ეროვნული ლიგა. XI ტური: 'დინამო' (თბ) 0:1 'ლოკომოტივი' - მარცხი საკრალურ დღეს

"დინამო" (თბ) 0:1 "ლოკომოტივი"

13.05. თბილისი. დინამო არენა
0:1 ჯიქია (29. ო. კობახიძის პასით)

დინამო (4-2-3-1): ბულისკერია - რუხაია, თოთაძე, კობოური (68. ლოჩოშვილი), ხარაბაძე - ივანისენია, ნინუა - შულაია (64. ერგემლიძე), ო. კიტეიშვილი, ივანიშვილი (46. ძალამიძე) - ზივზივაძე

სათადარიგოები: გოშაძე, ქოჩლაძე, დარციმელია, ბაბუნიძე
მწვრთნელი: კახა კაჭარავა

ლოკომოტივი (4-2-3-1): ლ. შეროზია - გაბაძე, ჭანტურია, ლობჟანიძე, უბილავა - ძებნიაური, შონია - ო. კობახიძე (79. ინჯგია), სამურკასოვი (72. გვალია), გავაშელიშვილი - ჯიქია (57. არველაძე).

სათადარიგოები: გუგუშვილი, ქურდაძე, ოზბეთელაშვილი
მწვრთნელი: ლაშა ჭაღიაშვილი

გაფრთხილება: ძებნიაური (35), ინჯგია (85)

არბიტრი: გ. ყრუაშვილი

დედაქალაქურ დერბიში "ლოკომოტივმა" "დინამოსთვის" საკრალურ დღეს, 13 მაისს, მისსავე ასპარეზზე დაამარცხა საქართველოს ყველაზე ტიტულოვანი კლუბი. ლაშა ჭაღიაშვილის გაწვრთნილი გუნდის წარმატებას დაუმსახურებელს ვერავინ უწოდებს...

საპირისპირო სცენარით

შეხვედრის პირველი ნახევარი ისეთი სცენარით წარიმართა, რომელსაც ნამდვილად ვერავინ წარმოვიდგენდით. არბიტრ გიორგი ყრუაშვილის სასტვენმა გუნდები შესვენებაზე რომ გაიხმო, "ლოკომოტივი" საქართველოს ჩემპიონატის ერთ-ერთ ლიდერსა და მთავარ ფავორიტ "დინამოს" მინიმალური ანგარიშით უგებდა.

დედაქალაქური დერბის ისტორიაში ბევრი რამ მომხდარა, თუმცა მატჩის ასეთ დასაწყისს ძალიან ძნელად თუ წარმოვიდგენდით: "ლოკომოტივს" საქმეები ცუდად მისდის და ამ ეტაპზე ეროვნული ლიგის დატოვების ერთ-ერთი მთავარი კანდიდატია.

თამაში საინტერესოდ დაიწყო. ორივე გუნდის კართან რამდენიმე მომენტი შეიქმნა. განსაკუთრებით კარგი შანსი ჰქონდა "რკინიგზელთა" ახალგაზრდა საყრდენ ნახევარმცველ თორნიკე ძებნიაურს, თუმცა მის მიერ დარტყმული ბურთი დინამოელთა კარის ხარიხამ აისხლიტა.

შეხვედრის 29-ე წუთზე კი პატარა საფეხბურთო შედევრი ვიხილეთ. ოთარ კობახიძემ შესანიშნავი გადაცემით დინამოელთა მთელი დაცვა "მოჭრა" და მეკარე დემეტრე ბულისკერიას პირისპირ შეატოვა დავით ჯიქია და "პელემაც" არ გაუშვა მშვენიერი შანსი.

არის ხოლმე გოლები, რომელშიც ასისტენტების დამსახურება უფრო დიდია, ვიდრე თავად გამტანის. ეს გოლიც სწორედ ასეთთა კატეგორიას უნდა მივაკუთვნოთ, თუმცა დამსახურება არც ჯიქიას უნდა დავუკარგოთ, ვინც გადამწყვეტ მომენტში ცივსისხლიანად ითამაშა.

უფრო უცნაური გაგრძელება

ბევრი ელოდა, რომ გაშვებული გოლის შემდეგ "დინამო", ბოლოს და ბოლოს, "ლოკომოტივს" საკუთარ თამაშს მოახვევდა თავს, მაგრამ არაფერი ამის მსგავსი არ მომხდარა. უფრო პირიქით - ლაშა ჭაღიაშვილის მიერ გაწვრთნილი გუნდი ძალიან სახიფათოდ მოქმედებდა.

განსაკუთრებით სახიფათო იყო "ლოკომოტივის" კონტრშეტევები. არავინ იცის, რა იყო ამის მიზეზი. ალბათ, ის არა, თამაში უმაყურებლოდ რომ მიმდინარეობდა, თუმცა ისიც ფაქტია, რომ დინამოელები, მათ შორის, გუნდის ლიდერები, მოდუნებულები იყვნენ. ხატოვნად რომ ვთქვათ, თითქოს ფეხზე სიმძიმეები ეკიდათ.

"ლოკომოტივს" კი მშვენიერი საგოლე შანსი მიეცა. "რკინიგზელთა" შორის ერთ-ერთმა საუკეთესომ, დავით ჯიქიამ ძლიერად დაარტყა და ბურთი კიდევ ერთხელ მოხვდა "დინამოს" კარის ხარიხას.

გვიან ხომ არ იყო?

"დინამო" გვიან გამოფხიზლდა და "ლოკომოტივის" კართან სწორედ ამის შემდეგ შეიქმნა სახიფათო მომენტები. ჯერ შეცვლაზე შესულმა მიხეილ ერგემლიძემ იაქტიურა და დაძაბა მდგომარეობა მოწინააღმდეგის კართან, მერე ოთარ კიტეიშვილსა და ლევან ხარაბაძეს აუცდათ ერთობ სახიფათო დარტყმები.

ამრიგად, "დინამო" 5 ქულით ჩამორჩა ეროვნული ლიგის ლიდერ "საბურთალოს". რა თქმა უნდა, კახა კაჭარავას შეგირდები ამ შეხვედრაში მარცხს არ გეგმავდნენ, მაგრამ ასე კი მოხდა. გასაგებია, რომ თუნდაც 13 მაისის გამო "დინამოს" ერთადერთი მიზანი მოგება იყო, მაგრამ ისიც ფაქტია, რომ ახალგაზრდულ გუნდს არასტაბილურობაც ნებისმიერ შემთხვევაში სდევს თან.

ყოველდღიური სპორტული გაზეთი "ლელო"
877
მკითხველის კომენტარები / 0 /
მსგავსი ამბები
რუბრიკის სხვა სიახლეები
;