ეროვნული ლიგა. XVII ტური: 'კოლხეთი' 3:6 'დინამო' - იქნებ, ახალი ფორვარდი დაიბადა...

29.06. ზესტაფონი. დავით აბაშიძე
1:0 მიხალიოვი (33. იმნაძის პასით), 1:1 თოთაძე (41), 1:2 ო. კიტეიშვილი (59), 1:3 ხარაბაძე (69), 2:3 კვასოვი (75. კაბორეს პასით), 2:3 იმნაძე (80. მახარაძის პასით), 3:4 ერგემლიძე (82. ო. კიტეიშვილის პასით), 3:5 ო. კიტეიშვილი (84. ერგემლიძის პასით), 3:6 ნინუა (89. ერგემლიძის პასით)

კოლხეთი (4-2-3-1): გურგენიძე - ჭეიშვილი (80. ჯიმშელეიშვილი), პონომარიოვი, გოგონაია, კაბორე - დანილოვი, მახარაძე - იმნაძე, კვასოვი, გოგბერაშვილი - მიხალიოვი (77. არზიანი)

სათადარიგოები: პოლტავცევი, კვერნაძე
მწვრთნელი: ვიქტორ დემიდოვი

დინამო (4-2-3-1): ბულისკერია - რუხაია, თოთაძე, კობოური, ხარაბაძე - ნინუა, დარცმელია (89. პ. კიტეიშვილი) - ივანიშვილი (82. ბაბუნიძე), ო. კიტეიშვილი, კუცია (67. ერგემლიძე) - ზივზივაძე

სათადარიგოები: მამარდაშვილი, ზარია, გაბუნია, ქაფიანიძე
მწვრთნელი: კახა კაჭარავა

გაფრთხილება: პონომარიოვი (17), კვასოვი (34), მიხალიოვი (38), ივანიშვილი (50), გოგბერაშვილი(68), გოგონაია (90+1)
არბიტრი: გ. ყრუაშვილი

გავრისკავთ და ვიტყვით, რომ "დავით აბაშიძეზე" საქართველოს ეროვნული ჩემპიონატის მორიგი ტურის ყველაზე თვალსასეირო შეხვედრა გაიმართა. ხუმრობა საქმე ხომ არ არის - ზესტაფონის მთავარ არენაზე შეკრებილმა გულშემატკივარმა ერთბაშად 9 გოლი იხილა...

ბედს არ შეურიგდნენ...

მოულოდნელად, ანგარიში პირობითმა მასპინძლებმა გახსნეს. 33-ე, ლუკა იმნაძის შესანიშნავი გადაცემის შემდეგ, ილია მიხალიოვმა "კოლხეთი" წინ გაიყვანა. მაგრამ ლაშა თოთაძემ ფოთელებს დიდხანს სიხარული არ აცალა და ბრწყინვალედ შესრულებული საჯარიმო დარტყმით, თავის სტილში გაათანაბრა ანგარიში.

მეორე ტაიმი "დინამომ" აქტიურად დაიწყო. ოთარ კიტეიშვილმა პატარა საფეხბურთო შედევრი შემოგვთავაზა - მოხდენილად ჩამოიშორა ორი მეტოქე და მძლავრად დასცხო კარისკენ, ბურთი ხარიხას მოხვდა და ხაზის შიგნით დაეცა. თავის დაზღვევის მიზნით, ბუდუ ზივზივაძემ დაამატა ბურთს, მაგრამ გოლი უკვე გასული იყო და სამართლიანად ჩაეთვალა კაპიტანს.

ამის შემდეგ "დინამოს" უპირატესობა კიდევ უფრო გამოიკვეთა და მალევე თოთაძის გადაცემით გოლი მეკარესთან თითქმის პირისპირ გასულმა ლევან ხარაბაძემ გაიტანა - 1:3.

მაგრამ ფოთელები არ შეურიგდნენ ხვედრს და 5-წუთიან მონაკვეთში წონასწორობა აღადგინეს - ჯერ, იაროსლავ კვასოვმა გამოიჩინა თავი პატერსონ კაბორეს გასწვრივი ფლანგური პასის შემდეგ, მერე კი იმნაძემაც (ვინც აშკარად საუკეთესო იყო "კოლხეთის" შემადგენლობაში) გაიტანა მარტივ სიტუაციაში, როცა კარის წინ ხელს არავინ უშლიდა. ისე კი, ეპიზოდი თამაშგარე მდგომარეობას წააგავდა...

ერგემლიძის როლი

...ცოტა ხნით ადრე კახა კაჭარავამ თამაშში მიხეილ ერგემლიძე ჩართო და, თამამად შეიძლება ითქვას, ახალგაზრდა შემტევმა უდიდესი როლი ითამაშა თავისი გუნდის გამარჯვებაში. გოლი და 2 საგოლე პასი დაახლოებით 25 წუთში - ასეთია ერგემლიძის მონაგარი. ჯერ მისი გოლი მოჰყვა ოთარ კიტეიშვილის კუთხურს, მერე კი მატჩის ერთ-ერთმა მთავარმა გმირმა თავად გაატანინა "დინამოს" კაპიტანს.

"დინამო" მიღწეულზე არ შეჩერდა და ერგემლიძემ ამჯერად ასისტენტობა ნიკა ნინუას გაუწია. ვინ იცის, ჩვენ ძალიან საინტერესო ქართველი ფორვარდის დაბადების მომსწრენიც გავხდით...

კითხვის ნიშნები

ზოგადად, "დინამომ" შეტევაში ძალიან კარგად ითამაშა. სხვა თუ არაფერი, სწორედ ამის დასტურია ფოთელთა კარში გატანილი 6 გოლი. მეორე მხრივ, კითხვის ნიშნები გააჩინა დინამოელ მცველთა გარჯამ. მართალია, ისინი შეტევაში ძალიან კარგად და შედეგიანად ერთვებოდნენ, მაგრამ მათი შეცდომები თვალსაჩინო იყო უშუალოდ მოვალეობის შესრულების დროს.

კაჭარავას შეგირდებმა დამაჯერებელი გამარჯვება მოიპოვეს, მაგრამ გუნდს უსათუოდ სჭირდება გაძლიერება ევროთასების წინ. რა თქმა უნდა, ეს კლუბის ხელმძღვანელობასაც ესმის და იმედია, ამ ცაიტნოტურ ვითარებაშიც გადაიდგმება ნაბიჯები გაძლიერებისკენ, რათა "დინამომ" ღირსეულად დაიცვას ქვეყნის სახელი ევროპალიგაში.

რა თქმა უნდა, გულშემატკივრისთვის სასიამოვნოა ერთ შეხვედრაში 9 გოლის ხილვა, მაგრამ უხვგოლიანი შეხვედრა ყოველთვის როდი ნიშნავს განსაკუთრებულ ხარისხს...

ყოველდღიური სპორტული გაზეთი "ლელო"
1006
მკითხველის კომენტარები / 0 /
მსგავსი ამბები
რუბრიკის სხვა სიახლეები
;