ეროვნული ლიგა. IV ტურის წინათქმა: ქართული კლასიკოს მოლოდინში

სანაკრებო მატჩებიდან გამომდინარე, ეროვნულ ლიგაში ორკვირიანი შესვენება იყო.

და აი, ამ უქმეებზე ჩემპიონატი განახლდება, თანაც, მოახლოებულ ტურში ისეთი მატჩი გველოდება, უდიდეს ინტრიგას რომ გვპირდება:

კვირას, პირველ აპრილს, ჩვენს უმთავრეს საფეხბურთო არენაზე, საქართველოს ყველაზე ტიტულოვანმა კლუბმა თბილისის "დინამომ" მოქმედ ჩემპიონ ქუთაისის "ტორპედოს" უნდა უმასპინძლოს. თუმცა, "ქართული კლასიკოს" გარდა, IV ტურში სხვა საინტერესო მატჩებიც გველოდება...

ლოკომოტივი-ჩიხურა
31.03. თბილისი. მიხეილ მესხი
(სათადარიგო). 16:00
10: +3 =3 -4, 17-12

ტურის პირველ მატჩში მასპინძლები ყველა ღონეს იხმარენ, სეზონში პირველი ქულები რომ მოიპოვონ; შეგახსენებთ, რომ საიუბილეო, XXX ჩემპიონატში ერთადერთი სწორედ "ლოკომოტივია", სეზონის სტარტზე სამივე მატჩი რომ წააგო; აი, მეტოქემ კი, პირიქით, მშვენიერი სტარტი აიღო: გამოცდილი სპეცილაისტის, სოსო ფრუიძის დამოძღვრილი "ჩიხურა" კვლავაც დაუმარცხებლად აგრძელებს ასპარეზობას.

ჩემპიონატის აუტსაიდერისა და ერთ-ერთი ლიდერის დაპირისპირების წინ მაინც თავი უნდა შევიკავოთ წყვილში ფავორიტის დასახელებისაგან;

ჯერ ერთი, ამ პაუზის დროს, "ლოკომოტივმა" საგრძნობლად გააძლიერა თავისი ყველაზე პრობლემატური რგოლი და ორი გამოცდილი უკანახაზელი დაიმატა: უჩა ლობჟანიძე და დაჩი ცნობილაძე (ამ უკანასკნელს საყრდენ ნახევარმცველადაც შეუძლია თამაში).

ამას გარდა, არც ის დაგვავიწყდეს, რომ შარშანდლამდე "ლოკომოტივს" არცერთი მატჩი არ ჰქონდა მოგებული საჩხერელთა გუნდთან, მაგრამ წინა სეზონში სიტუაცია რადიკალურად შეიცვალა: ამ გუნდებს შორის გამართული პირველი სამივე მატჩი "ჩიხურამ" დიდი ანგარიშით წააგო (0:5, 0:3, 0:3) და მხოლოდ IV წრის შეხედრაში გაიმარჯვა მინიმალური ანგარიშით.

აქვე, ისიც უნდა აღვნიშნოთ, რომ იმ სამივე მოგებულ მატჩში "ლოკომოტივის" ცენტრფორვარდმა ირაკლი სიხარულიძემ დუბლები შეასრულა. თუმცა, გასული სეზონის საუკეთესო ფეხბურთელი და საუკეთესო ბომბარდირი დღესდღეობით ჩეხეთში აგრძელებს კარიერას...

რუსთავი-საბურთალო
31.03. თბილისი. მიხეილ მესხი. 18:30
0: +0 =0 -0, 0-0
დისკვალიფიკაცია: გიორგი გაბულოვი (რუსთავი)

ამ ტურში ეს მატჩიც ძალიან დიდ ინტერესს იწვევს: სეზონის დაწყების წინ, ორივე ამ გუნდს ხომ ჩემპიონატის უმთავრეს ფავორიტებად მოიაზრებდნენ! თუმცა, ჯერჯერობით ამ ფავორიტის სტატუსს მხოლოდ "საბურთალო" ამართლებს: გიორგი ჭიაბრიშვილს ყველაზე დაბალანსებული გუნდი ჰყავს ეროვნულ ლიგაში და სამი ტურის შემდეგ ქულათა მაქსიმუმის მოპოვებაც, ჩვენი აზრით, აბსოლუტურად ლოგიკურ შედეგად უნდა მივიჩნიოთ.

