ეროვნული ლიგა. VI ტური.'საბურთალო' ამბიციას თამაშით ამტკიცებს

საბურთალო-ტორპედო 2:0
22.04. თბილისი. მიხეილ მესხი
1:0 ხურცილავა (38-საკ. კარში), 2:0 გვარაძე (56. ტერას პასით)

საბურთალო (4-2-3-1): კუპატაძე - იაშვილი, მარგველაშვილი, რეხვიაშვილი, ნადარაია - ტერა, მამუჩაშვილი - ვაგნერი (79. თარხნიშვილი), გორგიაშვილი, გვარაძე (70. ვოლკოვი) - კოხრეიძე (89. გოშთელიანი).

სათადარიგოები: ქურდაძე, ლაკვეხელიანი, ტატანაშვილი, დიასამიძე
მწვრთნელი: გიორგი ჭიაბრიშვილი

ტორპედო (4-2-3-1): კვასხვაძე - თორ. გრიგალაშვილი, ხურცილავა, გურული, ქიმაძე - გიგაური (60. ლიპარტია), მამასახლისი - ტაბატაძე (77. წიქარიძე), კუხიანიძე, კუტალია - ბოხაშვილი (60. კუჭუხიძე).

სათადარიგოები: ქვილითაია, ჭიჭინაძე, მეგრელაძე, მახარობლიძე
მწვრთნელი: კახა ჩხეტიანი

გაფრთხილება: გიგაური (54), კუჭუხიძე (67), ნადარაია (81), იაშვილი (84)
არბიტრი: პ. მაჭარაძე

გამოცდა

ჯერ ნაადრევია იმაზე ლაპარაკი, ვინ იბრძოლებს ჩემპიონობისთვის და ვინაა სამეულის ღირსი - 36 ტურიდან მხოლოდ 7 ჩატარდა და არავინ უწყის, დარჩენილ 29 ტურში ვინ რას იზამს. მაგრამ "საბურთალო" რომ წლევანდელი ჩემპიონატის ერთ-ერთი მშვენებაა, ამ შეხვედრამაც დაამტკიცა - თბილისის "დინამოს" შემდეგ, მოქმედი ჩემპიონი ქუთაისის "ტორპედოც" დაამარცხა, რითიც გამოჩნდა, რომ ჩემპიონობისთვის ბრძოლის პოტენციალი აქვს.

საერთოდ, გუნდის ამბიციის ბარომეტრი უხერხულ მეტოქეებთან თამაშია. აქამდე, "საბურთალოს" აქილევსის ქუსლი თბილისის "დინამო" იყო, რომელსაც გასვლაზე ზედიზედ მეორე ოფიციალური შეხვედრა მოუგო. მაგრამ შარშან მასთან გიორგი ჭიაბრიშვილის გუნდმა შედეგები გამოასწორა, ქუთაისის "ტორპედოსთან" კი 4-დან 3 მატჩი წააგო.

საერთოდაც, მოქმედ ჩემპიონთან შეხვედრა ნებისმიერი გუნდის შესაფასებლად კარგი ტესტია - "საბურთალომ" ამ გამოცდასაც გაუძლო.

ქუთაისელთა გასაჭირი

თბილისელებს აშკარად გაუმართლათ: დავით ვოლკოვი (ზედმეტსახელად ვოლკი) თბილისის "დინამოსთან" დაშავდა და წინასწარი ვარაუდით, მძიმე მდგომარეობაში უნდა ყოფილიყო. მაგრამ 22 წლის თავდამსხმელისთვის ყველაფერი კარგად დასრულდა - ის სამატჩო განაცხადშიც იყო და მეორე ტაიმში მოედანზე ნატკენი ფეხით ისეთი რეიდები ჩაატარა, თქვენი მოწონებული!

მასპინძელთა სასარგებლოდ მუშაობდა ის ფაქტიც, რომ "ტორპედოს" რამდენიმე წამყვანი მოთამაშე (რომლებზეც შეტევებია აწყობილი) აკლდა: გრიგოლ დოლიძე, მიხეილ სარდალიშვილი, შოთა ბაბუნაშვილი, ბექა ტუღუში და თორნიკე კაპანაძე. დოლიძე და ტუღუში თამაშისწინა ვარჯიშზე დაშავდნენ.

