ეროვნული ლიგა. VIII ტური: 'სამტრედია' 0:0 'რუსთავი'. უამრავი შანსით, მაგრამ უგულოდ

"სამტრედია" 0:0 "რუსთავი"

26.04. ლანჩხუთი. ევგრაფი შევარდნაძე 

სამტრედია (4-2-3-1): მიგინეიშვილი - ჩაჩუა, შ. კერძევაძე, ქარქუზაშვილი, ბაჩიაშვილი - დაუშვილი, სანია - კირკიტაძე, ანტე გი, ერისთავი (84. ხაჩიძე) - გიორბელიძე (64. მესიაჩენკო)

სათადარიგოები: ი. სტურუა, ოლხოვი, დ. მანჯგალაძე
მწვრთნელი: ბადრი კვარაცხელია

რუსთავი (4-2-3-1): რევიშვილი - გეგეჭკორი, ცხოვრებოვი, კვირკველია, ცარიკაევი - პაპავა (47. კობახიძე), გაბულოვი - ციცქიშვილი (65. ენდელაძე), ხადარცევი (75. ცინცაძე), მაქაცარია - მიქელთაძე.

სათადარიგოები: ქარდავა, ბ. ქავთარაძე, ფონიავა, მარცვალაძე
მწვრთნელი: ვლადიმირ გაზაევი

გაფრთხილება: მიქელთაძე (75), მაქაცარია (88)

არბიტრი: გ. ყრუაშვილი

უამრავი შანსით, მაგრამ უგოლოდ

"სამტრედიამ" მეტოქე ამჯერადაც ლანჩხუთის "ევგრაფი შევარდნაძეზე" ისტუმრა. "მასპინძლებს" დისკვალიფიკაციის გამო გაბონის ნაკრების მცველი ანრი ნდონგი აკლდათ. ჩერნოგორიელ ივან ფატიჩს არაფერი სჭირდა და მისი არყოფნა მოულოდნელი იყო. ჰოლანდიელი ლუკას ვეილი კი კვლავ ტრავმირებულია.

ინტერს გიი წელს გასული სეზონის აჩრდილიღაა. აღარ ეტყობოდა ის მუხტი, რომლითაც შარშან აშკარად გამოირჩეოდა. ისე, კოტდივუარელმა ორიოდე ეპიზოდში მაინც გაიბრწყინა...

რუსთაველთა ძირითადში კი არ იყვნენ კაპიტანი მამუკა კობახიძე, მათე ცინცაძე და პაპუნა ფონიავა.

მაქაცარიას ტაიმი

უსახური დასაწყისის შემდეგ თამაში გაიხსნა და მიუხედავად იმისა, რომ მოედანი საუკეთესო მდგომარეობაში არ იყო, მეტოქეებმა ბევრი საგოლე მომენტი შექმნეს. შეხვედრა ორი განსხვავებული ტაიმისგან შედგებოდა. პირველში უკეთ რუსთაველები გამოიყურებოდნენ, მეორეში - სამტრედიელები.

მე-9 წუთზე პირველი სახიფათო შეტევა "რუსთავმა" განახორციელა. საჯარიმოში მარცხნიდან თამაზ მაქაცარია შეიჭრა, მაგრამ კარგად ვერ დაარტყა და ომარ მიგინეიშვილმა ბურთი "დაამიწა".

25-ე წუთზე სამტრედიელები მცველმა გივი ქარქუზაშვილმა გადაარჩინა, როცა ფლანგურ გადაცემას ერთი შეხებითა და ძლიერი დარტყმით ბექა მიქელთაძე აგვირგვინებდა - მცველისგან ბურთი კუთხურზე გადავიდა და უმწვავესი მომენტი განიმუხტა.

37-ე წუთზე სახიფათო შეტევა უკვე რუსთაველებმა განახორციელეს. ბათრაზ ხადარცევი მაქაცარიას მეკარესთან მარტოს ტოვებდა, მაგრამ შემტევმა ბურთი ვერ დაიმორჩილა და მომენტი გაანიავა.

იგივე მაქაცარია ძალიან მწვავედ უტევდა და მალე მასპინძლები კიდევ ერთხელ დააფრთხო: ჯერ ორ მცველს გასცდა, შემდეგ მეკარესაც, მაგრამ მახვილი კუთხიდან კარს ააცილა და ანგარიშის გახსნის მშვენიერი შანსი გაფლანგა.

მალე მაქაცარიამ სამტრედიელ მცველებს კიდევ ერთი "შოუ" ჩაუტარა - მისი დარტყმული მიგინეიშვილმა მოიგერია, დამატებაზე კი ზაზა ციცქიშვილს გადაეფარა და გუნდი აშკარა გოლისგან იხსნა. ამას მოჰყვა კუთხური, რომლის დროსაც მაქაცარია კარს უკვე თავურით დაემუქრა და მიზანს ამჯერადაც ვერ მიაღწია.

