ეროვნული ლიგა. XVI ტური: 'სამტრედია' 0:1 'ჩიხურა' - გვჭირდება თუ არა ვიდეორეფერი?

"სამტრედია" 0:1 "ჩიხურა" 

23.06. ლანჩხუთი. ევგრაფი შევარდნაძე
0:1 გაბედავა (52-პენ)

სამტრედია (4-2-3-1): ი. სტურუა - ჩაჩუა, კერძევაძე, ქარქუზაშვილი (81. ა. ნინუა), ოლხოვი - მესიაჩენკო (58. ვეილი), ბაჩიაშვილი - კირკიტაძე (69. გიორ. გიორბელიძე), გიი, ახალაძე - ხაბეიშვილი

სათადარიგოები: ო. სტურუა, ქაშიბაძე, ხაჩიძე, დ. მანჯგალაძე
მწვრთნელი: ბადრი კვარაცხელია

ჩიხურა (4-3-3): ჰამზიჩი - ჩიტეიშვილი, მირცხულავა, მაისაშვილი, მეგრელიშვილი - კაკუბავა (78. ჩიხლაძე), დობროვოლსკი, ჩიკვაიძე - კახაბრიშვილი (46. ლექვთაძე), გაბედავა, ბუღრიძე (65. ცხადაძე)

სათადარიგოები: მწყერაშვილი, იონანიძე, გუგა, ბუხაიძე
მწვრთნელი: სოსო ფრუიძე

გაფრთხილებები: ჩიკვაიძე (5), მეგრელიშვილი (76), ჰამზიჩი (89)
არბიტრი: გ. კიკაჩეიშვილი

ძნელია ამ თამაშზე წერა. მით უფრო, მსოფლიოს ჩემპიონატის დროს. ზუსტად ისე იყო, წლების წინ გიო ახვლედიანმა ქართულ ფეხბურთზე რომ დაწერა - "ის შინაარსით ყველასგან განსხვავდება. არცერთ სტილს არ ჰგავს, რადგან რაც ფეხბურთის არსია, იმას საქართველოში არ ცნობენ. უბრალოდ, ესაა ჯორჯიან ფუტბოლი"...

მსოფლიოს ჩემპიონატის
ფონზე...

მსოფლიოს ჩემპიონატია, ყველა მას უყურებს და ამ დროს უფრო მძაფრია ემოციური ფონი - ბავშვები ცდილობენ წინა დღით ნანახი ფინტი, მოძრაობა, დარტყმა ან პასი გაიმეორონ. მაგრამ საქართველოს ჩემპიონატს უყურებ და გგონია, რომ ის ამ ყველაფრის მიღმა დგას - ტემპი, მოძრაობა არ არის, მოთამაშეები მარტივ თამაშს რაღაცის მოგონებას ამჯობინებენ, კლასიც დაიკარგა, ინდივიდუალიზმიც და კოლექტივიზმიც და, სამწუხაროდ, ძალიან დავეშვით.

ეროვნული ლიგის XVI ტურში ერთმანეთს ევროპალიგაზე გასული ორი გუნდი შეხვდა და, რბილად რომ ვთქვათ, ვერ დატოვა კარგი შთაბეჭდილება. მაგრამ ეს უფრო მსოფლიოს ჩემპიონატის ფონზე, თორემ, ისე ჩვეულებრივი თამაში იყო - არც კარგი, არც ცუდი...

ვიდეორეფერი ჩვენც გვჭირდება

რა თქმა უნდა, იყო ბრძოლა, მომენტები - რა ქნან, "ბოვშებმა", რაც იციან, თავს არ ზოგავდნენ და სულ ხაზსაც ნუ გადავუსვამთ. რამდენიმე ეპიზოდსაც გამოვარჩევთ. მე-17 წუთზე გიორგი გაბედავამ ახლოდან დაარტყა და მეკარე ილია სტურუას ვერ აჯობა.

