, ცერცვაძე, დობროვოლსკი
მწვრთნელი: სოსო ფრუიძე

რუსთავი (4-2-3-1): რევიშვილი - ცარიკაევი, ცხოვრებოვი, მ. კობახიძე, ენდელაძე (45+1. ცინცაძე) - პაპავა, ფონიავა - ციცქიშვილი (55. ბ. ქავთარაძე), გაბულოვი, მიქელთაძე - მარცვალაძე (69. სიჭინავა).

სათადარიგოები: სეფიაშვილი, კლიმიაშვილი, ჩოგაძე, გორელიშვილი
მწვრთნელი: ვლადიმირ გაზაევი

გაფრთხილება: კობახიძე (22), კაკუბავა (47), გაბულოვი (48), მაისაშვილი (71)

გაძევება: გაბულოვი (73. რუსთავი)

არბიტრი: ი. კვირიკაშვილი

ახლა უნდა დაემტკიცებინათ...

სოსო ფრუიძის გუნდი, თავის სტილს არ ღალატობს: როგორც ყოველთვის, სეზონამდე გუნდი ტრანსფერებით თავს ვერ იწონებს, მაგრამ იწყება ჩემპიონატი და გუნდი ყველას ებრძვის...

ვლადიმირ გაზაევის გაწვრთნილებისთვის ეს შეხვედრა მნიშვნელოვანი იყო იმით, რომ თბილისის "დინამოსთან" მოგების შემდეგ ჩემპიონთან მარში ვერ შედგა. ახლა გაზაევს და მის გუნდს უნდა დაემტკიცებინათ, რომ "ტორპედოსთან" წაგება შემთხვევითი იყო...

არბიტრი მართალი იყო...

ნომინალურმა სტუმრებმა თამაში კარგად დაიწყეს და მე-3 წუთზე, ბექა მიქელთაძის გადაცემის შემდეგ, ანგარიშის გახსნა გიორგი გაბულოვს შეეძლო, მაგრამ კარს 6-7 მეტრიდან ააცილა.

რუსთაველები უტევდნენ და ცდილობდნენ, მეტოქისთვის საკუთარი თამაში ეკარნახათ. მაგრამ, რეალურად, ეს "ჩიხურას" გამოუვიდა - ფრუიძის გუნდი თითქმის ყველასთან დაცვიდან თამაშობს და საკუთარ შანსს ელის. ახლაც ასე მოხდა - კონტრშეტევებზე ითამაშა და ამ ტაქტიკამ გაამართლა.

საჩხერელებმა საგოლე მომენტი 22-ე წუთზე შექმნეს, როცა ირაკლი ბუღრიძე გაექცა მამუკა კობახიძეს და საჯარიმოში შერბოდა, მაგრამ გაზონზე აღმოჩნდა. საჩხერელები პენალტს ითხოვდნენ, თუმცა რეალურად, კობახიძემ მეტოქეს საჯარიმოს ფარგლებს გარეთ მოქაჩა. ასე რომ, არბიტრი მართალი იყო...

31-ე წუთზე რუსთაველთა კარის აღება უკვე ლევან კაკუბავას შეეძლო, მაგრამ თანაგუნდელმა გიორგი გაბედავამ შეუშალა ხელი, კარის წინ დარჩენილმა ირაკლი ლექვთაძემ კი ასხლეტილი ბურთი კარში გაგზავნა, მაგრამ... თამაშგარეში იყო.

მაინც იონანიძემ...

გაბულოვის გაძევებით, საჩხერელებმა მშვენივრად ისარგებლეს: კარგად ჩაერთო თამაშში დავით იონანიძე - ცნობილი ფორვარდის, ზურაბ იონანიძის ვაჟი, რომელმაც მცირე დროში თავის გამოჩენა და გამარჯვების გოლის გატანა მოახერხა.

მსაჯის მიერ კომპენსირებული დროის პირველივე წუთზე "ჩიხურამ" გოლის გატანის რეალური შანსი ვერ გამოიყენეს. დემურ ჩიხლაძემ მშვენიერი გადაცემით მეკარესთან ერთი ერთზე დატოვა იონანიძე, მაგრამ ამ უკანასკნელმა ბურთი ვერ დაიმორჩილა, არეულობაში მარკოზაშვილმა სცადა გატანა, მაგრამ მას კობახიძე გადაეღობა და ბურთი კუთხურზე გადავიდა...

თუმცა, საფინალო სასტვენამდე იონანიძემ მეტოქის კარის ბადე მაინც შეარხია - ასისტენტი ისევ ჩიხლაძე გახლდათ, რომლის რბილ, მოზომილ გადაცემაზე "ჩიხურას" თავდამსხმელი დროულად გაიხსნა და ვარდნაში ეფექტურად გაიტანა.

"ჩიხურამ" 7 ქულა დააგროვა, რუსთაველთა მთავარ მწვრთნელს კი ქართულ ფეხბურთში ჯერაც მოუწევს უკეთ გარკვევა, მის გუნდში არსებული პოტენციალი სრულად რომ გამოიყენოს.

სიმულაცია?

რუსთაველებმა შესვენებამდე შეტევები გააძლიერეს. განსაკუთრებით, მიქელთაძე აქტიურობდა, რომელიც მარცხენა ფლანგიდან მცველს ხშირად აწუხებდა.

სტუმრებმა რეალური საგოლე მომენტი 33-ე წუთზე სწორედ მისი აქტიურობის შედეგად შექმნეს - მიქელთაძე ორ მცველს შორის გაძვრა, საჯარიმოში შეიჭრა და მახვილი კუთხიდან ძლიერად დაარტყა - "ჩიხურა" მეკარე დინო ჰამზიჩმა გადაარჩინა, გაბულოვის დამატებული კი კარიდან თემურ მარკოზაშვილმა გამოიტანა.

მეორე ტაიმი ფრუიძის გუნდმა კვლავ კონტრშეტევით დაიწყო. "ჩიხურას" ანგარიშის გახსნა 57-ე წუთზეც შეეძლო - საჯარიმოს ხაზიდან გაბედავას დარტყმული ნუკრი რევიშვილმა მოიგერია, დამატებაზე გატანა კაკუბავამ სცადა, მაგრამ ბურთს პაპუნა ფონიავა გადაეღობა და რუსთაველები იხსნა. თუმცა ეს მღელვარება ფუჭი გამოდგა - მსაჯმა კაკუბავას თამაშგარე მდგომარეობა დაუფიქსირა.

72-ე წუთზე მომხდარი ეპიზოდი გადამწყვეტი აღმოჩნდა: გაბულოვი საჯარიმოში შეიჭრა, ბაქარ მირცხულავასთან შეჯახების შემდეგ წაიქცა და პენალტს ითხოვდა - არბიტრმა კი მას ყვითელი ბარათი უჩვენა, რაც რუსთაველთა ლეგიონერისთვის მეორე იყო ამ მატჩში და ავტომატურად მოედანიც დატოვა...
თუმცა გაბულოვის წაქცევა სიმულაციას არ ჰგავდა...

ყოველდღიური სპორტული გაზეთი "ლელო"
1191
მკითხველის კომენტარები / 0 /
მსგავსი ამბები
რუბრიკის სხვა სიახლეები
;