ეროვნული ლიგა. IV ტურის მიმოხილვა და ვრცელი ანალიზი

საინტერესო და არაპროგნოზირებადი გამოდგა გასული ტური: როგორც უკვე "ტრადიციად" იქცა, ერთი-ორი მოულოდნელი შედეგიც დაფიქსირდა, დაძაბულობაც, ფაქტობრივად, ტურის ყველა მატჩს თან ახლდა, ცალკეული ფეხბურთელების გაბრწყინებაც ვნახეთ და ცალკეული მწვრთნელების სწორად შერჩეული ტაქტიკაც.

სატურნირო ცხრილზე აღარაფერს ვამბობთ: მხოლოდ და მხოლოდ ორმა გუნდმა არ შეიცვალა ადგილი ("საბურთალო" ისევ პირველზე დარჩა, "ლოკომოტივი" კი - ისევ ბოლოზე), აი, დანარჩენებმა კი სხვადასხვა პოზიციებზე გადაინაცვლეს.

ეგ კი არა, ამ ტურის შემდეგ ვეღარავინ იტყვის, რომ "კოლხეთი" და "ლოკომოტივი" ჩემპიონატის გამოკვეთილი აუტსაიდერები არიანო: ფოთელებმა ზედიზედ მეორე წაუგებელი მატჩი ჩაატარეს, "ლოკომოტივმა" კი პირველი ქულა მოიპოვა ისეთ თამაშში, სადაც დაახლოებით 70 წუთი კაცნაკლული იყო...

შთამბეჭდავი საბურთალო

"საბურთალო" მართლაც რომ 100 პროცენტით ამართლებს ჩემპიონატის ერთ-ერთი უმთავრესი ფავორიტის სტატუსს: გიორგი ჭიაბრიშვილის დამოძღვრილმა გუნდმა ზედიზედ მეოთხე მატჩი მოიგო და კვლავაც უდანაკარგოდ აგრძელებს ასპარეზობას!

4 მატჩი, 4 მოგება, ყველაზე მეტი გატანილი გოლი და ყველაზე ნაკლები გაშვებული, - "საბურთალოს" ლიდერობა აბსოლუტურად კანონზომიერი მოვლენაა!

აღარაფერს ვამბობთ იმ ფაქტზე, რომ ამ ოთხივე მატჩში "საბურთალომ" თამაშის ბედი მეორე ტაიმში გადაწყვიტა და წინა შეხვედრები რომ აღარ გავიხსენოთ, მხოლოდ გასულ ტურზე ვიტყვით, როცა მართლაც "ცალკარა" ვიხილეთ!

ჰო, ეს იმაზე მეტი იყო, აშკარა უპირატესობას რომ ეძახიან: "საბურთალომ" თავისი მრავალფეროვანი შეტევებით "რუსთავი" საკუთარ საჯარიმოს მიაჯაჭვა და ვინც იმ სუსხიან საღამოს ტრიბუნიდან ადევნებდა თვალს ამ მატჩს, ალბათ, დაგვეთანხმება, რომ ჭიაბრიშვილის გუნდის გამარჯვება აბსოლუტურად ლოგიკური იყო.

თანაც, მრავალფეროვანი შეტევებიც შემთხვევით არ გვიხსენებია: მეტოქეთათვის ხომ გამოცანად რჩება, "საბურთალოს" რომელი ფეხბურთელისაგან უნდა ელოდონ ხიფათს!

ასე იყო "რუსთავთან" მატჩშიც (სადაც, გიორგი ჭიაბრიშვილმა პირწმინდად მოუგო "სამწვრთნელო დუელი" ვლადიმირ გაზაევს), რომლის ბოლო 15 წუთის განმავლობაში "საბურთალოს" ლამის 5 (!) ნომინალური შემტევი ჰყავდა მოედანზე.

ასეთი კოლოსალური უპირატესობა კი, როცა იქნებოდა, გოლ(ებ)ში უნდა ასახულიყო და ასეც მოხდა: 34 წლის დიმიტრი ტატანაშვილმა კიდევ ერთხელ დაამტკიცა, რომ მნიშვნელობა არა აქვს, რომელი გუნდის მაისურით ასპარეზობს და ისე როგორც "კოლხეთთან" მატჩში, ამჯერადაც შეცვლაზე შესულმა გამოიჩინა თავი.

