ეროვნული ლიგა. V ტური: სწრაფი, აგრესიული და თანამედროვე 'დილა' [VIDEO]

კოლხეთი 0:3 დილა

05.04 ზესტაფონი. დავით აბაშიძე
0:1 ფორტესი (56), 0:2 კოვტალიუკი (64) 0:3 კვახაძე (72)

კოლხეთი (3-4-2-1): პოლტავცევი - მახარაძე, გოგონაია, პონომარიოვი - კაბორე, დანილოვი, არზიანი (79. ტყემალაძე), კილასონია - გოგბერაშვილი (69. ჩუბითიძე), კაკულია, მიხაილოვი.

სათადარიგოები: გურგენიძე, ჯიმშელეიშვილი, ჭეიშვილი
მწვრთნელი: ნუგზარ მთვარაძე

დილა (4-2-3-1): ბეგაშვილი - მაჩაიძე, კვახაძე, ჩადუნელი, სუხიაშვილი - ლემპტი (68. ნონდი), რაზმაძე - ფორტესი, ქავთარაძე (78. რაჟამაშვილი), რიბეირო (74. ნონიკაშვილი) - კოვტალიუკი.

სათადარიგოები: გორდულავა, გოგიაშვილი, აშორტია, ფანცულაია
მწვრთნელი: გიორგი დარასელია

გაფრთხილება: პონომარიოვი (51), რიბეირო (55)

არბიტრი: ა. ნონიკაშვილი

გორის "დილამ" ზესტაფონში უშანსოდ მოუგო ფოთის "კოლხეთს". გიორგი დარასელიას გაწვრთნილი გუნდი ყველა კომპონენტში სჯობდა მოწინააღმდეგეს და თამამად შეიძლება ითქვას, რომ თამაშის შედეგი აბსოლუტურად კანონზომიერია....

შეტევა ფლანგებიდან

"დილამ" ამ მატჩში ერთობ თანამედროვე ფეხბურთი ითამაშა. არ ვიცით, გიორგი დარასელიას წინასამატჩო მითითება იყო, თუ სათამაშო სიტუაციამ მოიტანა ასე, მაგრამ ფაქტია - გორელებმა მოწინააღმდეგეს უამრავი პრობლემა შეუქმნეს, განსაკუთრებით ფლანგებიდან, სადაც ზეაქტიურები იყვნენ ბრაზილიელი და ჰოლანდიელი ლეგიონერები - ლეანდრო რიბეირო და ალვინ ფორტესი.

განსაკუთრებით რიბეიროს გარჯა უნდა გამოვარჩიოთ. ისრაელიდან გორის "დილაში" დაბრუნებული გარემარბი გუშინ აკეთებდა ყველაფერს, რაც სურდა. ფოთელეთა მცველებმა მასთან ბრძოლას დიდი ენერგია შეალიეს, თუმცა - უშედეგოდ. გორელთა შემტევებს პირველ ტაიმში სიზუსტე აკლდათ, ამის გამო იყო, საწყის 45 წუთში ანგარიში რომ არ გაიხსნა. არადა, მომენტი იმდენი შეიქმნა, ბარე ორ თამაშს ეყოფოდა.

...მაგრამ კინაღამ ამოქმედდა დაუწერელი საფეხბურთო კანონი - "ვერ გაიტან, გაგიტანენ". პირველი ტაიმის დასრულებას ბევრი აღარაფერი აკლდა, როცა ილია მიხაილოვს ასპროცენტიანი საგოლე მომენტი შეექმნა და, ალბათ, თავადაც არ იცის, როგორ ვერ მოახერხა თავურით გიორგი ბეგაშვილის კარის აღება. რუსი შემტევი ისეთი სიტუაციიდან ურტყამდა, საიდანაც აცილებაზე ადვილი გატანა იყო.

დილას ტაიმი

შეუიარაღებელი თვალითაც კარგად ჩანდა, რომ "კოლხეთი" აუცილებლად დაიღლებოდა, რადგან ფოთელები მთელი პირველი ტაიმის განმავლობაში დაცვაში ისხდნენ. თამაშის ასეთი სტილი დიდ ფიზიკურ ენერგიას მოითხოვს, ზღვისპირელები კი ამ კომპონენტში ნამდვილად არ არიან გამორჩეულები. მართლაც, მეორე ნახევარში მინდორზე მხოლოდ ერთი გუნდი თამაშობდა.

ანგარიში მატჩის ერთ-ერთმა საუკეთესო ფეხბურთელმა, ალვინ ფორტესმა გახსნა. არნემის "ვიტესის" აღზრდილმა და ჩეხეთის უმაღლეს ლიგაში გამობრძმედილმა "ვინგერმა" ბურთი კარგად დაამუშავა და შორიდან იუველირის სიზუსტით "გაისროლა".

გორელთა სასახელოდ უნდა ითქვას, რომ მათ არ დაუგდიათ ტემპი და მონდომებით გააგრძელეს შეტევები, რაც მალე დაუფასდათ კიდეც. "კოლხეთის" კარი მისმა ყოფილმა ფეხბურთელმა მიკოლა კოვტალიუკმაც აიღო მცველთა მიუტევებელი პასიურობისა თუ უპასუხისმგებლობის წყალობით. "მასპინძელთა" განადგურება კი შეტევაში ჩართულმა ლექსო კვახაძემ დაასრულა.

მატჩის გმირი

მართალია, გოლი არ გაუტანია, მაგრამ მატჩის საუკეთესო მოთამაშედ "დილას" ბრაზილიელი ლეგიონერი ლეანდრო რიბეირო უნდა დავასახელოთ. გორული კლუბი მასთან ერთად და მის გარეშე ორი სხვადასხვა ძალაა. "დილას" შეფობამ აბსოლუტურად სწორი ნაბიჯი გადადგა, როცა რიბეირო ისრაელიდან საქართველოში დააბრუნა.

გადაუჭარბებლად შეიძლება იმის თქმა, რომ დღეს ჩვენს პირველობაზე რიბეირო ერთ-ერთი საუკეთესო ლეგიონერია. რაც მთავარია, მის გარჯაში იგრძნობა იმის პოტენციალი, რომ კიდევ შეუძლია მომატება.

ზოგადად, სასიამოვნოა, რომ "დილა" სწრაფი და თანამედროვე ფეხბურთის თამაშს ცდილობს, ეს კი, უპირველეს ყოვლისა, ფლანგების სწორად გამოყენების ხარჯზე ხდება.

ყოველდღიური სპორტული გაზეთი "ლელო"
1470
მკითხველის კომენტარები / 0 /
მსგავსი ამბები
რუბრიკის სხვა სიახლეები
;