ეროვნული ლიგა. V ტური: იღბლიანი გასროლა 'ტორპედოსთვის' [VIDEO]

ტორპედო 1:0 სამტრედია

05.04. ქუთაისი. რამაზ შენგელია
1:0 ტუღუში (70. კუტალიას პასით)

ტორპედო (4-2-3-1): კვასხვაძე - ტაბატაძე, ხურცილავა, გურული, ქიმაძე - გიგაური, კუხიანიძე (89. მამასახლისი) - დოლიძე (80. წიქარიძე), ლიპარტია (46. ბოხაშვილი), ტუღუში - კუტალია.

სათადარიგოები: ქვილითაია, ჭიჭინაძე, სარდალიშვილი, წიქარიძე, გრიგალაშვილი
მწვრთნელი: კახა ჩხეტიანი

სამტრედია (4-2-3-1): მიგინეიშვილი - ჩაჩუა, ფატიჩი, ქარქუზაშვილი, ბაჩიაშვილი - დაუშვილი, ახალაძე (75. მესიაჩენკო) - კერძევაძე, ერისთავი (66. ვეილი), კირკიტაძე (82. ოლხოვი) - გიი.

სათადარიგოები: სტურუა, გიორბელიძე, მანჯგალაძე, სანია
მწვრთნელი: უჩა სოსიაშვილი

გაფრთხილება: ფატიჩი (1), დოლიძე (2), ხურცილავა (18), ჩაჩუა (74)

არბიტრი: გ. ვადაჭკორია

მთავარი მწვრთნელის გარეშე...

სამტრედიელთა დამრიგებელი უჩა სოსიაშვილი იმერულ დერბის ტრიბუნებიდან ადევნებდა თვალს, არადა, მატჩის ოქმში ის კვლავაც მთავარ მწვრთნელად იყო მოხსენიებული. გუნდს კი ამ შეხვედრაში მისი ასისტენტები მოძღვრავდნენ. კლუბის ოფიციოზი ამასთან დაკავშირებით კომენტარს ჯერ არ აკეთებს...

ბოლო ადგილზე მყოფმა "სამტრედიამ" "ტორპედოსთან" მატჩში ბოლომდე იბრძოლა, მაგრამ ზედიზედ მეოთხე მარცხს ვერ გადაურჩა. კახა ჩხეტიანის გუნდმა კი მარცხიანი ქართული "კლასიკოს" შემდეგ მეზობლების დამარცხებით ხასიათიც გამოიკეთა და სატურნირო მდგომარეობაც.

აქტიური მასპინძლები და სამტრედიელთა შანსი

პირველი ნახევარი არცთუ ისე კარგი სანახავი გამოდგა. თამაში ქუთაისელთა დომინირებით მიმდინარეობდა. ჩხეტიანის შეგირდები ბურთს აკონტროლებდნენ, მაგრამ პირველ ტაიმში რეალური საგოლე მომენტების შექმნას ვერ ახერხებდნენ.

თავიდან ისინი შორეული დარტყმებით ცდილობდნენ მეტოქის დამწუხრებას, მაგრამ ომარ მიგინეიშვილი უშეცდომოდ თამაშობდა. შემდეგ კომბინაციური ფეხბურთით, მოკლე გადაცემებით სცადეს მეტოქის დაცვის ხაზის გარღვევა, მაგრამ აქედანაც არაფერი გამოვიდა.

ლევან კუტალია, რომელიც თორნიკე კაპანაძის არყოფნაში ცენტრფორვარდის ფუნქციებს ასრულებდა, ორჯერ იყო ახლოს მიზანთან, მაგრამ პირველ ეპიზოდში მცველმა დაასწრო, მეორე მცდელობა კი არაზუსტი დარტყმით დასრულდა.

მარჯვენა ფლანგზე ტრადიციულად აქტიური იყო გრიგოლ დოლიძე, რომელიც გუშინ "ტორპედოს" რიგებში 150-ე შეხვედრას ატარებდა. თუმცა ფლანგებზე მეტად ქუთაისელები მოედნის ცენტრიდან ცდილობდნენ შეტევების განვითარებას.

სამტრედიელებმა თავიდანვე "მეორე ნომრად" არჩიეს თამაში. ისინი მეტ ყურადღებას დაცვას უთმობდნენ და კონტრშეტევებით ცდილობდნენ "ტორპედოსთვის" დისკომფორტის შექმნას.

გიორგი ერისთავი და დავით კირკიტაძე სწრაფად გადადიოდნენ კონტრიერიშებზე. 33-ე წუთზე სამტრედიელთა ყველაზე სახიფათო მომენტი სწორედ კირკიტაძის აქტიურობას მოჰყვა - მარჯვენა ფლანგიდან მისი გამჭოლი გადაცემის შემდეგ "ტორპედოს" გამოცდილმა მცველმა დავით ხურცილავამ ბურთი კინაღამ საკუთარ კარში ჩაჭრა...

გადარჩენის მცდელობა

ბოლო წუთებზე სამტრედიელები მთელი ძალებით გადავიდნენ შეტევაზე და ქულის გადარჩენა სცადეს. ახლოსაც იყვნენ მიზანთანაც - ფლანგური ჩაწოდების შემდეგ ქუთაისელ მცველებს საჯარიმოში მურთაზ დაუშვილი გამოეპარათ, მაგრამ გამოცდილმა ფეხბურთელმა ხეირიანად ვერ დაარტყა, თორემ გოლი გარდაუვალი იქნებოდა.

"სამტრედიამ" ქულის გადარჩენა ვერ მოახერხა, ზედიზედ მეოთხე შეხვედრა წააგო და 5 ტურის შემდეგ ბოლო ადგილზეა. "ტორპედო" კი ამ მოგებით ლიდერთა სამეულს მიუახლოვდა.

მატჩის გმირი

მეორე ტაიმში ჩხეტიანმა ჯაბა ლიპარტიას ნაცვლად თამაშში ევგენი ბოხაშვილი ჩართო, რომელმაც ცენტრფორვარდის პოზიციაზე დაიკავა ადგილი, კუტალიამ მარცხნივ გადაინაცვლა, ბექა ტუღუში კი მეორე ტაიმში უფრო სიღრმიდან უტევდა სტუმართა კარს. მატჩის გმირადაც ის მოგვევლინა...

ქუთაისელები მწვავედ უტევდნენ, მაგრამ გოლის გატანა უჭირდათ, 70-ე წუთზე სტუმართა საჯარიმოში ქუთაისელებს რიცხობრივი უპირატესობა შეექმნათ, რითიც მასპინძლებმა კარგად ისარგებლეს - კუტალიამ მცველებისგან უყურადღებოდ მიტოვებული ტუღუში მოძებნა და ამანაც ზუსტი დარტყმით მოქმედი ჩემპიონი წინ გაიყვანა.

ტუღუში სხვა ეპიზოდებშიც კარგად ირჯებოდა. გოლიდან ცოტა ხანში მან კუტალია კარგი პასით დატოვა კარის წინ, მაგრამ კუტალიას დარტყმის შემდეგ ბურთი ჯერ ხარიხას მოხვდა, ხოლო შემდეგ კარის ხაზზე დაეცა. საბოლოოდ, მისი გოლი "ტორპედოსთვის" 3 ქულის მომტანი აღმოჩნდა.

ყოველდღიური სპორტული გაზეთი "ლელო"
914
მკითხველის კომენტარები / 0 /
მსგავსი ამბები
რუბრიკის სხვა სიახლეები
;