ეროვნული ლიგა. XIII ტური. 'საბურთალო' 2:1 'რუსთავი' - ქომაგებს ასე რომ უყვარს და აფასებს [VIDEO]

"საბურთალო" 2:1 "რუსთავი"

24.05. თბილისი. მიხეილ მესხი (სათ)
0:1 კვირკველია (8. ციცქიშვილის პასით), 1:1 კვირკველია (36-საკ. კარში), 2:1 კოხრეიძე (78-პენ)

საბურთალო (4-2-3-1): კუპატაძე - ჩაბრაძე, მარგველაშვილი, რეხვიაშვილი, ლაკვეხელიანი - ტერა, გორგიაშვილი (70. ვოლკოვი) - ვაგნერი, დიასამიძე (50. ქურდაძე), გვარაძე - გოშთელიანი (53. კოხრეიძე)

სათადარიგოები: იაშვილი, ალთუნაშვილი, თარხნიშვილი, ტატანაშვილი
მწვრთნელი: გიორგი ჭიაბრიშვილი

რუსთავი (4-2-3-1): რევიშვილი - გეგეჭკორი, პაპავა, კვირკველია (82. ბარაბაძე), ფონიავა - ცინცაძე, ენდელაძე - კვირკვია (49. ჩოგაძე), ციცქიშვილი, მიქელთაძე (61. კირკიტაძე) - მაქაცარია

სათადარიგოები: სეფიაშვილი, სილაგაძე, ბ. ქავთარაძე, ზვიადაძე,
მწვრთნელი: ვარლამ კილასონია

გაფრთხილება: კვირკველია (76)

გაძევება: კუპატაძე (47. საბურთალო)

არბიტრი: გ. ვადაჭკორია

ორი აზრი არ არის: ეროვნული ლიგა წელსაც არ გამოირჩევა დიდი სანახაობით, მაგრამ ეს ისეთი თამაში იყო, საცქერად მართლაც რომ ღირდა. მას მხოლოდ ერთი რამ აკლდა - მაყურებელი...

მეშვიდე დაბრუნება და
საკადრო პრობლემები

"რუსთავმა" ახალი მწვრთნელის ხელმძღვანელობით პირველი მატჩი გამართა. ვარლამ კილასონიამ მეშვიდედ ჩაიბარა მშობლიური ქალაქის გუნდი (რუსთაველმა გულშემატკივრებმა სტადიონზე ბანერი გამოფინეს - "ვალერ, გვაკლდი!") და პირველივე შეხვედრაში სერიოზული საკადრო პრობლემების წინაშე აღმოჩნდა ვლადიმირ გაზაევთან ერთად გუნდიდან წასული ლეგიონერების გამო. პლუს ამას, მამუკა კობახიძე და ოთარ მარცვალაძე დისკვალიფიკაცირებულები იყვნენ.

სტიმული არც თბილისელებს აკლდათ: გიორგი ჭიაბრიშვილის გუნდი წინა ტურში "დილასთან" 1:4 დამარცხდა და გულშემატკივრის თვალში რეაბილიტაცია სჭირდებოდა...

კვირკველიას
უსიამოვნო დუბლი

ხანგრძლივი პაუზის შემდეგ ძირითად შემადგენლობაში პირველად მოხვდა გურამ გოშთელიანი, რომელიც ფორმაში შესვლას ცდილობდა და გორულ მატჩში გაიტანა კიდეც.

პირველი სახიფათო მომენტი მე-6 წუთზე სწორედ მან შექმნა: თბილისელებმა სტუმრები აქტიური პრესინგით შებოჭეს და გოშთელიანის სახიფათო დარტყმა მეკარე ნუკრი რევიშვილმა მოიგერია.

რუსთაველებმა თამაში გამოასწორეს და მე-7 წუთზე გაამწვავეს კიდეც: თამაზ მაქაცარიამ მშვენიერი რეიდი წამოიწყო, მაგრამ გაგი მარგველაშვილი გადაეფარა და ვითარება განმუხტა.

თუმცა სტუმრებმა ერთ წუთში ანგარიში გაიხსნეს - კუთხური ზაზა ციცქიშვილმა მოაწოდა, რუსთაველთა 38 წლის ცენტრალურმა მცველმა დავით კვირკველიამ კი მცველებს დაასწრო და მიმდინარე სეზონის ყველაზე ხანდაზმულმა მოთამაშემ "რუსთავი" დააწინაურა.

"საბურთალო" წონასწორობის აღდგენას შეეცადა და მეტოქეს მთელი ძალებით შეუტია: 29-ე წუთზე ვაგნერ გონსალვესის მიერ დარტყმული ბურთი კარიდან კვირკველიამ გამოიტანა. მალე იგივე განმეორდა და ბურთს კვლავ კვირკველია გადაეღობა.

გავიდა ორიოდე წუთი და გეგა დიასამიძეს ანგარიშის გათანაბრების რეალური შანსი მიეცა - მეკარესთან პირისპირ დარჩა, მაგრამ ახლო მანძილიდან ბურთი მიზანს ააცილა. მასპინძლები არ ჩერდებოდნენ. 35-ე წუთზე რუსთაველთა კარს უკვე ბექა გვარაძე დაემუქრა და გუნდი ისევ რევიშვილმა გადაარჩინა, დამატებაზე კი დიასამიძემ კარს ააცილა.

კვირკველიამ მეორე გოლიც გაიტანა, ოღონდ... ეს უკვე საკუთარ კარში - დიასამიძის ფლანგური გადაცემის შემდეგ ვეტერანისგან ბურთი რევიშვილის კარში აღმოჩნდა - 1:1.

