ეროვნული ლიგა. III ტური: ჯერ ყველაფერი შორსაა...

18.03.თბილისი. მიხეილ მესხი (სათ)

სიონი 0-0 კოლხეთი

სიონი (4-2-3-1): მუჯრიშვილი - მინდორაშვილი, თომაშვილი, ნოზაძე, გიორბელიძე - დათუნაიშვილი, ქიქავა - გაფრინდაშვილი (79. ლეჟავა), სიხარულია (46. ბერიაშვილი), ც. სამუშია (72. მანაგაძე) - დვალი.

სათადარიგოები: ზარქუა, გურეშიძე, კოშკაძე, გიორგი ჭეიშვილი
მწვრთნელი: კობა ჟორჟიკაშვილი

კოლხეთი (3-4-3): პოლტავცევი - პონამარიოვი, გოგონაია, ბ. მახარაძე - კილასონია, არზიანი (74. ტყემალაძე), დანილოვი, კაბორე - კახელიშვილი (83. არქანია), მიხაილოვი, გოგბერაშვილი.

სათადარიგოები: გურგენიძე, ლ. კაკულია, გიგა ჭეიშვილი, ჯიმშელეიშვილი, ჩუბითიძე
მწვრთნელი: ნუგზარ თვარაძე

გაფრთხილება: გოგონაია (18), კახელიშვილი (43), გიორბელიძე (58), ქიქავა (68), დანილოვი (81)
არბიტრი: გ. ვადაჭკორია

ყველაფერს ფორტუნას ნუ
დავაბრალებთ

ბოლნისის "სიონი" მიხეილ მესხის სახელობის სათადარიგო სტადიონზე დაუხვდა ფოთის "კოლხეთს" და უგოლოდ ეთამაშა. არადა, ორივე გუნდის კართან არაერთი საგოლე მომენტი შეიქმნა.

უპირატესობა უფრო "სიონისა" იყო, თუმცა გატანა სტუმრებსაც შეეძლოთ. კარგად გაისარჯნენ მეკარეები - ფოთელთა კარის დარაჯი ანდრი პოლტავცევი და "სიონის" კიპერი მიხეილ მუჯრიშვილი...

მეკარეებს თავიანთი დამსახურება აქვთ, მაგრამ აშკარა უსამართლობა იყო, მატჩი გოლების გარეშე რომ დასრულდა. საგოლე მომენტები იმაზე მეტი იყო, ვიდრე ველოდით.

ზოგიერთ შემთხვევაში გოლი გარდაუვალიც კი ჩანდა, მაგრამ რას ვიზამთ. საფეხბურთო ფორტუნამ ასე განსაჯა, მაგრამ ყველაფერს მხოლოდ ფორტუნასაც ნუ დავაბრალებთ. ფორვარდებს გაცილებით უკეთ მართებდათ საკუთარი შანსების გამოყენება...

შედეგი ლოგიკურია

მთელი თამაშის განმავლობაში უპირატესობა უფრო "სიონისა" იყო, მაგრამ აუტსაიდერი "კოლხეთი" შანსს კონტრშეტევებში ეძებდა და არცთუ ურიგოდ. ფრეს უსამართლო შედეგთა კატეგორიას ნამდვილად ვერ მივაკუთვნებთ.

ის კი არა, მატჩის მიწურულს ფოთელთა რუს შემტევ ილია მიხაილოვს დიდებული საგოლე შანსი ჰქონდა, თუმცა, რომ გაეტანა, "სიონი" შეგვეცოდებოდა, რადგან თამაში ისე მიდიოდა, კობა ჟორჟიკაშვილის გაწვრთნილი გუნდი არავითარ შემთხვევაში არ იმსახურებდა მარცხს.

ორი ასპროცენტიანი...

ბოლნისელებმა ორი ისეთი ასპროცენტიანი მომენტი ვერ გამოიყენეს, რომელთაც ნებისმიერი გუნდი ინატრებდა ნებისმიერ შეხვედრაში. პირველ შემთხვევაში გატანა ლაშა მანაგაძეს მართებდა, მეორედ კი, იმავე მანაგაძის პასის შემდეგ - გიორგი ბერიაშვილს.

ორივე ეს ფეხბურთელი შეცვლაზე შევიდა და ბოლნისელთა შეტევებს სიმწვავე შემატა. და ორივე შემთხვევაში შესანიშნავად იმოქმედა ბოლნისელთა კაპიტანმა ჯაბა დვალმა, ვინც მნიშვნელოვნად შეუწყო ხელი პოლტავცევის კართან სიტუაციის დაძაბვას. ჯაბა სხვა ეპიზოდებშიც ბევრს ცდილობდა, თუმცა გუშინ ბოლნისელთა ლიდერი უგოლოდ დაშვრა.

რა ელის კოლხეთს?

ფოთელებმა გვიჩვენეს, რომ ისინი არც ისე უმწეოები არიან, როგორც ეს პირველ ორ ტურში ჩანდა. მომავალი ტურიდან გუნდს რუსი მთავარი მწვრთნელი ვიქტორ დემიდოვი ჩაიბარებს და, წესით, ზღვისპირელთა თამაშში უკეთესობას კიდევ უნდა ველოდოთ. მოგეხსენებათ, გუნდი დატოვა ასევე რუსმა სპეციალისტმა კონსტანტინ გალკინმა.

რაც მთავარია, ფოთელთა სათამაშო რგოლებს შორის აღარ ჩანდა ის უზარმაზარი ნაპრალები, რომელიც ასე თვალსაჩინო იყო ადრე. თავისთავად, მათი თამაში ჯერ კიდევ ძალიან შორსაა უკეთესობისგან, მაგრამ ის აღარ არის, რაც ადრე იყო.

ეგაა, ისე ჩანს, რომ გუნდთან ადაპტაცია ჯერ კიდევ არ გაუვლიათ რუს ლეგიონერებს. მაგალითად, მიხაილოვს, ვინც რამდენჯერმე აღმოჩნდა ხელსაყრელ სიტუაციაში, მაგრამ გატანა ვერ მოახერხა...

1100
მკითხველის კომენტარები / 0 /
მსგავსი ამბები
რუბრიკის სხვა სიახლეები
;