ეროვნული ლიგა. IV ტური: 'ლოკომოტივმა' პირველი ქულა აიღო

ლოკომოტივი 1:1 ჩიხურა

31.03. თბილისი. მიხეილ მესხი (სათ)
1:0 ვ. არველაძე (31), 1:1 დ. ჩიხლაძე (80)

ლოკომოტივი (4-2-3-1): თევდორაძე - გაბაძე, ნ. ჭანტურია, ცნობილაძე, კომახიძე - შონია, გვალია - ღონღაძე, არველაძე (62. ლობჟანიძე), დავითაშვილი (67. რ. ჭანტურია) - გავაშელიშვილი (79. ჯიქია).

სათადარიგოები: ანდრონიკაშვილი, ხიდეშელი, კიკაბიძე, შეროზია
მწვრთნელი: ლაშა ჭაღიაშვილი

ჩიხურა (4-2-3-1): ჰამზიჩი - კაშია, მირცხულავა, მათიაშვილი, მეგრელიშვილი - კაკუბავა (11. დობროვოლსკი/64. ჩიხლაძე), ჩიკვაიძე - ბუღრიძე, მარკოზაშვილი, გაბედავა - ბუხაიძე (64. იონანიძე).

სათადარიგოები: ჩიტეიშვილი, ცერცვაძე, კახაბრიშვილი, მწყერაშვილი
მწვრთნელი: სოსო ფრუიძე

გაფრთხილება: კაკუბავა (8), გაბაძე (23), გაბაძე (24), ბუღრიძე (25), მაისაშვილი (33), ღონღაძე (41), მირცხულავა (52), არველაძე (59), მარკოზაშვილი (64), თევდორაძე (71), ჩიხლაძე (74)

გაძევება: გაბაძე (24. ლოკომოტივი)
არბიტრი: გ. კიკაჩეიშვილი

უმცირესობის მიუხედავად...

ძალიან წარუმატებელი გამოდგა საიუბილეო ჩემპიონატის სტარტი "ლოკომოტივისთვის": ახალი მწვრთნელის, ლაშა ჭაღიაშვილის ხელმძღვანელობით მოასპარეზე გუნდი ხომ ერთადერთი იყო ამ ტურამდე, სამივე მატჩი რომ წააგო. და აი, პირველი ქულაც, თანაც, აბსოლუტურად დამსახურებული.

იმის მიუხედავად, რომ "ლოკომოტივმა", ფაქტობრივად, ტაიმ-ნახევარი რიცხობრივ უმცირესობაში გაატარა, მაინც შეძლო წყვილის ფავორიტად მიჩნეულ "ჩიხურასთან" სასურველი შედეგის მიღწევა.

ისე, ნურც იმას დავივიწყებთ, თუ რა გუნდებთან მოუწია "ლოკომოტივს" სასტარტო 4 მატჩის ჩატარებამ: ჩემპიონთან, ვერცხლისა და ბრინჯაოს პრიზიორებთან და აგერ, თასის მფლობელთანაც...

ზეპრინციპული კიკაჩეიშვილი

ქუთაისელ არბიტრ გიორგი კიკაჩეიშვილს, ახალგაზრდული ასაკის (26 წლის) მიუხედავად, უკვე საკმარისი გამოცდილება დაუგროვდა. უმაღლეს ლიგაში სულაც 20 წლისას (!) ჰქონდა დებიუტი...

ამ მატჩში მას მართლაც რომ არავისთვის "დაუნანებია" ყვითელი ბარათები: 11 გაფრთხილება და ერთი გაძევება ნამდვილად არ არის ცოტა, თუმცა, ვინც თამაშს დაესწრო, ალბათ, ყველა დაგვეთანხმება, რომ არბიტრის, ფაქტობრივად, ყველა გადაწყვეტილება სამართლიანი იყო, ისევე, როგორც სამართლიანი იყო მასპინძელთა რიცხობრივ უმცირესობაში დარჩენაც - "ლოკომოტივის" ახალგაზრდა მარჯვენა მცველმა გიორგი გაბაძემ, ერთწუთიან მონაკვეთში, თითქმის ერთსა და იმავე ადგილას, ორჯერ ითამაშა ძალიან უხეშად ჯერ გიორგი გაბედავას, შემდეგ კი დავით მეგრელიშვილის წინააღმდეგ. შესაბამისად, მისი წითელი ბარათიც არავის გაუპროტესტებია...

მასპინძელთა ტაიმი და არველაძის პირველი...

ამ გაძევებამ მოედანზე არსებული სურათი დიდად არ შეცვალა: "ლოკომოტივი" მანამდეც უფრო აქტიურად გამოიყურებოდა მეტოქესთან შედარებით და არც ამის მერე ჩამჯდარა დაცვაში.

