ეროვნული ლიგა. IX ტური.'რუსთავი' 1:0 'ლოკომოტივი': თბილისელები შემადგენლობის ძიებაში

"რუსთავი:" 1:0 "ლოკომოტივი"

2.05. თბილისი. მიხეილ მესხი
1:0 მიქელთაძე (4. მაქაცარიას პასით)
რუსთავი (4-2-3-1): რევიშვილი - გეგეჭკორი, ცხოვრებოვი, კობახიძე, ცარიკაევი - ცინცაძე, გაბულოვი - ციცქიშვილი (55. ფონიავა), ხადარცევი (74. კვირკვია), მიქელთაძე - მაქაცარია (86. მარცვალაძე)

სათადარიგოები: სეფიაშვილი, სილაგაძე, ბ. ქავთარაძე, კვირკველია
მწვრთნელი: ვლადიმირ გაზაევი

ლოკომოტივი (4-2-3-1): თევდორაძე - გაბაძე (23. არველაძე), ნ. ჭანტურია, ლობჟანიძე, უბილავა - სამურკასოვი (74. ჯიქია), გვალია - ღონღაძე, შონია (78. ძებნიაური), გავაშელიშვილი - რ. ჭანტურია

სათადარიგოები: შეროზია, ლ. ქურდაძე, კიკნაძე, ცნობილაძე
მწვრთნელი: ლაშა ჭაღიაშვილი

გაფრთხილება: გაბაძე (23), სამურკასოვი (69)

არბიტრი: ბ. ნინუა

თბილისის "ლოკომოტივი" სატურნირო ცხრილის ფსკერზეა და ეტყობა, გუნდის მთავარი მწვრთნელი ლაშა ჭაღიაშვილი ჯერაც ოპტიმალური შემადგენლობის ძიებაშია.

"რუსთავთან" მატჩისთვის მან რამდენიმე ცვლილება განახორციელა. თვალშისაცემი იყო გუნდის ერთ-ერთი სახის, ვატო არველაძის ხილვა სათადარიგოთა შორის.

სასტარტოში იყო ლაშა გვალია, თემურ შონია კი არა საყრდენად, არამედ, შემტევ ნახევარმცველად ვიხილეთ. თუმცა თამაშის მსვლელობამ ჭაღიაშვილს არველაძის საჭიროება დაანახა და ის მოედანზე პირველივე ტაიმში გამოჩნდა...

მატჩი მოულოდნელად დაიწყო. ჯერ გუნდები მოთელილებიც არ იყვნენ, როცა ანგარიში გაიხსნა. მე-4 წუთზე, ბათრაზ ხადარცევმა მშვენიერი გადაცემით საჯარიმოში დაცვა "მოჭრა", თამაზ მაქაცარიამ დარტყმას თავისუფალ პოზიციაზე გახსნილი ბექა მიქელთაძისთვის გადაცემა ამჯობინა, რომელმაც ზუსტად დაარტყა - 1:0.

ეს იდეალური სცენარი იყო გაზაევის გაწვრთნილებისთვის, რომელთაც თავი კონტრშეტევების გუნდად წარმოაჩინეს. ასეც მოხდა - შეხვედრა რუსთაველებისთვის სასურველ კალაპოტში გადავიდა...

ზემოთ ვატო არველაძე ვახსენეთ. სადაც ეს ბიჭია, იქვეა ხიფათიც, არაორდინარულობაც და შეტევების გამწვავებაც. ვერ ვიტყვით, რომ ვატომ კარიერაში საუკეთესო თამაში ჩაატარა, მაგრამ "ლოკომოტივს" მოედანზე მისი შესვლა ოდნავ, მაგრამ მაინც დაეტყო. ყოველ შემთხვევაში, ის ცდილობდა, რომ ეს დუნე თამაში ოდნავ მაინც გამოეცოცხლებინა.

მოედანზე ახალი შესული იყო, როცა ბურთი ძელს მოარტყა, მეორე ტაიმშიც აქტიურობდა და რუსთავულ გუნდს მისი ქმედებები ანერვიულებდა.

შესვენების შემდეგ თბილისელები კი უტევდნენ, თუმცა "რუსთავის" დაცვას ვერაფერი დააკლეს - მარტოკაცი კი ფეხბურთშიც ცოდვაა. არველაძის თანაგუნდელებს შორის არავინ აღმოჩნდა, ვინც მასსავით მწვავედ ითამაშებდა და თამაშს საკუთარ თავზე აიღებდა. სხვაგვარად კი გოლი არ გადის და საბოლოოდ, ეს შეხვედრა ისე დასრულდა, როგორც სტუმრებს სურდათ.

ყოველდღიური სპორტული გაზეთი "ლელო"
908
მკითხველის კომენტარები / 0 /
მსგავსი ამბები
რუბრიკის სხვა სიახლეები
;