"სამტრედიას" მომენტებიდან დასამახსოვრებელი ორიოდე იყო: სახიფათოდ დაარტყა დავით კირკიტაძემ, ხოლო 26-ე წუთზე კარისკენ უკვე გიორგი ახალაძემ "გაისროლა", მაგრამ შედეგი არ მოჰყოლია.

44-ე წუთზე ლევან კაკუბავამ ჩინებული გადაცემით საჯარიმოსთან გიორგი გაბედავა მოძებნა, რომელიც მცველს გასცდა და მეკარესთან პირისპირ აღმოჩნდა, მაგრამ გივი ქარქუზაშვილთან ბრძოლაში წონასწორობა დაკარგა და კარგად ვერ დაარტყა. არბიტრმა გოგა კიკაჩეიშვილმა პენალტი დანიშნა და სამტრედიელთა მცველს ყვითელი ბარათი უჩვენა. მაგრამ ლაინსმენთან თათბირის შემდეგ ქართული "ნეიმარი" ვიხილეთ - არბიტრმა გადაწყვეტილება შეცვალა (ყვითელი ბარათიც გააუქმა), რამაც საჩხერელები აღაშფოთა.

ეს ფაქტი ადასტურეებს, რომ ვიდეორეფერი საქართველოს მსოფლიოს ჩემპიონატზე არანაკლებად სჭირდება, მეტად თუ არა. თუმცა, ისიც სათქმელია, რომ თავიდან გაბედავა მცველს თავად ქაჩავდა...
გაბედავამ თავისი გაიტანა

კარგი ეპიზოდი მაინც ვიხილეთ. თამაში ახალი განახლებული იყო, როცა გიორგი ახალაძემ ჩინებულად ითამაშა. სამტერდიელთა ნახევარმცველი საჩხერელთა მცველებს სისწრაფეში ეფექტურად გასცდა და ძლიერადაც დაარტყა - "ჩიხურა" დინო ჰამზიჩმა გადაარჩინა.

კიკაჩეიშვილმა პენალტი მაინც დანიშნა და ამან უკვე სამტრედიელთა უკმაყოფილება გამოიწვია. ირაკლი ბუღრიძე საჯარიმოში შევარდა, სადაც ქარქუზაშვილმა წააქცია. ამჯერად, 11-მეტრიანი დაარტყეს და ეროვნული ჩემპიონატის ბომბარდირმა გიორგი გაბედავამ გოლების მარაგი 10-მდე გაზარდა.

"სამტრედია" მეკარემ დამატებულ წუთზეც გადაარჩინა, როცა კონტრშეტევას დემურ ჩიხრაძე აგვირგვინებდა, მაგრამ სტურუამ დროული რეაგირება მოახდინა. ბოლო წამზე კი შეტევაში "სამტრედიას" მეკარეც ჩაერთო, რითაც საჩხერელებს უნდა ესარგებლათ. მაგრამ სწრაფი კონტრშეტევა გაბედავამ არაზუსტი დარტყმით დაასრულა.

საბოლოოდ, "ჩიხურამ" 1:0 მოიგო და 28 ქულით მეოთხე ადგილზეა. "სამტრედიას" კი მეორე ტურის შემდეგ აღარ მოუგია და 9 ქულით ბოლო ადგილზეა. არადა, 18 დღეში ევროპალიგაზე თამაში ელის და საინტერესოა, ამ მცირე დროში ყოფილი ჩემპიონის ფერიცვალება რა სასაწაულით მოხდება...

ბომბარდირები
გიორგი გაბედავა (ჩიხურა) 10
ლეანდრო რიბეირო (დილა) 8
მიკოლა კოვტალიუკი (დილა) 8
ოთარ კიტეიშვილი (დინამო) 7
ბუდუ ზივზივაძე (დინამო) 6
ლევან კუტალია (ტორპედო) 6

ყოველდღიური სპორტული გაზეთი "ლელო"
913
მკითხველის კომენტარები / 0 /
მსგავსი ამბები
რუბრიკის სხვა სიახლეები
;