ეროვნული ლიგა. XIII ტური: 'კოლხეთი' 2:2 'სამტრედია' - სანახაობა ყოველთვის არ ნიშნავს ხარისხს

"კოლხეთი" 2:2 "სამტრედია"

26.05. ზესტაფონი. დავით აბაშიძე
1:0 მიხალიოვი (4), 1:1 ბაჩიაშვილი (42), 1:2 გიი (48-პენ), 2:2 იმნაძე (61)

კოლხეთი (3-4-2-1): პოლტავცევი - ჭეიშვილი, გოგონაია, მახარაძე - კილასონია (53. არზიანი), დანილოვი (79. კვასოვი), ტყემალაძე, ჯიმშელეიშვილი (50. კაბორე) - კახელიშვილი, იმნაძე - მიხალიოვი

სათადარიგოები: გურგენიძე, კაკულია, კვერნაძე
მწვრთნელი: ვიქტორ დემიდოვი

სამტრედია (4-2-3-1): ი. სტურუა - ჩაჩუა, კერძევაძე, ფატიჩი, ბაჩიაშვილი - ახალაძე, მესიაჩენკო - კირკიტაძე (75. ქაშიბაძე), გიი, ნინუა (46. ვეილი) - ხაბეიშვილი (67. ოლხოვი)

სათადარიგოები: ო. სტურუა, ხაჩიძე, მანჯგალაძე
მწვრთნელი: ბადრი კვარაცხელია

გაფრთხილება: მიხალიოვი (5), ახალაძე (20), ხაბეიშვილი (49), ბაჩიაშვილი (68)
გაძევება: ფატიჩი (51. სამტრედია)

არბიტრი: ი. კვირიკაშვილი

ეროვნული ჩემპიონატის აუტსაიდერებმა ზესტაფონში დიდი ბრძოლა გააჩაღეს, რომელმაც გამარჯვებული ვერ გამოავლინა. მთლიანობაში ერთობ სანახაობრივი თამაში კი ვნახეთ, მაგრამ სანახაობა ყოველთვის არ ნიშნავს კლასსა და ხარისხს. გოლებიც საკმარისად იყო და ამათგან ერთი მართლაც რომ ულამაზესი გამოვიდა...

კოლხეთის სტარტი

ფოთელებმა შეხვედრა ძალიან აქტიურად დაიწყეს. "სამტრედია" კი დაბნეულად გამოიყურებოდა. ეს არცაა გასაკვირი. გუნდი კიდევ ერთმა ფეხბურთელმა დატოვა. სიდი სანია მოედნის ცენტრში სერიოზული ძალა იყო. არ ჩანდა არც გიორგი ერისთავი.

პირველივე წუთებზე ფოთელებს ძალიან კარგი მომენტი ჰქონდათ. ლუკა იმნაძე მეკარე ილია სტურუასთან პირისპირ აღმოჩნდა, მაგრამ სამტრედიელთა კიპერმა კარს, რომელსაც გუნდიდან წასული ომარ მიგინეიშვილის ნაცვლად იცავდა, საფრთხე აარიდა.

გოლიც მალევე გავიდა. კუთხურიდან მოწოდებულ ბურთს აქტიურმა იმნაძემ მიმართულება შეუცვალა, "კოლხეთის" უკრაინელი ლეგიონერი ილია მიხალიოვი ცარიელი კარის წინ აღმოჩნდა და ისღა დარჩენოდა, ბურთისთვის ადგილი ბადეში მიეჩინა. ფოთელები სავსებით დამსახურებულად დაწინაურდნენ.

პირობითმა მასპინძლებმა თამაში აქტიურად გააგრძელეს და მალე ანგარიშის გაზრდის კარგი შანსიც მიეცათ - გიორგი კახელიშვილმა, ვინც თანდათან იბრუნებს ძველ ფორმას, სახიფათოდ შეასრულა "სტანდარტული" და სტურუამ კიდევ ერთხელ გამოავლინა შესანიშნავი რეაქცია.

შედევრი

"სამტრედიამ" პირველი ტაიმის შუაწელში თამაში გაათანაბრა და მალე უპირატესობაც მოიპოვა. ვიხილეთ გოლი, რომელიც, ალბათ, ერთ-ერთი საუკეთესოა მიმდინარე ჩემპიონატში. ვაკო ბაჩიაშვილმა კარგად და დროულად შენიშნა, რომ ფოთელთა უკრაინელ მეკარე ანდერი პოლტავცევს კარი დატოვებული ჰქონდა და ულამაზესი დარტყმით გადაუგდო ბურთი თავზე - 1:1.

მეორე ტაიმის სტარტზე უკეთ უკვე "სამტრედია" გამოიყურებოდა და მალე დაწინაურდა კიდეც. აქტიურმა დავით კირკიტაძემ კოლხი ჯიმშელეიშვილი აიძულა, საჯარიმო მოედანში თამაშის წესი დაერღვია, 11-მეტრიანი კი ზუსტად შეასრულა ინტერს გიიმ.
გაძევება რომ არა...

არავინ იცის, როგორ განვითარდებოდა მოვლენები, 51-ე წუთზე "სამტრედია" კაცნაკლული რომ არ დარჩენილიყო. ივან ფატიჩმა მიხალიოვი "ბოლო იმედის" ჯარიმით შეაჩერა.

უკრაინელი შემტევი მეკარესთან პირისპირ გადიოდა და არბიტრმა ირაკლი კვირიკაშვილმა ბალკანელი მცველი სამართლიანად გააძევა მინდვრიდან.

"კოლხეთმა" შანსი ხელიდან არ გაუშვა და ანგარიში გაათანაბრა. შეცვლაზე შესულმა ზურაბ არზიანმა კარგად შეასრულა "სტანდარტული" და იმნაძის თავური ზუსტი აღმოჩნდა.

მასპინძლებს სულაც გამარჯვება შეეძლოთ - კახელიშვილის კარგ გადაცემას არზიანის დარტყმა მოჰყვა, მაგრამ სტურუა ამჯერადაც დამაჯერებელი იყო.

ყოველდღიური სპორტული გაზეთი "ლელო"
911
მკითხველის კომენტარები / 0 /
მსგავსი ამბები
რუბრიკის სხვა სიახლეები
;