გაძევება და გადაადგილებები

მეორე ტაიმი "საბურთალოსთვის" ძალიან ცუდად დაიწყო: სწრაფი კონტრშეტევა რევიშვილმა წამოიწყო, მასპინძელთა ორმა მცველმა და მეკარემ შეუთანხმებლად ითამაშეს, სამივეს კი მათე კვირკვიამ დაასწრო და გაიტანდა, ლაზარე კუპატაძეს რომ არ წაექცია - არბიტრმა გიორგი ვადაჭკორიამ თბილისელთა კიპერი სრულიად სამართლიანად გააძევა.

მომხდარის გამო ორივე გუნდის მთავარმა მწვრთნელმა სასწრაფოდ ტაქტიკური ცვლილებები განახორციელა. გამოჩნდა, რომ შეტევაზე გადართული რუსთაველების დაცვის ფლანგი მოშიშვლდა და "საბურთალოს" დამრიგებელი "ვა-ბანკზე" წავიდა - ნახევარმცველ თორნიკე გორგიაშვილის ნაცვლად, მინდორზე თავდამსხმელი დავით ვოლკოვი შეუშვა...

მოულოდნელი სცენარი

სიუჟეტი მოულოდნელი სცენარით განვითარდა: კაცნაკლულობის მიუხედავად, "საბურთალომ" უკან არ დაიხია და მეტოქეზე ბევრად მეტი რეალური მომენტი შექმნა - ეს ჭიაბრიშვილის მიერ ზუსტად გამოცნობილი შეცვლებისა და ტაქტიკური გადაადგილებების დამსახურებაა.

ორწუთიან მონაკვეთში 10 კაცით დარჩენილ თბილისელებს ანგარიშის გათანაბრება ზედიზედ სამჯერ შეეძლოთ და თითოეულ ამ ეპიზოდში კოხრეიძე გამოირჩეოდა: 66-ე წუთზე მან სწრაფად წამოიწყო კონტრშეტევა და საჯარიმოში გახსნილ ბექა გვარაძეს გაუგრძელა, რომელიც მცველს ეფექტურად გასცდა, მაგრამ ბურთი ძელს მოარტყა.

ერთ წუთში კოხრეიძემ მეკარეზე გამიზნული გადაცემა ჩაჭრა მაგრამ მახვილი კუთხიდან ვერ გაიტანა. თუმცა შეტევა გაგრძელდა და ამჯერად, კოხრეიძემ კარის წინ ელვინ ტერა მოძებნა, რომლის დარტყმასაც რევიშვილი გადაეფარა და გუნდი გადაარჩინა.

ძალიან კარგი იყო ვოლკოვიც. თბილისელები სწორედ მისი კარგი თამაშის წყალობით დაწინაურდნენ: მარჯვენა ფლანგზე მან 50 მეტრი ირბინა, უსწრაფესი რეიდით რამდენიმე მეტოქე ჩამოიშორა და საჯარიმოში კვირკველიამ წააქცია, ხოლო კოხრეიძემ უნაკლოდ გამოიყენა პენალტი - 2:1.

სახალისო დასასრული

ბოლო წუთებზე, რუსთაველები ქულის გადარჩენას ცდილობდნენ, მაგრამ რეალური საგოლე მომენტები ვერ შექმნეს.

"საბურთალო" კი ანგარიშის შენარჩუნებას ცდილობდა, მაგრამ მეტოქეს შეუქმნა კიდევ რამდენიმე რეალური მომენტი: 83-ე წუთზე სწრაფი კონტრშეტევა ისევ კოხრეიძემ წამოიწყო, მარჯვენა ფლანგზე ვოლკოვმა ისევ გაინავარდა, გიორგი პაპავას გაექცა და მეკარესთან პირისპირ დარჩენილმა მახვილი კუთხიდან ვერ გაიტანა.

ბოლო წუთებზე ვოლკოვი მცველებს კიდევ ორჯერ გაექცა და ორივეჯერ შორიდან დაარტყა - სტუმრები ამჯერადაც რევიშვილმა გადაარჩინა. დუბლის შესრულება სურდა კოხრეიძეს, რომელმაც 93-ე წუთზე კარიდან გამოსული რევიშვილი შენიშნა და მოედნის ცენტრიდან ბურთის "მოჭრა" სცადა, თუმცა კარს ოდნავ ააცილა.

ამ ყველაფრის ნახვა ნამდვილად ღირდა. ეს ისეთი თამაში იყო, რომელიც ეროვნული ლიგის რეკლამად გამოდგებოდა და სადაც იყო ის, რაც ფეხბურთს უხდება - მოულოდნელი, დრამატული, დამაინტრიგებელი სცენარი და, რაც მთავარია, ის საბრძოლო სულისკვეთება, რაც "საბურთალომ" გამოავლინა, ქომაგს ასე რომ უყვარს და აფასებს.


სიონი-დილა
25.05. თბილისი. მიხეილ მესხი. 17:00

ტორპედო-დინამო (თბ)
25.05. ქუთაისი.
რამაზ შენგელია. 20:30

კოლხეთი-სამტრედია
26.05. ზესტაფონი.
დავით აბაშიძე. 19:30

ჩიხურა-ლოკომოტივი
26.05. ივანწმინდა . 17:00

ყოველდღიური სპორტული გაზეთი "ლელო"
804
მკითხველის კომენტარები / 0 /
მსგავსი ამბები
რუბრიკის სხვა სიახლეები
;