აქედან გამომდინარეობდა ის, რომ კახა ჩხეტიანმა, მისთვის უჩვეულოდ, დაცვითი სტილის საყრდენი ნახევარმცველები დააყენა - ოლეგ მამასახლისი და მერაბ გიგაური. ორივე კარგი ჩამშლელია, მაგრამ შეტევითი ფუნქციების შესრულება ნაკლებად ეხერხებათ.

თუმცა მხოლოდ მათი ბრალი არ იყო, გუნდს შეტევები რომ არ გამოსდიოდა - მთლიანად "ტორპედო" საკუთარ თავს არ ჰგავდა და ისეთი შთაბეჭდილება იქმნებოდა, ტიტულების "შიმშილმა" გადაუარა.

დაძაბული პირველი ტაიმი დასასრულს უახლოვდებოდა, როცა "საბურთალომ" პირველი სახიფათო მომენტი შექმნა. გიორგი კოხრეიძე საჯარიმოში მშვენიერი რეიდით შეიჭრა, მცველს სამჯერ გასცდა, კარისკენ წავიდა და ძლიერად დაარტყა - როინ კვასკვაძემ სტუმრები გადაარჩინა.

იქვე, ვაგნერ გონსალვესმა კუთხური ჩამოაწოდა და ანგარიში კურიოზული გოლით გაიხსნა: ქუთაისელთა მცველი დავით ხურცილავა გიორგი რეხვიაშვილის შეკავებას ცდილობდა ისე, ბურთს არ უყურებდა, მერე ეს ბურთი სახეში მოხვდა და... კარში აღმოჩნდა - 1:0.

ქუთაისელებს ანგარიშის გათანაბრება შეეძლოთ, მაგრამ ტაიმის ბოლოს ევგენი ბოხაშვილის დარტყმას გაგი მარგველაშვილი გადაეფარა და გუნდი გოლისგან იხსნა.

უშედეგო ვა-ბანკი

მეორე ტაიმი "საბურთალომ" უკეთ ჩაატარა, მომენტებიც მეტოქეზე მეტი შექმნა და 56-ე წუთზე ბექა გვარაძემ, ლამაზი გოლით, "საბურთალოს" უპირატესობა გაზარდა. ელვინ ტერამ ბურთი საჯარიმოსთან დაუგორა ახალგაზრდა შემტევს, რომლის მიერ დაახლოებით 20 მეტრიდან ძლიერად დარტყმული ბადეში გაეხვია - 2:0.

კახა ჩხეტიანს დასაკარგი არაფერი ჰქონდა და შეტევების გასაძლიერებლად ვა-ბანკზე წავიდა. ქუთაისელთა მთავარმა მწვრთნელმა მოედანზე ჯერ ლაშა კუჭუხიძე და ჯაბა ლიპარტია შეუშვა, შემდეგ - თენგიზ წიქარიძე. მაგრამ მათ "ტორპედოს" ვერ უშველეს.

მეტიც: 58-ე წუთზე "საბურთალოს" მესამე გოლის გატანაც შეეძლო: დაუღალავი კოხრეიძე ორ მეტოქეს შორის გაძვრა და კარის წინ ისევ გვარაძე დატოვა, რომელმაც დარტყმას ვაგნერისთვის გადაწოდება ამჯობინა, ეს კი უზუსტოდ მოუვიდა და მშვენიერი შანსი გაანიავა.

72-ე წუთზე ვოლკოვი მარჯვენა ფლანგზე სწრაფად გაიქცა და კარისკენ დაძრული კოხრეიძე შენიშნა, მაგრამ მას მცველმა ხელი შეუშალა და ქუთაისელებს მორიგი საფრთხე ააცილა. ვოლკოვს თავადაც შეეძლო გატანა, როცა საჯარიმოს ხაზიდან დაარტყა და ბურთი კვასხვაძემ დაამიწა.

ამ მოგებით, "საბურთალომ" 18 ქულა დააგროვა, უახლოეს კონკურენტ თბილისის "დინამო" ისევ 3 ქულით ჩამოიტოვა და პირველი ადგილი დაიბრუნდა. რაც მთავარა, ჭიაბრიშვილის გუნდი ისეთ გამართულ და აზრიან ფეხბურთს თამაშობს, საყურებლად ნამდვილად ღირს. "ტორპედოს" კი 9 ქულით ჩემპიონისთვის უჩვეულო მე-6 ადგილი უკავია.

ყოველდღიური სპორტული გაზეთი "ლელო"
784
მკითხველის კომენტარები / 0 /
მსგავსი ამბები
რუბრიკის სხვა სიახლეები
;