ტატანაშვილი "საბურთალოს" ახალწვეულია, ისე როგორც ამ გუნდის საკვანძო ფიგურებად ქცეული თორნიკე გორგიაშვილი, გეგა დიასამიძე და გიორგი რეხვიაშვილი, ანუ, "საბურთალოს" სატრანსფერო კამპანიაც წარმატებული გამოდგა, განსხვავებით სხვა გუნდებისგან...

რევანშიც და ხარისხიც...

პირველ ტურში აშკარად არწასაგებ თამაშში მარცხის შემდეგ, თბილისის "დინამომ" ზედიზედ მესამე მატჩი მოიგო და აბსოლუტურად დამსახურებულად გადაინაცვლა მეორე ადგილზე! თუმცა, "დინამოსთვის" ხომ მხოლოდ პირველი ადგილია ორიენტირი და კახა კაჭარავას დამოძღვრილი გუნდი რომ საჩემპიონო რბოლაში ჩაერთვება, ეს არავის უნდა გაუკვირდეს.

თანაც, საქმე მხოლოდ მოგებებსა თუ ქულებში არ არის: სამივე მოგებულ მატჩში "დინამოს" უპირატესობა მეტოქესთან შედარებით, მართლაც რომ თვალშისაცემი იყო! მოკლედ, სამივე ეს მატჩი "დინამომ" დამსახურებულად მოიგო და აღარაფერს ვამბობთ იმ ფაქტზე, თუნდაც ბოლო ტურში რომელ მეტოქესთან გაიმარჯვა ჩვენმა ყველაზე ტიტულოვანმა კლუბმა: ქვეყნის მოქმედი ჩემპიონის დამარცხებასთან ერთად, ეს ხომ ერთგვარი რევანშიც იყო შარშანდელი სეზონის ბოლო ტურში წაგების გამო...

..."დინამო" ტურიდან ტურამდე უმატებს, ჩინებულ ფორმაშია გუნდის კაპიტანი ოთარ კიტეიშვილი, ახალწვეულებიც მშვენივრად გამოიყურებიან და ამათგან, ცალკე უნდა აღინიშნოს, ბუდუ ზივზივაძის შედეგიანი თამაში: 2016 წლის გარდამავალი ჩემპიონატის საუკეთესო ფეხბურთელმა და ბომბარდირმა, განვლილ ოთხ ტურში 4 გოლი გაიტანა ("ტორპედოსთან" სულაც "დუბლი" შეასრულა)!

ვარდნა გრძელდება...

ამ სეზონის დაწყების წინ, როცა საიუბილეო ჩემპიონატის ფავორიტებზე მიდიოდა სჯა-ბაასი, ბევრს მიაჩნდა, რომ "რუსთავი" და "სამტრედია", სულ მცირე, ევროტურნირების საგზურებისათვის იბრძოლებდნენ.

ამის მიზეზი კი ორივე გუნდში მომხდარი მართლაც ფართომასშტაბიანი ცვლილებები უნდა ყოფილიყო: "რუსთავშიც" და "სამტრედიაშიც", წინა სეზონთან შედარებით, ფაქტობრივად, 99 პროცენტით შეიცვალა შემადგენლობა.

თუმცა, როგორც აღმოჩნდა, ასეთ რადიკალურ ცვლილებებს სასურველი შედეგი ყოველთვის არ მოაქვს: "სამტრედიაც" და "რუსთავიც", დღესდღეობით, გასავარდნი პლეი ოფის ზონაში იმყოფებიან! არადა, ორივე გუნდმა სეზონი მოგებით დაიწყო, თუმცა ამას წარუმატებელი სერია მოჰყვა: "რუსთავმა" და "სამტრედიამ" ზედიზედ სამი მატჩი წააგეს...

