ეროვნული ლიგა. XIII ტური: 'ტორპედო' 1:1 'დინამო'(თბ) - ტემპი, დაძაბულობა, და ბევრი ემოცია... [VIDEO]

"ტორპედო" 1:1 "დინამო"(თბ)

25.05. ქუთაისი. რამაზ შენგელია
1:0 კუტალია (8. ტაბატაძის პასით), 1:1 შულაია (15. ზივზივაძის პასით)

ტორპედო (4-2-3-1): კვასხვაძე - ტაბატაძე, ჭიჭინაძე, გურული, ქიმაძე - გიგაური (87. ლიპარტია), მამასახლისი - დოლიძე, კუტალია, სარდალიშვილი (63. წიქარიძე) - კაპანაძე (78. კუჭუხიძე)

სათადარიგოები: ქვილითაია, ფურცხვანიძე, ბოხაშვილი, გრიგალაშვილი
მწვრთნელი: კახა ჩხეტიანი

დინამო (4-2-3-1): ბულისკერია - კობოური, ლოჩოშვილი, თოთაძე, რუხაია - ნინუა (74. ქოჩლაძე), ივანისენია - ივანიშვილი (71. ერგემლიძე), კიტეიშვილი, შულაია - ზივზივაძე (90. ბაბუნაძე)

სათადარიგოები: მამარდაშვილი, დარცმელია, კიტეიშვილი, ქაფიანიძე
მწვრთნელი: კახა კაჭარავა

გაფრთხილება: ნინუა (54), ლოჩოშვილი (71)

არბიტრი: გ. ყრუაშვილი

საქართველოს ყველაზე ტიტულოვანი კლუბების დაპირისპირებას ქუთაისელი გულშემატკივრები ყოველთვის განსაკუთრებული ინტერესით ხვდებიან და ამ მხრივ არც 69-ე დერბი ყოფილა გამონაკლისი. "რამაზ შენგელიაზე" 10 000-მდე ქომაგი შეიკრიბა, რაც დასწრების მხრივ ეროვნული ლიგის რეკორდია...

ყველაზე სანახაობრივი
წუთები

შეხვედრას ტემპი, დაძაბულობა და ემოციები ბოლომდე არ მოჰკლებია, მაგრამ ყველაზე თვალსასეირო მაინც პირველი 15 წუთი გამოდგა. გუნდებმა შეხვედრა აქტიურად დაიწყეს, საწყის წუთებში განსაკუთრებული მონდომებით მასპინძლები უტევდნენ.

კახა ჩხეტიანის შეგირდებს ეს აქტიურობა სწრაფი გოლით დაუფასდათ. კუთხურის გათამაშების შემდეგ ვაჟა ტაბატაძემ მარჯვენა ფლანგიდან საჯარიმოსკენ გაუშვა მაღალი ბურთი, სადაც მცველებს ლევან კუტალიამ დაასწრო და თავურით გაიტანა. დინამოელებმა გოლით სწრაფადვე უპასუხეს. ბუდუ ზივზივაძის შესანიშნავი გადაცემით აკაკი შულაიამ ისარგებლა და შორეულ დაბალ კუთხეში გამოზომილი დარტყმით ანგარიში გაათანაბრა.

მოტივირებული ბუდუ

დინამოელთა ცენტრფორვარდმა ბუდუ ზივზივაძემ წლების წინ "ტორპედოში" თავის დამკვიდრება ვერ შეძლო და ყოფილი გუნდის წინააღმდეგ ყოველთვის ორმაგი მოტივაციით თამაშობს. ზივზივაძემ პირველ წრეში ქუთაისელების წინააღმდეგ დუბლი შეასრულა და ახლაც გამორჩეული იყო მოედანზე. მართალია, ამჯერად გოლი არ გაუტანია, მაგრამ საგოლე გადაცემა მიითვალა და მასპინძლებს მუდამ დაძაბულობაში ამყოფებდა.