"საბურთალოს" კიდევ ერთი პლუსი, რა თქმა უნდა, გრძელი სათადარიგოთა სკამია, რასაც ნამდვილად ვერ ვიტყვით "რუსთავზე", რომლის მთავარი მწვრთნელი ვლადიმირ გაზაევი ტრავმირებულების (დავით კვირკველია, ლევან გეგეჭკორი, მათე კვირკვია) გარდა, დისკვალიფიკაციის გამო გუნდის ახალწვეულსა და აშკარად "ხარისხიან" ლეგიონერს, გიორგი გაბულოვს მოისაკლისებს...

...ამ პაუზის დროს, "რუსთავი", ფაქტობრივად, სრული შემადგენლობით ემზადებოდა ლიდერთან მატჩისათვის (მხოლოდ ბექა მიქელთაძე იმყოფებოდა ახალგაზრდული ნაკრების განკარგულებაში).

აი, "საბურთალოს" საწვრთნელ პროცესში კი გუნდის 5 საკვანძო ფეხბურთელი ვერ იღებდა მონაწილეობას: ლაზარე კუპატაძე, გაგი მარგველაშვილი, ცოტნე ნადარაია, ვლადიმერ მამუჩაშვილი და გიორგი კოხრეიძე ასევე საქართველოს 21-წლამდელთა ნაკრებში იყვნენ მიწვეულნი.

დილა-სიონი
31.03. გორი. თენგიზ
ბურჯანაძე. 20:30
42: +17 =2 -23, 45-64

სატურნირო ცხრილის მეზობლებს, სამი ტურის შემდეგ, თითქმის იდენტური მაჩვენებლები აქვთ (თითო მოგება, ფრე და წაგება) და საერთოდაც, აბსოლუტურად თანაბარი შანსები უნდა ჰქონდეთ არა მხოლოდ ამ ტურში, არამედ, საერთოდ, ჩემპიონატში.

ანუ, ერთი შეხედვით, არც "დილას" და არც "სიონს", ჩემპიონატის ფავორიტთა შორის არავინ მოიხსენიებს, მაგრამ ამავე დროს, არც არავის უნდა გაუკვირდეს, რომ გიორგი დარასელიას დამოძღვრილმა "დილამ" თუ კობა ჟორჟიკაშვილის ხელმძღვანელობით მოასპარეზე "სიონმა" კვლავაც შემოგვთავაზონ სიურპრიზები.

ყოველ შემთხვევაში, არ დაგვავიწყდეს, რომ ჯერ მხოლოდ სამი ტურია ჩატარებული და ფავორიტი გუნდების დამარცხებით, ამ ორივე გუნდმა უკვე მოასწრო გულშემატკივრების გახარება-გაოცება.

დინამო (თბ)-ტორპედო
01.04. თბილისი. დინამო არენა. 16:00. LIVE I არხზე
67: +34 =17 -16, 113-63

მნიშვნელობა არა აქვს, რამდენგუნდიანი ჩემპიონატია, მნიშვნელობა არა აქვს, "გაზაფხული-შემოდგომის" ფორმატით ვატარებთ ჩემპიონატს თუ - "შემოდგომა-გაზაფხულის", მნიშვნელობა არა აქვს, რომელი წრის მატჩია, მნიშვნელობა არა აქვს, რომელ ადგილებზე იმყოფებიან კონკრეტულ მომენტში ძველი და უპრინციპულესი მეტოქეები - თბილისის "დინამოსა" და ქუთაისის "ტორპედოს" ყველა დაპირისპირება, მართლაც რომ ამშვენებს საქართველოს ჩემპიონატს.

