ეროვნული ლიგა. XVI ტური: 'რუსთავი' 2:2 'დილა" - ცინცაძის ბენეფისი ფრეს ეყო

"რუსთავი" 2:2 "დილა"

22.06. თბილისი. მიხეილ მესხი
0:1 ნონიკაშვილი (4), 1:1 ცინცაძე (45), 2:1 ცინცაძე (58), 2:2 ნ. ქავთარაძე (83)

რუსთავი (4-2-3-1): რევიშვილი - გეგეჭკორი, პაპავა, კობახიძე, თ. კირკიტაძე - ცინცაძე, ფონიავა - კვირკვია (64. ბ. ქავთარაძე), ციცქიშვილი, ჩოგაძე - მარცვალაძე (75. მარცვალაძე)

სათადარიგოები: სილაგაძე, ზვიადაძე, ენდელაძე, ბარაბაძე
მწვრთნელი: ვარლამ კილასონია

დილა (4-1-2-3): ბეგაშვილი - მაჩაიძე, კვახაძე, ჩადუნელი, კორიფაძე - რაზმაძე (61. ფანცულაია) - ნონიკაშვილი (36. ნონდი), ლემპტი (73. ფორტესი) - ნ. ქავთარაძე, კოვტალიუკი, რიბეირო

სათადარიგოები: გორდულავა, აშორტია, რაჟამაშვილი, გ. სამუშია
მწვრთნელი: გიორგი დარასელია

გაფრთხილება: ნონიკაშვილი (18), ნონდი (74), გეგეჭკორი (76)
გაძევება: რევიშვილი (45+3. რუსთავი)
არბიტრი: პ. მაჭარაძე

საქართველოს ეროვნული ლიგის მეორადგილოსანი გორის "დილა" თბილისში, "მიხეილ მესხზე" დაუპირისპირდა "რუსთავს". ორივე გუნდისთვის ძალიან მნიშვნელოვანი მატჩი იყო. თუ რუსთაველები ამ ეტაპზე უმაღლეს ლიგაში ადგილის შენარჩუნებაზე ზრუნავენ, "დილას" ევროთასებზე გასვლა ამოუჭრია გულში და თუ საქმე კარგად წავიდა, უარს არც ჩემპიონობაზე იტყვის...

იდეალური სტარტი

"დილასთვის" ეს შეხვედრა მართლაც რომ იდეალურად დაიწყო. მე-4 წუთზე გიორგი დარასელიას მიერ გაწვრთნილი გუნდი დაწინაურდა. გოლი შეაგდო შესანიშნავ ფორმაში მყოფმა ლევან ნონიკაშვილმა, გორული საფეხბურთო სკოლის აღზრდილმა, ვინც "დილას" ერთ-ერთ ლიდერად ყალიბდება.

გოლი კი ასე "გამოიძერწა": აქტიურმა გიორგი კორიფაძემ ფლანგიდან საჯარიმო მოედანში ჩაჰკიდა ბურთი. მცველებმა ის მაინცდამაინც კარგად ვერ ამოიტანეს. ნონიკაშვილი კი ბურთს საჯარიმოს მისადგომებთან ჩაუსაფრდა და ძლიერი დარტყმით გაუტანა ნუკრი რევიშვილს.

უკეთესობა ეტყობა...

გოლის შემდეგ "დილამ", ალბათ, შეგნებულად დაიხია უკან. "რუსთავმა" ბურთი გააკონტროლა და თანდათან მომენტებიც შექმნა. მათე ცინცაძის მიერ უძლიერესად დარტყმული ბურთი გიორგი ბეგაშვილმა მოიგერია. ზოგადად, პოლონეთმოვლილი ცინცაძე ჯერაც ვერ არის ოპტიმალურ სათამაშო ფორმაში, მაგრამ უკეთესობა კი ეტყობა.

ამ მომენტს "დილას" სახიფათო, თუმცა უშედეგო კონტრშეტევა მოჰყვა. მალევე ვიხილეთ პირველი ტაიმის ყველაზე დასამახსოვრებელი ეპიზოდი - ზაზა ციცქიშვილმა კარგად ჩაუდრიბლინგა გორელებს და მათე კვირკვიას გაატანა ბურთი. თავის მხრივ, კვირკვიამაც ძალიან მწვავედ და მოხდენილად ითამაშა - ოთარ მარცვალაძეს გადააწოდა და ანგარიშის გათანაბრება შეეძლო, თუმცა გამოცდილ ფორვარდს ცოტა დააკლდა...

რატომ გააძევეს რევიშვილი?

მთავარი მოვლენები ტაიმის მიწურულს განვითარდა. არბიტრმა პაატა მაჭარაძემ ჯარიმა დანიშნა გორელთა კარის მიმართულებით. ამ დროს მან მეოთხე მსაჯთან მიირბინა და კონსულტაცია გაიარა, რის შემდეგაც მინდვრიდან ნუკრი რევიშვილი გააძევა, როგორც ჩანს - სიტყვიერი შეურაცხყოფისთვის.

ამ ეპიზოდის შემდეგ ვარლამ კილასონიამ მინდვრიდან თემურ ჩოგაძე გაიხმო და სათადარიგო მეკარე სოსო ქარდავა შეუშვა. კაცნაკლულმა "რუსთავმა" სწორედ იმ "სტანდარტულიდან" გაათანაბრა, ზემოთ რომ ვახსენეთ. ციცქიშვილის პასის შემდეგ მათე ცინცაძემ უზადო თავურით შეარხია ბეგაშვილის კარის ბადე - 1:1. ეს მოხდა ტაიმის დამატებულ მე-6 წუთზე...

დილა არ შეეგუა...

ყველასთვის გასაკვირად "რუსთავი" მეორე ტაიმის დასაწყისში წინ გავიდა. ციცქიშვილის წაქცევისთვის ჯარიმა დაინიშნა. მათე ცინცაძემ შესანიშნავად დაარტყა და დუბლი გაიფორმა.

სახიფათო იყო ლეანდრო რიბეიროს დარტყმაც, მაგრამ სოსო ქარდავა ადგილზე დახვდა ბურთს. რუსთაველთა ახალგაზრდა მეკარემ არც ლექსო კვახაძეს გაატანინა თავური. ისიფუ ლემპტის მცდელობა კი არაზუსტი აღმოჩნდა.

"დილა" არ შეეგუა მოვლენათა ასეთ განვითარებას. ალვინ ფორტესი ძალზე აქტიურად ჩაერთო თამაშში და ტექნიკური მოძრაობის შემდეგ კინაღამ შეაგდო. მერე ცინცაძეს ჰქონდა ჰეთ-თრიკის შესრულების შანსი, მაგრამ კარს ზემოდან გადააცილა.

გორელებმა მაინც გაათანაბრეს - ნოდარ ქავთარაძემ უძლიერესი დარტყმით გარდასახა გოლად ლეანდრო რიბეიროს გადაცემა. ამ უკანასკნელს გამარჯვების გოლის გატანაც შეეძლო - კორიფაძის ჩაწოდების შემდეგ ბრაზილიელს 100-პროცენტიანი მომენტი ჰქონდა, მაგრამ ქარდავამ მართლაც რომ დიდებულად ითამაშა და "რუსთავი" გადაარჩინა.

ყოველდღიური სპორტული გაზეთი "ლელო"
767
მკითხველის კომენტარები / 0 /
მსგავსი ამბები
რუბრიკის სხვა სიახლეები
;