...ორივე გუნდის წარუმატებელი ასპარეზობის ერთ-ერთი მთავარი მიზეზი, რაღა თქმა უნდა, საკადრო პრობლემებია; ასე მაგალითად, ამ ტურში "რუსთავმა" რამდენიმე საკვანძო ფეხბურთელი (ლევან გეგეჭკორი, მათე კვირკვია, გიორგი გაბულოვი) მოისაკლისა, მაგრამ მეტოქესაც ("საბურთალოს") ხომ აკლდა, სულ მცირე, 4-5 ისეთი ფეხბურთელი, ძირითად შემადგენლობაში მოხვედრაზე რომ აქვს სამართლიანი პრეტენზია...

...არანაკლებ მტკივნეულად დგას აშკარად მოკლე სათადარიგოთა სკამის პრობლემა "სამტრედიაშიც". ჰოდა, ამიტომაც არის, "სამტრედიას" ახალგაზრდა თავკაცი უჩა სოსიაშვილი, ფაქტობრივად, ყველა მატჩში სრულიად გამოუცდელ ახალგაზრდებს რომ აძლევს თავის გამოჩენის საშუალებას: წინა ტურში დებიუტი ჰქონდა 18 წლის ნიკოლოზ ხაჩიძეს, ახლა კი - 16 წლის ანატოლი მესიაჩენკოსა და 18 წლის გიორგი გიორბელიძეს...

ძველ-ახალი ლეგიონერები

გასულ ტურში ლეგიონერების თემა ნამეტნავად აქტუალური იყო: ეროვნულ ლიგაში მოასპარეზე ერთდროულად რამდენიმე უცხოელმა ფეხბურთელმა ხომ ლომის წილი შეიტანა თავისი გუნდის წარმატებულ თამაშში!

აი, თუნდაც "დილას" ლეგიონერები ვახსენოთ: მიკოლა კოვტალიუკმა (უკრაინა) გორელთა გუნდის მაისურით პირველი გოლი გაიტანა, ხოლო ისიფუ ლემპტიმ საქართველოს ჩემპიონატში, სულაც სადებიუტო გოლი გაიტანა.

გოლ(ებ)ი არ გაუტანიათ, მაგრამ დიდი წვლილი შეიტანეს "დილას" გამარჯვებაში ალვინ ფორტესმა (ჰოლანდია) და საქართველოში ერთწლიანი პაუზის მერე დაბრუნებულმა ლეანდრო რიბეირომ (ბრაზილია).

...ბევრი ლეგიონერი ჰყავს "კოლხეთსაც" და ის ფაქტი, რომ ფოთელთა გუნდმა ბოლო ორ ტურში 4 ქულა მოაგროვა, უცხოელი ფეხბურთელების დამსახურებაც არის: მეკარე ანდრეი პოლტავცევმა ზედიზედ მეორე "მშრალი" მატჩი ჩაატარა, ხოლო 30 წლის ვლადიმერ გოგბერაშვილმა (რუსეთი) საქართველოს ჩემმპიონატში ჯერ სადებიუტო გოლი გაიტანა, მერე კი სულაც "დუბლი" შეასრულა.

თუმცა, ამ ტურის საუკეთესო ლეგიონერი (და, ალბათ, ერთ-ერთი საუკეთესო ფეხბურთელი), რაღა თქმა უნდა, "საბურთალოს" ახალგაზრდა შემტევი ვაგნერ გონსალვეში გახლდათ!

ბრაზილიური წარმოშობისა და საფრანგეთის მოქალაქეობის მქონე 21 წლის გარემარბი, ხან მარჯვენა ფლაგიდან აწიოკებდა "რუსთავის" უკანახაზელებს, ხან - საპირისპირო ფლანგიდან.

ეგ კი არა, როცა "საბურთალოს" მთავარმა მწვრთნელმა გიორგი ჭიაბრიშვილმა მარცხენა მცველის (ცოტნე ნადარაია) ნაცვლად ცენტფორვარდი (გურამ გოშთელიანი) შემოიყვანა მოედანზე, მარცხენა მცველად ...ვაგნერ გონსალვეში მოგვევლინა და სწორედ ამ სწრაფმა და ტექნიკურმა ფრანგმა (გნებავთ - ბრაზილიელმა) დაუსვა წერტილი "რუსთავის" რბევას...

ყოველდღიური სპორტული გაზეთი "ლელო"
1236
მკითხველის კომენტარები / 0 /
მსგავსი ამბები
რუბრიკის სხვა სიახლეები
;