თანაც, ძალიან ხშირ შემთხვევაში, არა მხოლოდ სატურნირო ინტრიგით გამოირჩეოდა პრინციპული მეტოქეების დაპირისპირებები - ორივე გუნდის ფეხბურთელების თამაშის ხარისხიც არანაკლებ აღტაცებას იწვევდა!

...პირველი ეროვნული ჩემპიონატიდან მოყოლებული, სხვადასხვა დროს, სხვადასხვა გუნდი ("გურია", "გორდა", "სამტრედია", "ზესტაფონი", "ვიტ ჯორჯია", "ოლიმპი"/"მეტალურგი", "სიონი", "ლოკომოტივი", "დილა") უწევდა თბილისის "დინამოს" კონკურენციას, მაგრამ ყველაზე მეტჯერ სწორედ "ტორპედო" ახერხებდა ამ კონკურენციის თავის სასარგებლოდ გამოყენებას.

არც ის დაგვავიწყდეს, რომ ორჯერ, სულაც ამ გუნდების დაპირისპირებაში (თანაც, ბოლო ტურში) გადაწყდა საქართველოს ჩემპიონობის ბედი: ეს ამბავი პირველად, 2001/02 წლების სეზონში მოხდა, როცა პირთამდე სავსე ქუთაისის სტადიონზე, მალხაზ ასათიანის ერთადერთი გოლით "ტორპედომ" თავისი უპრინციპულესი მეტოქე დაამარცხა და ზედიზედ მესამედ მოიპოვა ოქროს მედლები!

აი, ამის შემდეგ კი ქუთათურებს 15-წლიანი ლოდინი დასჭირდათ, მორიგი საჩემპიონო ტრიუმფით რომ გაეხარათ და ამ შემთხვევაშიც, სწორედ "ტორპედოსა" და "დინამოს" დაპირისპირებას უნდა გამოევლინა საქართველოს 2017 წლის უძლიერესი გუნდის ვინაობა.

თანაც, ამჯერადაც, ბოლო ტურში, ოღონდ, სხვაობა ის იყო, რომ ოქროს მედლების ბედი თბილისში, "დინამო არენაზე" წყდებოდა და როგორ უნდა მომხდარიყო, რომ ასეთ პრინციპულ დაპირისპირებას "ჩვეულებრივი მატჩის" ელფერი ჰქონოდა?

ასეც მოხდა: საკადრო პრობლემებით მოთამაშე "დინამოს" ფრეც აწყობდა მორიგი ტიტულის მოსაპოვებლად, "ტორპედო" კი, მხოლოდ და მხოლოდ, მოგების შემთხვევაში გახდებოდა საქართველოს ჩემპიონი.

კულმინაცია, მეორე ტაიმში იყო: ქუთაისელთა გუნდის უკრაინელმა ლეგიონერმა ვლადიმირ კორობკამ, შეცვლაზე შემოსვლიდან რამდენიმე წამში (!) მარჯვენა ფლანგიდან ზუსტი პასით მოძებნა მეტოქის საჯარიმოში თორნიკე კაპანაძე და ამ უკანასკნელის ზუსტი თავურის შემდეგ, კახა ჩხეტიანის დამოძღვრილი "ტორპედოს" არც არაფერი აშორებდა მეოთხე საჩემპიონო ტიტულამდე.

თუმცა, ეს მხოლოდ კულმინაციის დასაწყისი იყო: ძირითადი დროის დამთავრებას 3 წუთი აკლდა, მასპინძელთა თავკაცმა კახა კაჭარავამ შეცვლაზე მიკოლა კოვტალიუკი რომ შეუშვა.

ჰოდა, სწორედ უკრაინელი ლეგიონერი მოექცა სულ მალე ყურადღების ეპიცენტრში: მეტოქის საჯარიმოში მიკოლა კოვტალიუკის წაქცევას ... "ტორპედოს" კარში დანიშნული პენალტი მოჰყვა!

ისე, დღემდე გვიჭირს იმის თქმა, იყო თუ არა ეს პენალტი 100-პროცენტიანი: როგორი საქმეა, მატჩის ძირითადი დრო ამოწურულია, გაიტანს "დინამო" პენალტს და ჩემპიონი ხდება, წინააღმდეგ შემთხვევაში კი ქუთაისელებმა უნდა იზეიმონ და ასეთ ვითრებაში მართლაც როგორი საქმეა პენალტის დანიშვნა...