მასთან ერთად დინამოელთაგან ოთარ კიტეიშვილი, დმიტრო ივანისენია, აკაკი შულაია და ნიკა ნინუა გამოირჩეოდნენ. ისინი კარგად იყენებდნენ ქუთაისელთა დაცვაში წარმოქმნილ სივრცეებს და სახიფათო შეტევებს ახორციელებდნენ.

მარჯვენა ფლანგი

"ტორპედო" საწყისი წუთებიდან გაცილებით აქტიურად მარჯვენა ფლანგიდან უტევდა, სადაც ვაჟა ტაბატაძე და გრიგოლ დოლიძე აქტიურობდნენ, მარჯვენაფლანგელთა დომინირება მატჩის ბოლომდე გაგრძელდა. ქუთაისელთა საგოლე იერიში სწორედ ამ ფრთიდან განვითარდა - ტაბატაძემ პირველ ტაიმში თორნიკე კაპანაძის მისამართითაც გააკეთა კარგი გადაცემა, მაგრამ "ელვამ" ნახევარბრუნში უზუსტოდ დაარტყა.

იმ შეცდომას თუ არ ჩავთვლით...

გაშვებული გოლისას დაშვებულ შეცდომას თუ არ ჩავთვლით, დინამოელთა მეკარე დემეტრე ბულისკერიამ სხვა ეპიზოდებში შესანიშნავად ითამაშა. მან სამჯერ იხსნა "დინამო" გოლისგან. პირველ ტაიმში აკრობატული ნახტომით მიხეილ სარდალიშვილს აუღო რთული ბურთი, მეორე ნახევარში მასთან პირისპირ გასულ კაპანაძეს არ დაარტყმევინა, შემდეგ კი გამოცდილი დოლიძის უძლიერესი დარტყმაც მოიგერია.

ბოლომდე შეტევებში

შეხვედრის ბოლო წუთებამდე სწრაფი ტემპი შენარჩუნდა. ხან ერთი გუნდი ამწვავებდა ვითარებას, ხან - მეორე. ჩხეტიანმა თორნიკე კაპანაძის ნაცვლად ტანმაღალი, ძალისმიერი თავდამსხმელი ლაშა კუჭუხიძე ჩართო თამაშში და ძნელი მისახვედრი არ იყო, რომ ქუთაისელები მაღალ ჩაწოდებებზე გააკეთებდნენ აქცენტს.

კუჭუხიძის მისამართით ორივე ფლანგიდან მართლაც იგზავნებოდა მაღალი ბურთები. დინამოელები ამისთვის მზად აღმოჩნდნენ, თუმცა ერთხელ მაინც გაეპარათ მასპინძელთა ტანმაღალი ფორვარდი, რომლის სახიფათო თავურიც მიზანს ოდნავ ასცდა.

დინამოელთაგან კვლავ კიტეიშვილი და ზივზივაძე ამწვავებდნენ თამაშს. სახიფათო იყო ქოჩლაძის თავური დარტყმაც, თუმცა შედეგი არც ერთი გუნდის მცდელობას არ მოჰყოლია და ყველაზე კორექტული დერბი ლოგიკური ანგარიშით 1:1 დასრულდა.

ქუთაისური რეკორდი
ქომაგობაში

...გასულ ჩემპიონატში 9 000 მაყურებელი სწორედ, "ტორპედო" - "დინამოს" ქუთაისურ მატჩზე მივიდა და ახლა დასწრების მაჩვენებელი კვლავ ქუთაისში გაუმჯობესდა.

საქართველოს ჩემპიონატების ისტორიაში კი ამ გუნდების თამაშზე ყველაზე მეტი მაყურებელი 2002 წლის 17 მაისს დაფიქსირდა, როცა "ტორპედომ" მალხაზ ასათიანის გოლით "დინამო" 1:0 დაამარცხა და ჩემპიონობა იზეიმა. იმ შეხვედრაში, კიბეებზეც არ იყო ადგილი დარჩენილი. ეს კი არა, გულშემატკივრებს განათების ბოძებიც "ათვისებული" ჰქონდათ...

ყოველდღიური სპორტული გაზეთი "ლელო"
902
მკითხველის კომენტარები / 0 /
მსგავსი ამბები
რუბრიკის სხვა სიახლეები
;