ეროვნული ლიგა. VIII ტურის მიმოხილვა: 'ტორპედო' 3:0 'სიონი' - ჩემპიონი ბრუნდება

"ტორპედო" 3:0 "სიონი"

27.04. ქუთაისი. რამაზ შენგელია
1:0 ალ. გუარეშიძე (15-საკ. კარში), 2:0 კუტალია (50. ტაბატაძის პასით), 3:0 წიქარიძე (52)

ტორპედო (4-2-3-1): კვასხვაძე - გრიგალაშვილი (46. ტაბატაძე), ხურცილავა, გურული, ქიმაძე - კუხიანიძე, მამასახლისი - დოლიძე, წიქარიძე (72. ჭიჭინაძე), კუტალია - ლიპარტია (68. კუჭუხიძე).

სათადარიგოები: ქვილითაია, მეგრელაძე, მახარობლიძე, ბოხაშვილი
მწვრთნელი: კახა ჩხეტიანი

სიონი (4-2-3-1): ზარქუა - გიორბელიძე, გურეშიძე, ნოზაძე, გაფრინდაშვილი - ქიქავა, სიხარულია - მიქაბერიძე, კოშკაძე (68. ხმალაძე), მანაგაძე (57. ლეჟავა) - დვალი (68. ბერიაშვილი).

სათადარიგოები: მუჯრიშვილი, თომაშვილი, მინდორაშვილი, უგულავა
მწვრთნელი: კობა ჟორჟიკაშვილი

არბიტრი: ჯ. ხორავა

ზედიზედ ორი მარცხის შემდეგ ქუთაისის "ტორპედოს" სატურნირო მდგომარეობის გამოსწორება მართებდა და ამ ამოცანის პასუხად, ბოლნისის "სიონთან" დიდი აღმაფრენით ითამაშა.

ქუთაისელებს ეროვნული ლიგის დებიუტანტთან ყველაფერი გამოსდიოდათ, შეცდომები მინიმუმამდე ჰქონდათ დაყვანილი, ზედმეტი წნეხის გარეშე თამაშობდნენ და ყოველივე ეს შედეგზეც აისახა, კახა ჩხეტიანის გუნდმა "სიონი" შემტევი და სანახაობრივი ფეხბურთით დაჯაბნა...

უკეთესი ტორპედო

...ქუთაისელებს მონდომება სხვა შეხვედრებშიც არ აკლდათ, მაგრამ მათი თამაში ყოველთვის უკეთესობის სურვილს ტოვებდა, თუნდაც - "ლოკომოტივთან" მოგებულ (4:0) შეხვედრაში...

ბოლნისელებთან მატჩში კი მათი მოქმედებები უფრო გააზრებული და კომბინაციურ ფეხბურთზე იყო დამყარებული. "ტორპედოს" ბურთის ფლობაში დიდი უპირატესობა ჰქონდა. ქუთაისური გუნდი სწრაფ ტემპში და სახიფათოდ უტევდა - როგორც ფლანგებიდან, ისე ცენტრალური ზონიდან.

კარგი მატჩი ჰქონდა თენგიზ წიქარიძეს, რომლის ფლანგურ გადაცემას მოჰყვა სწორედ ქუთაისელთა პირველი გოლი. არადა, თავიდან ისე გამოჩნდა, თითქოს, ბურთი ტორპედოელთა გამოკვეთილმა ფორვარდმა ჯაბა ლიპარტიამ გაიტანა, თუმცა ამ უკანასკნელს სტუმართა მცველმა ალექსანდრე გურეშიძემ დაასწრო და საკუთარ კარში ჩაჭრა ბურთი. გოლამდე კარგი მომენტი ჰქონდა გიორგი კუხიანიძესაც, რომელიც, ოლეგ მამასახლისთან ერთად, მოედნის ცენტრის ბატონ-პატრონი იყო.

ბოლნისელები საკუთარი ნახევრისკენ საკმაოდ ღრმად იყვნენ ჩაწეული და სწრაფი კონტრშეტევებით ცდილობდნენ ქუთაისელთა დაცვაში ნაპრალების მოძიებას. რამდენჯერმე ფლანგიდან გურამ გიორბელიძემ გაამწვავა ვითარება. სტუმრები ძირითადად ჯაბა დვალის დატვირთვას ცდილობდნენ, რომლის გოლის ალღოზეც საუბარი ზედმეტია...

თუმცა ქუთაისელი მცველები ყურადღებით თამაშობდნენ და წინა მატჩებისგან განსხვავებით შეცდომები აღარ მოსდიოდათ. "სიონს" მაინც ჰქონდა შანსი... გაშვებული გოლის შემდეგ მათ მალევე მიეცათ ანგარიშის გათანაბრების კარგი შესაძლებლობა, მაგრამ გიორგი მიქაბერიძის დარტყმა როინ კვასხვაძის კარს მცირე მანძილით ასცდა - ამ ეპიზოდში "ტორპედო" რეალურ ხიფათს გადაურჩა.