...წინა სეზონის ბოლოს და საჩემპიონო მატჩის მიწურულს, რა და როგორ მოხდა, ალბათ, შეხსენებაც არ სჭირდება ქართველ გულშემატკივარს: ორი კაპიტნის, ოთარ კიტეიშვილისა ("დინამო") და როინ კვასხვაძის ("ტორპედო") საპენალტო დუელი, ქუთაისელთა გუნდის კაპიტნის გამარჯვებით დასრულდა! ეს კი იმას ნიშნავდა, რომ "ტორპედო" საქართველოს ჩემპიონი გახდა...

...დაბოლოს, ძველი მეტოქეების სადღეისო სატურნირო მდგომარეობაზეც: სამი ტურის შემდეგ, ორივე გუნდს თითქმის იდენტური მაჩვენებელი აქვს (ქულაც, მოგებაც, წაგებაც, ბურთების სხვაობაც) და ერთადერთი, მხოლოდ მეტი გატანილი ბურთით სჯაბნის "დინამო" თავის ყველაზე პრინციპულ მოწინააღმდეგეს.

სამტრედია-კოლხეთი
01.04. თბილისი. მიხეილ მესხი. 19:00
37: +12 =9 -16, 44-55

ამ გუნდებს ბოლო წლებში აბსოლუტურად განსხვავებული მიზნები აქვთ: უკანასკნელი 3 სეზონის განმავლობაში, "სამტრედიამ" სამივე სინჯის მედალი მოიპოვა, მაშინ, როცა "კოლხეთის" პროგრამა-მაქსიმუმი თუ მინიმუმი, მხოლოდ და მხოლოდ, უმაღლეს ლიგაში ადგილის შენარჩუნება იყო. თუმცა, ურთიერთდაპირისპირებათა ისტორიაში "კოლხეთი" მაინც ინარჩუნებს უპირატესობას, თუმცა ფოთელებმა "სამტრედიას" უკანასკნელად 2011 წელს მოუგეს.

...ისტორიიდან დღევანდელობას დავუბრუნდეთ და ისიც ვთქვათ, რომ, წარმატებული სტარტის შემდეგ, ბევრისთვის მოულოდნელად, "სამტრედიამ" ზედიზედ ორი მატჩი წააგო; განსაკუთრებით მტკივნეული კი, რაღა თქმა უნდა, წინა ტურში "დინამოსთან" დამარცხება იყო, სადაც აშკარად არაოპტიმალური შემადგენლობით მოასპარეზე "სამტრედია" ნამეტნავად უსუსურად გამოიყურებოდა.

თუმცა, დარწმუნებული ვართ, რომ იმერული კლუბის ახალგაზრდა თავკაცი უჩა სოსიაშვილი ჩემპიონატში გამოცხადებულ შესვენებასაც მაქსიმალურად ნაყოფიერად გამოიყენებდა და "სამტრედიას" უმთავრესი პრობლემის (ახალწვეულების ერთმანეთთან შეთამაშება) გადაჭრასაც, სავარაუდოდ, მალე უნდა ველოდოთ.

თ მ ფ წ ბ ქ
1. საბურთალო 3 3 0 0 9-2 9
2. ჩიხურა 3 2 1 0 8-2 7
3. დინამო (თბ) 3 2 0 1 8-4 6
4. ტორპედო 3 2 0 1 7-3 6
5. დილა 3 1 1 1 4-5 4
6. სიონი 3 1 1 1 2-3 4
7. რუსთავი 3 1 0 2 2-3 3
8. სამტრედია 3 1 0 2 3-5 3
9. კოლხეთი 3 0 1 2 2-10 1
10. ლოკომოტივი 3 0 0 3 2-10 0

ყოველდღიური სპორტული გაზეთი "ლელო"
550
მკითხველის კომენტარები / 0 /
მსგავსი ამბები
რუბრიკის სხვა სიახლეები