გატანა სამტრედიელებსაც შეეძლოთ. ინტერს გიიმ მეკარესთან პირისპირ დატოვა გურამ გიორბელიძე, რომელიც მეკარეს კი გასცდა, მაგრამ დარტყმის კუთხე შეუმცირდა და მშვენიერი შანსი ვერ გამოიყენა.

ბურთი კარის ხაზზე და ძელი

მეორე ტაიმი სტუმართათვის უსიამოვნოდ დაიწყო: საყრდენი ნახევარმცველი გიორგი პაპავა დაშავდა და მის ნაცვლად შესულმა ცენტრალურმა მცველმა მამუკა კობახიძემ ადგილი ნახევარდაცვაში დაიკავა. პირველი მომენტი კი დავით კირკიტაძემ შექმნა, რომელიც ნუკრი რევიშვილის კარის აღებას კუთხურის შემდეგ ცდილობდა, მაგრამ გამოცდილ მეკარეს ვერ აჯობა.

შემდეგ გიორბელიძემ კირკიტაძის პასი კარის წინ მიიღო, დავით კვირკველიას ბურთი თავზე ეფექტურად გადაუგდო და მეკარესთან მარტო რომ რჩებოდა, წონასწორობა ვერ შეინარჩუნა და წაიქცა.

59-ე წუთზე, გიიმ კარიდან ოდნავ გამოსული რევიშვილი დაინახა და მოედნის ცენტრიდან მისი დასჯა მოინდომა, მაგრამ... ბურთი ლამის სტადიონის ფარგლებს გადასცდა...

ერთ წუთში რუსთაველებს ძლიერი დარტყმით ისევ კირკიტაძე დაემუქრა, მაგრამ მეკარემ პოზიცია ზუსტად შეარჩია და სტუმრები გადარჩნენ.

მეორე ტაიმის პირველ 15 წუთში რუსთაველებმა საპასუხოდ მხოლოდ ერთი კონტრშეტევა განახორციელეს, როცა მეკარის საჯარიმოში მყოფმა მაქაცარიამ მიგინეიშვილს ვერ აჯობა.

მალე სტუმრები კიდევ ერთხელ გადარჩნენ, როცა გიის ფლანგური გადაცემის შემდეგ ქარქუზაშვილი კარს ახლოდან თავურით ურტყამდა, მაგრამ... მხოლოდ ძელი "მოიკითხა".

"რუსთავი" გადარჩა 70-ე წუთზეც - სიდი სანიას დარტყმული ბურთი მეკარეს მოხვდა და ასხლეტით კარში წავიდა, მაგრამ რევიშვილმა ზედ კარის ხაზზე გააქვავა.

შეცდომა?

...88-ე წუთი მიმდინარეობდა, როცა ლევან გეგეჭკორის ფლანგური გადაცემა მაქაცარიამ დააგვირგვინა და... თითქოს, გამარჯვების გოლი გაიტანა, მაგრამ... არბიტრმა შემტევზე ხელით თამაში დააფიქსირა და ყვითელი ბარათიც უჩვენა. თუმცა გამეორებისას ჩანდა, რომ მაქაცარიას ბურთი მკერდიდან მუხლზე დაუვარდა და ასე გავიდა გოლი.

წამებში სამტრედიელებს შეექმნათ რეალური მომენტი: კარის წინ გახსნილ ნიკა ხაჩიძეს რევიშვილი გადაეფარა, თორემ გოლი გარდაუვალი იყო.
მსაჯის მიერ კომპენსირებულ დროში, ბექა მიქელთაძის ჩინებული გარღვევის შემდეგ, შეტევაში ჩართულმა ავთო ენდელაძემ დაუხანებლად "გაისროლა" და მიზანს სანტიმეტრებში ააცილა...

ბოლო ტურებთან შედარებით "სამტრედიამ" პირველად აჩვენა მეტ-ნაკლებად ნორმალური ფეხბურთი. მაგრამ მოსაგებად რაღაც დააკლდა. ალბათ, ეს "რაღაც" მშობლიურ "ეროსი მანჯგალაძეზე" მრავალრიცხოვანი გულშემატკივრის წინაშე თამაშია...
მერაბ მამულაშვილი

ჩიხურა-საბურთალო
27.04. ივანწმინდა. 16:30
6: +4 =1 -1, 11-4

დინამო (თბ)-კოლხეთი
27.04. თბილისი.
დინამო არენა. 18:30
59: +40 =12 -7, 136-42

დისკვალიფიკაცია: გიორგი კახელიშვილი, ბორის მახარაძე, ზურაბ არზიანი (ყველა - კოლხეთი)

ტორპედო-სიონი
27.04. ქუთაისი.
რამაზ შენგელია. 20:30
42: +27 =6 -9, 84-42
დისკვალიფიკაცია: მერაბ გიგაური (ტორპედო)

ყოველდღიური სპორტული გაზეთი "ლელო"
890
მკითხველის კომენტარები / 0 /
მსგავსი ამბები
რუბრიკის სხვა სიახლეები
;