ტაიმის მიწურულს ლაშა მანაგაძემ ტორპედოელთა კარის ბადე კი შეარხია, მაგრამ აშკარად თამაშგარე მდგომარეობაში იყო. მანამდე კი "ტორპედოს" რამდენჯერმე შეეძლო უპირატესობის გაზრდა, მიზანთან ახლოს იყვნენ ლევან კუტალია და გიორგი ქიმაძე, მაგრამ დამაგვირგვინებელ ფაზაში ვერ იყოჩაღეს.

სწორი ცვლილება

მეორე ტაიმის დაწყებამდე კახა ჩხეტიანმა თორნიკე გრიგალაშვილის ნაცვლად თამაშში ვაჟა ტაბატაძე ჩართო. ტაბატაძე უფრო შემტევი სტილის განაპირა მცველია და მისი გამოსვლის შემდეგ ქუთაისელთა მარჯვენა ფლანგი კიდევ უფრო სახიფათო გახდა.

ტორპედოელებმა თამაშის განახლებიდან მალევე იხეირეს და საგოლე გადაცემა სწორედ შეცვლაზე შესულმა ტაბატაძემ მიითვალა - მის მიერ ჩაწოდებულ ბურთს კუტალია შორეულ ძელთან დაუხვდა და ეფექტური თავურით მეკარე მოძრაობაზე "დაიჭირა" - 2:0.

მეორე გოლის შემდეგ "სიონმა" გონზე მოსვლა ვერ მოასწრო. კონტრშეტევის შემდეგ წიქარიძემ ანგარიშს კიდევ უფრო სოლიდური სახე მისცა - 3:0. შეხვედრის ბედი გადაწყვეტილი იყო. ქუთაისელები შედარებით დამშვიდდნენ, თუმცა დარჩენილ დროშიც ჰქონდათ მომენტები - კუხიანიძესა და შეცვლაზე შესულ ლაშა კუჭუხიძეს შეეძლოთ ანგარიშის გაზრდა, მაგრამ უშედეგოდ - 3:0 ტაბლოს ბოლომდე შემორჩა.

მისაბაძი საქმე

ქუთაისში ფეხბურთი განსაკუთრებით უყვართ და გულშემატკივარი აქ ყველა სადავო ეპიზოდს მტკივნეულად განიცდის. რიონისპირა ქალაქს არაერთი სკანდალური მატჩი ახსოვს, "ტორპედოს" გულშემატკივრების მიმართაც არაერთი კრიტიკა გამოთქმულა, ბევრჯერ სამართლიანადაც, მაგრამ ამ ქალაქში ფეხბურთელებისა და მათი ამაგის დაფასება რომ არ ეშლებათ, ეს "სიონთან" მატჩშიც გამოჩნდა.

მეორე ტაიმში თითქმის ერთდროულად სამი ცვლილება განხორციელდა. აქედან ორი სტუმრების იყო. მოედანი "სიონის" ვეტერანმა ფეხბურთელებმა - ალექსანდრე კოშკაძემ და ჯაბა დვალმა დატოვეს, რომლებიც ადგილობრივმა გულშემატკივრებმა ტაშითა და ოვაციებით გააცილეს. რაც მისასალმებელი და მისაბაძი მაგალითია.

გუნდურობით

როგორც ზემოთ აღვნიშნეთ, კარგი მატჩი ჩაატარეს თენგიზ წიქარიძემ, ვაჟა ტაბატაძემ, გიორგი კუხიანიძემ და ლევან კუტალიამ, რომელმაც მიმდინარე ჩემპიონატში თავისი მესამე გოლი გაიტანა. თუმცა არანაკლები სამუშაო გასწიეს სხვა ფეხბურთელებმა.

"ტორპედომ", პირველ რიგში, სწორედ გუნდური თამაშით შეძლო "სიონის" სოლიდური უპირატესობით დამარცხება. თითქოსდა, ქუთაისელებმა საკუთარი თამაში იპოვეს და მოედანზე ყველაფერი გამოსდიოდათ. თუ ჩემპიონმა ეს ტონუსი შეინარჩუნა, სატურნირო მდგომარეობასაც მალე გაიუმჯობესებს.

დავით კოხრეიძე ქუთაისიდან

ყოველდღიური სპორტული გაზეთი "ლელო"
836
მკითხველის კომენტარები / 0 /
მსგავსი ამბები
რუბრიკის სხვა სიახლეები
;