ეროვნული ლიგა. XI ტური: 'სიონი' 1:1 'სამტრედია' - რას უყურებდა კიკაჩეიშივლი?

"სიონი" 1:1 "სამტრედია"

12.05. თბილისი. მიხეილ მესხი (სათ)
1:0 გურეშიძე (21. კოშკაძის პასით), 1:1 ერისთავი (29-პენ)

სიონი (4-2-3-1): მუჯრიშვილი - მინდორაშვილი, გურეშიძე, ნოზაძე, გურ. გიორბელიძე - ხმალაძე, ქიქავა (85. სამუშია) - მანაგაძე, კოშკაძე (68. მიქაბერიძე), გაფრინდაშვილი (76. სიხარულია) - დვალი.
სათადარიგოები: ზარქუა, უგულავა, ჯაფარიძე, ლეჟავა

მწვრთნელი: კობა ჟორჟიკაშვილი

სამტრედია (4-2-3-1): მიგინეიშვილი - ჩაჩუა, ქარქუზაშვილი, კერძევაძე, ბაჩიაშვილი - დაუშვილი, სანია - კირკიტაძე (88. მესიაჩენკო), ერისთავი (84. ნინუა), გიი - ხაბეიშვილი (77. ახალაძე).

სათადარიგოები: სტურუა, გიორ. გიორბელიძე, ოლხოვი, მანჯგალაძე
მწვრთნელი: ბადრი კვარაცხელია

გაფრთხილება: კერძევაძე (20), გურ. გიორბელიძე (66), მიგინეიშვილი (67). სანია (76), ხმალაძე (80), ნინუა (88)

გაძევება: კოშკაძე (81. სიონი)

არბიტრი: გ. კიკაჩეიშვილი

საქართველოს ეროვნული ლიგის აუტსაიდერებმა "მიხეილ მესხის" სათადარიგო მინდორზე დიდი ბრძოლა გააჩაღეს. საბოლოოდ, იმ გუნდების შეხლა, რომელთა მთავარი მიზანიც ეროვნულ ლიგაში ადგილის შენარჩუნებაა, ქულების გაყოფით დასრულდა...

სანახაობრივი ტაიმი

პირველი ტაიმი სანახაობრივი გამოდგა. ნიშანდობლივია, რომ შეხვედრაში ორივე გოლი სწორედ ამ დროს გავიდა. საერთოდაც, გუნდები ძირითადად შეტევაში ცდიდნენ ბედს. ამადაც თუ იყო, რომ მინდორზე დიდი ბრძოლა და საქართველოს ჩემპიონატის კვალობაზე კარგი ფეხბურთი ვიხილეთ.

მომენტები თავიდანვე შეიქმნა. ისინი უფრო "სამტრედიას" ჰქონდა. დავით კირკიტაძეს ორჯერ არ გაატანინა მიხეილ მუჯრიშვილმა, გიორგი ერისთავის დარტყმულმა ბურთმა კი ბოლნისელთა კარის ხარიხა "მოიკითხა".

21-ე წუთზე "სამტრედიას" კარის მიმართულებით საჯარიმო დარტყმა დაინიშნა. ალეკო კოშკაძემ ჯარიმა კარგად შეასრულა და შეტევაში ჩართულ სანდრო გურეშიძეს თავზე დაასვა ბურთი. საქართველოს ასაკობრივი ნაკრებების ყოფილმა ფეხბურთელმა, ვისაც ტრავმებმა ბევრი დრო წაართვა და ახლაღა შედის ოპტიმალურ ფორმაში, მძლავრი თავურით აიღო იმერელთა კარი.

გავიდა 8 წუთი და ანგარიში გათანაბრდა. ბოლნისელთა საჯარიმოში ლუკა ნოზაძეს ხელზე მოხვდა ბურთი. არბიტრ გოგა კიკაჩეიშვილს სრული საფუძველი ჰქონდა, თერთმეტმეტრიანი დაენიშნა "სიონის" კარში და ასეც მოიქცა. გიორგი ერისთავმა უმაღლესი საფეხბურთო სასჯელი ცივსისხლიანად აღასრულა - 1:1.

კითხვები არბიტრთან

ამ ცოტა ხნის წინ ბოლნისის "სიონმა" საქართველოს ფეხბურთის ფედერაციას წერილით მიმართა. ამ წერილში ლაპარაკი იყო იმ "უსამართლო გადაწყვეტილებებზე", რომელიც მსაჯებმა მიმდინარე ჩემპიონატის იმ მატჩებში მიიღეს, ბოლნისური კლუბი რომ მონაწილეობდა.

თამამად შეგვიძლია ვთქვათ, რომ ამ შეხვედრის შემდეგ "სიონის" კითხვათა ჩამონათვალი კიდევ უფრო გაიზრდება. რა თქმა უნდა, ბოლნისელებს პრეტენზიები აუცილებლად ექნებათ მატჩის მთავარი მსაჯის, გოგა კიკაჩეიშვილის მიმართ.

საკამათო ეპიზოდი 76-ე წუთზე მოხდა. ლაშა მანაგაძე საჯარიმო მოედნის შიგნიდან ურტყამდა ბურთს ომარ მიგინეიშვილის კარში. ბურთი ერთ-ერთ სამტრედიელ მცველს მოხვდა. ვიდეოგამეორებაზე კარგად ჩანს, რომ ბურთი უკანახაზელს ხელზე ხვდება. ყველა საფეხბურთო კანონით ეს 11-მეტრიანია, თუმცა მსაჯის სასტვენი დუმდა...

ეს ეპიზოდი სათადარიგო სკამზე მჯდომმა, უკვე შეცვლილმა ალეკო კოშკაძემ გააპროტესტა და კიკაჩეიშვილმა მას წითელი ბარათი უჩვენა...
საბოლოოდ, შეხვედრა ფრედ დასრულდა და ასე გვგონია, ეს შედეგი არც ერთი გუნდისთვის არ უნდა იყოს მისაღები.

კვირა, 20 მაისი
ლოკომოტივი-ტორპედო 16:30
რუსთავი-ჩიხურა 19:00
დილა-საბურთალო 21:00

ყოველდღიური სპორტული გაზეთი "ლელო"
848
მკითხველის კომენტარები / 0 /
მსგავსი ამბები
რუბრიკის სხვა სიახლეები
;