ეროვნული ლიგა. VIII ტური. 'ლოკომოტივი' 1:3 'დილა': ლეგიონერების როლი [VIDEO]

"ლოკომოტივი" 1:3 "დილა"

26.04. თბილისი. მიხეილ მესხი (სათ)
0:1 რიბეირო (19), 0:2 ფორტესი (30), 1:2 რ. ჭანტურია (38-პენ), 1:3 რიბეირო (63-პენ)

ლოკომოტივი (4-4-2): თევდორაძე - გაბაძე, ლობჟანიძე, ცნობილაძე - უბილავა - კობახიძე (46. გვალია), სამურკასოვი, ძებნიაური (65. შონია), გავაშელიშვილი - რ. ჭანტურია, არველაძე (65. კიკაბიძე).

სათადარიგოები: შეროზია, ნ. ჭანტურია, ჯიქია, ღონღაძე
მწვრთნელი: ლაშა ჭაღიაშვილი

დილა (4-1-2-3): ბეგაშვილი - მაჩაიძე, ჩადუნელი, კვახაძე, სუხიაშვილი - ნონდი - რაჟამაშვილი, ნონიკაშვილი - ფორტესი (46. კოვტალიუკი), ფანცულაია (67. კორიფაძე), რიბეირო (88. აშორტია).

სათადარიგოები: გორდულავა, კერელეიშვილი, სამუშია
მწვრთნელი: გიორგი დარასელია

გაფრთხილება: გვალია (49), სამურკასოვი (54), კოვტალიუკი (64), ჭანტურია (72), კორიფაძე (81), ბეგაშვილი (90)

არბიტრი: პ. მაჭარაძე

გორის "დილამ" საქართველოს ჩემპიონატის აუტსაიდერი "ლოკომოტივი" დაამარცხა. ანგარიში ლეანდრო რიბეირომ გახსნა ულამაზესი გოლით. პირველ ტაიმში კიდევ ორი გოლი გავიდა.

ჯერ ალვინ ფორტესმა შეაგდო და "დილას" უპირატესობა კიდევ უფრო თვალსაჩინო გახადა. ტაიმის ბოლო წუთზე "რკინიგზელმა" რომან ჭანტურიამ პენალტით შეამცირა სხვაობა. მეორე ტაიმში კი "დილამ" კიდევ ერთი გაიტანა - ზუსტად შესრულებული პენალტის შემდეგ დუბლი მატჩის საუკეთესო მოთამაშე ლეანდრო რიბეირომ მიითვალა - 1:3.

ახალი ლოკომოტივი

თბილისის "ლოკომოტივის" მთავარმა მწვრთნელმა ლაშა ჭაღიაშვილმა მნიშვნელოვნად გადაახალისა შემადგენლობა. ამის ერთ-ერთი მთავარი მიზეზი, ალბათ, წინა ტურში "კოლხეთთან" ნაჩვენები, ძალიან არადამაჯერებელი თამაში იყო.

პირდაპირ შეიძლება დაიწეროს, რომ "ლოკომოტივის" შემადგენლობა კიდევ უფრო გაახალგაზრდავდა. ჭაღიაშვილი იმ მოთამაშეებს ენდო, რომელთა შესაძლებლობებსაც ის კარგად იცნობს ასაკობრივი გუნდებიდან. სათადარიგოთა სკამზე კი ძირითადის არაერთი ფეხბურთელი აღმოჩნდა.

"დილას" სწრაფი უნივერსალი ნოდარ ქავთარაძე დააკლდა, რამაც საშუალება არ მისცა მას, თავის ყოფილ კლუბს დაპირისპირებოდა. ცხადია, ეს გიორგი დარასელიას გაწვრთნილი გუნდისთვის საგრძნობი მინუსი გახლდათ...
რიბეიროს შედევრი

თამაში თანაბარ ბრძოლაში დაიწყო. სადღაც მე-15 წუთისთვის "დილას" უპირატესობა გამოიკვეთა. გორელებმა ბურთი დაიჭირეს და ჩანდა, რომ თამაში მათი კონტროლის ქვეშ გადადიოდა.

მე-19 წუთზე პატარა შედევრი გვიჩვენა "დილას" ბრაზილიელმა ლეგიონერმა, ლეანდრო რიბეირომ. სამხრეთამერიკელმა მარცხენა ფლანგზე მიიღო ბურთი, რამდენიმე მოწინააღმდეგეს გასცდა და უძლიერესი დარტყმით გაიტანა.

ისრაელიდან საქართველოს ჩემპიონატში დაბრუნების შემდეგ რიბეირომ პირველი გოლი შეაგდო. დაწინაურებამ "დილას" ხელ-ფეხი გაუხსნა, აემოქმედებინა თავისი საყვარელი კონტრშეტევები სწრაფი ფლანგების ხარჯზე.

შანსები ორივე გუნდს ჰქონდა. ჯერ ვატო არველაძემ ვერ გაიტანა, მერე იმავე რიბეირომ ვერ აჯობა თბილისელთა კარის დარაჯ რევაზ თევდორაძეს. 30-ე წუთზე კი "დილას" უპირატესობა ორბურთიანი გახდა.

დავით რაჟამაშვილმა კარგად მონახა ალვინ ფორტესი, რომლის ტექნიკურმა და ზუსტმა დარტყმამ მიზანს უწია - მორიგი შესანიშნავი გოლი გორელთა ნიდერლანდელი ლეგიონერისგან.

37-ე წუთზე ფორტესმა, მას შემდეგ, რაც მშვენიერი შანსი გაფლანგა, საკუთარ საჯარიმოში მოცელა დავით უბილავა და თერთმეტმეტრიანი ზუსტად შეასრულა რომან ჭანტურიამ - 1:2.

გადამწყვეტი პენალტი

მეორე ტაიმში ორივე მწვრთნელმა გადააწყო თამაში, "დილამ" კი თამაშის ბედი გადაწყვიტა - თერთმეტმეტრიანი მას შემდეგ დაინიშნა, რაც მიკოლა კოვტალიუკმა და გიორგი ფანცულაიამ კარგად გაითამაშეს ბურთი, ხოლო ამ უკანასკნელის დარტყმული ხელზე მოხვდა ერთ-ერთ თბილისელ მცველს. რიბეირომ ზუსტად აღასრულა საფეხბურთო სასჯელის უმაღლესი ზომა.

მართალია, ამის შემდეგ სახიფათო მომენტები ორივე გუნდის კართან შეიქმნა, მაგრამ ანგარიში აღარ შეცვლილა. მერე მცირე ხნით მინდორზეც მდგომარეობა დაიძაბა, თუმცა მალევე დამშვიდდა.

საბოლოოდ, "დილამ" დამსახურებულად მოიგო - კიდევ ერთი გამარჯვება გორული კლუბისა, რომელშიც უდიდესი როლი შეასრულეს ლეგიონერებმა.

განსაკუთრებით, ლეანდრო რიბეირომ, ვინც აშკარად საუკეთესო იყო ორივე გუნდის შემადგენლობაში. ეპიზოდურად, "დილა" მართლაც ძალიან კარგ ფეხბურთს თამაშობს. ახლა გუნდისთვის მთავარია, ეს "ძალიან კარგი ფეხბურთი" 90 წუთის განმავლობაში გაგრძელდეს.

ყოველდღიური სპორტული გაზეთი "ლელო"
1377
მკითხველის კომენტარები / 0 /
მსგავსი ამბები
რუბრიკის სხვა სიახლეები
;