ეროვნული ლიგა XV ტური: 'საბურთალო'1:0 'დინამო'(თბ) - გასროლა ბოლო წამზე

"საბურთალო"1:0 "დინამო"(თბ)

17.06. თბილისი. მიხეილ მესხი
1:0 გონსალვესი (92. გვარაძის პასით)

საბურთალო (4-2-3-1): კუპატაძე - მარგველაშვილი, რეხვიაშვილი, თედ. გრიგალაშვილი - მამუჩაშვილი, ტერა, ლაკვეხელიანი - კოხრეიძე (84. დიასამიძე), გორგიაშვილი (65. გვარაძე), ვაგნერი - გოშთელიანი (69. ვოლკოვი)

სათადარიგოები: ბ. ქურდაძე ნადარაია, ჩაბრაძე, ალთუნაშვილი
მწვრთნელი: გიორგი ჭიაბრიშვილი

დინამო (4-2-3-1): ბულისკერია - რუხაია, თოთაძე, ლოჩოშვილი, კობოური - ივანისენია, ნ. ნინუა - შულაია, ო. კიტეიშვილი, ერგემლიძე (46. ხარაბაძე) - ზივზივაძე (73. ბაბუნაძე)

სათადარიგოები: მამარდაშვილი, კუცია, პ. კიტეიშვილი ქაფიანიძე
მწვრთნელი: კახა კაჭარავა
არბიტრი: დ. ხარიტონაშვილი

თბილისურ გუნდებს მაყურებელი დიდად არ სწყალობს. მაგრამ დასანანი იყო, ეროვნული ლიგის ლიდერთა შეხვედრა, ფაქტობრივად, ცარიელ სტადიონზე რომ ჩატარდა. ცხადია, გავლენა იქონია მსოფლიოს ჩემპიონატმა. გუშინ საღამოს გერმანია და ბრაზილია თამაშობდნენ...

თამაში გახსნილი,
ტემპი მაღალი...

არადა, "მიხეილ მესხზე" სულაც არ ყოფილა ცუდი თამაში. მატჩი საკმაოდ მაღალ ტემპში დაიწყო და ორივე გუნდი საკმაოდ გახსნილად თამაშობდა.

პირველი სახიფათო მომენტი მე-7 წუთზე გიორგი კოხრეიძემ შექმნა - მისი დარტყმის შემდეგ "დინამოს" მეკარე დემეტრე ბულისკერიამ ბურთი ვერ შეიმაგრა, მაგრამ დამატებაზე გურამ გოშთელიანს თამაშგარე დაუფიქსირდა. მას მე-12 წუთზე ისევ ჰქონდა მომენტი - ფლანგიდან ლუკა ლაკვეხელიანის გადაცემა დავით კობოურმა ცუდად მოიგერია და "საბურთალოს" ფორვარდმა ახლოდან კარს ააცილა.

მალე დინამოელმა აკაკი შულაიამ შეუტია, თუმცა დარტყმა ვეღარ მოახერხა. 22-ე წუთზე კი ნიკა ნინუას ძლიერ "გასროლას" მეკარე ლაზარე კუპატაძე გადაეღობა და გუნდი გადაარჩინა.

ამან "დინამო" გამოაფხიზლა და მწვავედ შეუტია. 28-ე წუთზე კობოურის პასით ბუდუ ზივზივაძეს უნდა დაერტყა, მაგრამ მცველი გადაეღობა და მომენტი განმუხტა. 30-ე წუთზე შულაიამ შეუტია და კუპატაძემ კვლავ საიმედოდ ითამაშა. გავიდა კიდევ ორიოდ წუთი და ისევ ზივზივაძემ სცადა ბედი - ორ მცველს შორის გაძვრა და ძლიერადაც დაარტყა, მაგრამ მეკარე კვლავ საიმედოდ იყო.

43-ე წუთზე ოთარ კიტეიშვილი საჯარიმოში კარგად შეიჭრა და მახვილი კუთხიდან დაარტყა, თუმცა კუპატაძე ამჯერადაც კარგად გამოიყურებოდა.
შესვენებამდე, გოშთელიანი კართან კარგად გაიხსნა, მაგრამ ზუსტად ვერ დაარტყა და გუნდები გასახდელში უგოლოდ გავიდნენ...

პინგ-პონგი

მეორე ნახევარში თამაში პინგ-პონგივით წარიმართა. ორივე გუნდი უტევდა და მომენტებიც იქმნებოდა. მაგრამ თვალში საცემი იყო სიფრთხილეც. რეალური საგოლე მომენტი ჯერ "დინამომ" შექმნა. მე-60 წუთზე, დმიტრო ივანოსენიას პასის შემდეგ, ანგარიშის გახსნა პენალტის ნიშნულთან მყოფ ლევან ხარაბაძეს შეეძლო, თუმცა მარცხენა მცველმა მშვენიერი შანსით ვერ ისარგებლა.

63-ე წუთზე უკვე "დინამო" გადარჩა: ვაგნერ გონსალვესი საჯარიმოსთან მცველებს ეფექტურად გასცდა და ძლიერად დაარტყა, მაგრამ მეკარე ბულისკერიამ გუნდი დროული რეაქციით გადაარჩინა.

დინამოელთა საპასუხო შეტევა ნიკა ნინუამ გაამწვავა - ზივზივაძის თავური არაზუსტი გამოდგა. 68-ე წუთზე უკვე "საბურთალომ" შეუტია და აქ ბურთს უკვე "დინამოს" მცველი გადაეფარა.

გიორგი ჭიაბრიშვილის გუნდმა შეტევები გააგრძელა და "დინამოს" კარს ბექა გვარაძე დაემუქრა. მისი ძლიერი დარტყმა "ცხრიანში" მიდიოდა, მაგრამ ბულისკერიამ ჩინებულად ითამაშა და ბურთი გასაოცარი ნახტომით მოხსნა.

75-ე წუთზე საქმე მის საბურთალოელ კოლეგას მიეცა, რომელმაც ჯარიმიდან ლაშა თოთაძის უძლიერესი დარტყმა მოიგერია. 90-ე წუთზე რეალური მომენტი თამაზ ბაბუნაძეს ჰქონდა, მაგრამ ახლოდან ვერ გაიტანა.

მდევარი შეიცვალა

...თამაში დასასრულს უახლოვდებოდა და, ერთი შეხედვით, ფრედ უნდა დასრულებულიყო. მაგრამ მატჩის ბედი მსაჯის მიერ დამატებულ ბოლო წამებზე გადაწყდა - გვარაძის ფლანგური გადაცემის შემდეგ ვაგნერმა მცველს დაასწრო და თავური დარტყმით "დინამოს" კარის ბადე შეარხია - 1:0.

წელს "საბურთალომ" კონკურენტს ამ ანგარიშით მეორედ მოუგო. ახლა ჭიაბრიშვილის გუნდს 34 ქულა აქვს და მესამე ადგილზე დაქვეითებულ "დინამოს" უკვე 5 ქულით უსწრებს. შესაბამისად, შაბათს მოპოვებული მეორე პოზიცია 30 ქულით "დილამ" შეინარჩუნა.

დღეს
ჩიხურა-ტორპედო
18:00. ივანწმინდა

ყოველდღიური სპორტული გაზეთი "ლელო"
758
მკითხველის კომენტარები / 0 /
მსგავსი ამბები
რუბრიკის სხვა სიახლეები
;