ამასთან, ეფექტიანი გამოდგა გაძევების გამო მომხდარი გადაადგილებებიც - თემურ ღონღაძემ თავისთვის ჩვეულ პოზიციაზე, დაცვის მარჯვენა ფლანგზე გადაინაცვლა, მანამდე გამოკვეთილ ცენტრფორვარდად მოქმედი მამია გავაშელიშვილი მარჯვენა შემტევად მოგვევლინა, ხოლო ცენტრალური თავდამსხმელის პოზიციაზე ვატო არველაძე გამწესდა.

სწორედ ამ უკანასკნელმა გახსნა კიდეც ანგარიში: სტუმართა კარის მიმართულებით დანიშნული "სტანდარტული" ზუკა დავითაშვილმა შეასრულა, რასაც მასპინძელთა კაპიტნის, ნიკა ჭანტურიას თავური მოჰყვა - ბურთი "ჩიხურას" კარის ძელს მოხვდა, დამატებაზე კი ყველას არველაძემ დაასწრო და ახალ სეზონში პირველი გოლი გაიტანა.

პირველ ტაიმში მასპინძლებს მეტი ხიფათი არც შეუქმნიათ, თუმცა არც "ჩიხურას" ჰქონია ბევრი მომენტი. ერთ ეპიზოდში გაბედავა აღმოჩნდა ხელსაყრელ პოზიციაზე, მეორედ კი ირაკლი ბუღრიძის ეფექტური დარტყმა ვიხილეთ - ორივე შემთხვევაში, სტუმართა შემტევებს სიზუსტე დააკლდათ...

ისევ შეცვლები, ისევ ჩიხლაძე...

სიტუაცია არც შესვენების შემდეგ შეცვლილა და ამის გამოც იყო, რომ "ჩიხურას" გამოცდილმა მწვრთნელმა სოსო ფრუიძემ, წინა ტურის მსგავსად, შეცვლაზე ამჯერადაც ორი ახალგაზრდა ახალწვეული - დემურ ჩიხლაძე და დავით იონანიძე შეიყვანა.

შეგახსენებთ, რომ წინა ტურში სწორედ ამ ორმა ფეხბურთელმა გადაწყვიტა მატჩის ბედი, როცა "რუსთავთან" დაპირისპირების ბოლო წუთზე იონანიძემ ჩიხლაძის პასით იმ შეხვედრის ერთადერთი გოლი გაიტანა...

ამჯერად კი უკვე ჩიხლაძემ გამოიჩინა თავი, როცა საჯარიმოს მისადგომებიდან არცთუ ძლიერი დარტყმით თავის გუნდს ქულა მოუტანა. ისე, ამ ეპიზოდში მცირე რიკოშეტიც იყო: დარტყმის შემდეგ ბურთი მასპინძელთა მცველს მოხვდა ფეხზე, მიმართულება შეიცვალა და "ლოკომოტივის" მეკარე რევაზ თევდორაძე უძლური აღმოჩნდა...

მატჩის გმირი

მასპინძელთა გამოცდილი მეკარე გაშვებულ გოლში დამნაშავე რომ არ იყო, უკვე აღვნიშნეთ. ეგ კი არა, სწორედ რევაზ თევდორაძის უდიდესი დამსახურებაა, "ლოკომოტივმა" პირველი ქულა რომ მოიპოვა ახალ სეზონში - თევდორაძემ არაერთ სხვა ეპიზოდშიც გადაარჩინა თავისი გუნდი, თუმცა მთავარი გმირობა მაინც შეხვედრის მიწურულს ჩაიდინა, როცა ირაკლი ბუღრიძის შესანიშნავი პასით თეიმურაზ მარკოზაშვილი თევდორაძესთან პირისპირ დარჩა, მაგრამ დუელში გამარჯვებული მეკარე გამოვიდა!

ეს კიდევ არაფერი - სტუმართა შეტევა ისევ გაგრძელდა და იონანიძე ახლო მანძილიდან ცდილობდა ზედიზედ მეორე მატჩში გოლის გატანას, მაგრამ კვლავ თევდორაძემ იყოჩაღა და რიკოშეტირებული ბურთი თავგანწირული ნახტომით "ცხრიანიდან" ჩამოხსნა.

ამ ეპიზოდში თევდორაძემ ტრავმაც მიიღო - ხარიხას შეეჯახა, მაგრამ მაინც შეძლო თამაშის გაგრძელება - მასპინძლებს ხომ სამივე შეცვლა უკვე გაკეთებული ჰქონდათ...

ყოველდღიური სპორტული გაზეთი "ლელო"
834
მკითხველის კომენტარები / 0 /
მსგავსი ამბები
რუბრიკის სხვა სიახლეები
;