ეროვნული ლიგა. V ტური: თბილისურ დერბიში აუტსაიდერმა ლიდერი დასცა [VIDEO]

საბურთალო 1:2 ლოკომოტივი

04.04. თბილისი. მიხეილ მესხი

0:1 არველაძე (57), 0:2 გავაშელიშვილი (72), 1:2 რეხვიაშვილი (90+4)

საბურთალო (4-1-2-3): ლ. კუპატაძე - ჩაბრაძე, მარგველაშვილი, რეხვიაშვილი, ლაკვეხელიანი - თარხნიშვილი (65. გვარაძე) - გორგიაშვილი, დიასამიძე - ვოლკოვი (59. გოშთელიანი), ტატანაშვილი (46. კოხრეიძე), ვაგნერი.

სათადარიგოები: ქურდაძე, მამუჩაშვილი, ნადარაია, ტერა
მწვრთნელი: გიორგი ჭიაბრიშვილი

ლოკომოტივი (4-2-3-1): თევდორაძე - ღონღაძე, ნ. ჭანტურია, ლობჟანიძე, კომახიძე - გვალია, შონია (26. ძებნიაური) - ჯიქია (68. რ. ჭანტურია), დავითაშვილი, გავაშელიშვილი - არველაძე (84. ხიდეშელი).

სათადარიგოები: შეროზია, ქურდაძე, კიკაბიძე, ო. კობახიძე
გაფრთხილება: დავითაშვილი (68)

არბიტრი: ბ. ნინუა

თბილისის "ლოკომოტივმა" გვარიანი სენსაცია შემოგვთავაზა და აქამდე უდანაკარგო "საბურთალოს" დედაქალაქურ დერბიში მტკივნეული მარცხი აგემა.

ლაშა ჭაღიაშვილის გაწვრთნილი გუნდის შემადგენლობაში ანგარიში 57-ე წუთზე ვატო არველაძემ გახსნა გოლი-შედევრით. 72-ე წუთზე მამია გავაშელიშვილს თავის გამოჩენაში მცირე რიკოშეტი დაეხმარა.

"საბურთალომ" პრესტიჟის გოლი შეხვედრის ბოლოს, 94-ე წუთზე შეაგდო. გიორგი რეხვიაშვილმა კი იზეიმა, თუმცა გოლში "ლოკომოტივის" ფეხბურთელის წვლილიც იყო...

დედაქალაქური დერბის მონაწილენი მიმდინარე სეზონში სხვადასხვა ამოცანებს წყვეტენ. თუ "საბურთალო" თავისი პირველი საჩემპიონო ტიტულისკენ მიილტვის, "ლოკომოტივის" მიზნად უძლიერესთა შორის ადგილის შენარჩუნება მოჩანს.

სწორედ ამიტომ იყო, პირველი წუთიდანვე გიორგი ჭიაბრიშვილის გუნდმა თავიდანვე ტერიტორიული უპირატესობა რომ მოიპოვა და მოწინააღმდეგის ნახევარზე დამკვიდრდა. ერთ-ერთ ეპიზოდში მასპინძლებს გატანაც შეეძლოთ, მაგრამ აშკარა საგოლე მომენტი ვერ გამოიყენეს.

მე-20 წუთისთვის "საბურთალოს" ანგარიშის გახსნა მართებდა. ჯერ ვაგნერ გონსალვესის პასის შემდეგ მეკარემ არ გაატანინა გეგა დიასამიძეს, მერე კი, იმავე შეტევაში, თორნიკე გორგიაშვილს აუცდა დარტყმული.

შემდეგ იყო ეპიზოდი, როცა დავით ვოლკოვს რევაზ თევდორაძემ აუღო, დამატებულზე კი ისევ გორგიაშვილს დააკლდა სიზუსტე. "ლოკომოტივის" მდგომარეობა კიდევ უფრო დამძიმდა მას შემდეგ, რაც ტრავმის გამო მოედანი დატოვა გუნდის ერთ-ერთმა ლიდერმა, თემურ შონიამ.

პირველი გასროლა

ტაიმის ბოლოს "ლოკომოტივმა" კინაღამ დასაჯა არაერთი სახიფათო მომენტის გამნიავებელი მოწინააღმდეგე. ჯერ "ისე რა" შანსი ჰქონდა ზურაბ დავითაშვილს, მერე კი - მართლა გასატანი. "რკინიგზელთა" ახალგაზრდა შემტევმა მასპინძელი ფეხბურთელების უყურადღებობის შემდეგ მოიხელთა ბურთი და ხარიხა შეაზანზარა.

ზოგადად, პირველი ტაიმის მეორე ნახევარში "ლოკომოტივი" უფრო გამოცოცხლდა და საბურთალოელთა უპირატესობა თანდათან გაქრა.

არველაძის შედევრი

57-ე წუთზე ნამდვილი შედევრი ვიხილეთ - ვატო არველაძემ დიდოსტატურად მოატყუა რამდენიმე მოწინააღმდეგე და გამოზომილი დარტყმით აიღო "საბურთალოს" კარი. ამ გოლის თავიდან ბოლომდე აღწერა ძალიან გაჭირდება, რადგან მაინც რაღაც დააკლდება. ეს იყო ისეთი გოლი, რომელიც აუცილებლად უნდა ნახოთ!

რაღა შეხსენება გჭირდებათ, მაგრამ მაინც - ვატო არველაძე რევაზ არველაძის ვაჟი და შოთა და არჩილ არველაძეების ძმისშვილია. კვიცი გვარზე ხტისო, სწორედ ამაზე იტყვიან. ვატომ მომავალშიც კიდევ არაერთხელ უნდა გაგვახაროს - ამის რესურსი აშკარად აქვს.

რა თქმა უნდა, "საბურთალომ" ვითარების შეცვლა სცადა. ჭიაბრიშვილმა ცვლილებებსაც მიმართა. ძალიან საიმედოდ თამაშობდა მეკარე თევდორაძე.

"ლოკომოტივმა" კი ამასობაში მეორეც გაიტანა. საბურთალოელებმა დაცვაში შეცდომა დაუშვეს, გაგი მარგველაშვილმა კარგად ვერ ამოიტანა ბურთი, გავაშელიშვილმა კი ძლიერად დასცხო - ბურთი გიორგი რეხვიაშვილს მოხვდა და კარში აღმოჩნდა.

მატჩის ბოლოსწინა საგოლე ეპიზოდი "საბურთალოსი" იყო - ვაგნერის დარტყმას დიდებულად მოთამაშე თევდორაძე ადგილზე დაუხვდა. ბოლოს ლიდერმა მაინც შეაგდო - ტრიბუნიდან ისე ჩანდა, თითქოს გოლი საკუთარ კარში ერთ-ერთმა ლოკომოტიველმა გაიტანა, თუმცა გოლი რეხვიაშვილს ჩაეთვალა.

ყოველდღიური სპორტული გაზეთი "ლელო"
966
მკითხველის კომენტარები / 1 /
სოსო
0
შეურცხვათ ცხვირები ძმებ არველაძეებს,სამ ძმას ერთზე მეტი ფეხბურთელი ბიჭი არ უნდა ჰყავდეთ?მათთან ერთად ,ესეც გაცილებით უკეთესი გაიზრდებოდა.
მსგავსი ამბები
რუბრიკის სხვა სიახლეები
;