ეროვნული ლიგა XV ტური: 'სიონი' 1:0 'ლოკომოტივი' - რა უცნაური ვინმეა!..

"სიონი" 1:0 "ლოკომოტივი"
17.06. თბილისი. მიხეილ მესხი (სათ)
1:0 სიხარულია (44. ხმალაძის პასით)

სიონი (4-2-3-1): ზარქუა - მინდორაშვილი, ნოზაძე, ს. გურეშიძე, გ. გიორბელიძე - ქიქავა, ხმალაძე - გაფრინდაშვილი, სიხარულია (77. მიქაბერიძე), ლეჟავა (42. მანაგაძე) - ბერიაშვილი (74. უგულავა)

სათადარიგოები: მუჯრიშვილი, კოშკაძე, მანაგაძე, ხეცურიანი, ც. სამუშია
მწვრთნელი: კობა ჟორჟიკაშვილი

ლოკომოტივი (4-2-3-1): ლ. შეროზია - გაბაძე, ნ. ჭანტურია, ლობჟანიძე, უბილავა - ძებნიაური, გვალია - არდაზიშვილი (78. კომახიძე), კიკაბიძე (56. სამურკასოვი), გავაშელიშვილი - ჯიქია (73. ინჯგია)
სათადარიგოები: რ. თევდორაძე, ლ. ქურდაძე, ცნობილაძე, ღონღაძე

მწვრთნელი: ლაშა ჭაღიაშვილი
გაფრთხილება: ლობჟანიძე (43), სიხარულია (73), გვალია (82)
არბიტრი: ბ. ნინუა

უცნაური გუნდია "ლოკომოტივი" - ეროვნული ლიგის ლიდერების დამარცხების შემდეგ, ერთ-ერთ აუტსაიდერ ბოლნისის "სიონს" შეხვდა და ყველა მის გამარჯვებას რომ ელოდა... მოულოდნელად დამარცხდა...

თბილისელებს დისკვალიფიცირებული ოთარ კობახიძე აკლდათ და მის არყოფნაში უფრო გამოჩნდა, რასაც ბევრი მისი თამაშის დროს ვერ ამჩნევდა - "ლოკომოტივის" ფლანგის შემტევი გუნდის ბოლოდროინდელ წარმატებებში ერთ-ერთ მთავარ როლს თამაშობდა...

"სიონმა" კი დაამტკიცა, რომ ბრძოლა ნებისმიერ გუნდთან შეუძლია. მოგების შემთხვევაში მათ გუშინდელ მეტოქესა და ფოთის "კოლხეთთან" ჩამორჩენის შემცირება შეეძლოთ, ხოლო "ლოკომოტივს" ჰქონდა შანსი, 16-ქულიანი "რუსთავი" 2 ქულით ჩამოეტოვებინა...

შანსი ბოლნისელებმა გამოიყენეს, "ლოკომოტივმა" კი წაუგებელი სერია შეწყვიტა. არადა, 26-ე წუთზე თბილისელებს ანგარიშის გახსნა შეეძლოთ, როცა კარში დაარტყეს მამია გავაშელიშვილმა და რატი არდაზიშვილმა, მაგრამ ახლო მანძილიდან ვერ გაიტანეს.

სამაგიეროდ, გატანა ნომინალურმა მასპინძლებმა მოახერხეს. მათ ამის მცდელობა 28-ე წუთზეც ჰქონდათ, როცა საჯარიმოში უმეთვალყურეოდ დარჩენილმა ზვიად სიხარულიამ კარისკენ "გაისროლა" და ბურთს ახალგაზრდა მეკარე ლუკა შეროზია გადაეღობა, რომელიც დებიუტანტის კვალობაზე ჩინებულად გამოიყურებოდა.

თუმცა, 43-ე წუთზე თბილისელებს მეკარემაც ვერ უშველა. ყველაფერი იმით დაიწყო, რომ "სიონის" შემტევი ლაშა ლეჟავა უჩა ლობჟანიძესთან შეტაკების შემდეგ დაშავდა და მოედნის დატოვება მოუხდა. ჯარიმა გიორგი გაფრინდაშვილმა შეასრულა, ბურთს თავით მიმართულება ლევან ხმალაძემ შეუცვალა, "ლოკომოტივის" მცველებმა მოგერიება ვერ შეძლეს და კარის წინ შექმნილი არეულობით ზვიად სიხარულიამ ისარგებლა - 1:0.

ამის შემდეგ ბოლნისელებს "სტანდარტიდან" სხვაობის გაზრდაც შეეძლოთ, როცა კუთხურიდან მოწოდებული ბურთი კარში თავით ხმალაძემ გააგზავნა და მიზანს ოდნავ ააცილა.

მეორე ნახევარში "ლოკომოტივი" ბევრს ეცადა მდგომარეობის გამოსწორებას, მაგრამ ბოლნისელთა საჯარიმოში შეღწევა და თამაშის გამწვავება უჭირდათ, თან ხეირიანად ვერც "სტანდარტულებს" ასრულებდნენ.

ბოლო მცდელობა დავით სამურკასოვს ჰქონდა, რომელმაც 93-ე წუთზე კუთხურთან დანიშნული ჯარიმიდან ბურთი კარში გაუშვა. მაგრამ მეკარე თორნიკე ზარქუამ ყურადღებით ითამაშა, ბურთი მოიგერია და "სიონმა" ნანატრი გამარჯვება მოიპოვა.

საინტერესოა, რომ წელს "სიონმა" 3 მატჩი მოიგო და მათგან ორი - ლიდერთა რისხვად ქცეულ "ლოკომოტივთან". უცნაური გუნდია...

ყოველდღიური სპორტული გაზეთი "ლელო"
355
მკითხველის კომენტარები / 0 /
მსგავსი ამბები
რუბრიკის სხვა სიახლეები