ეროვნული ლიგა. XVIII ტური: 'დინამო' (თბ) 5:0 'დილა' - კიტეიშვილის შოუ და თამაში ცალ კარში

'დინამო' (თბ) 5:0 'დილა'

05.07. თბილისი. დინამო არენა
1:0 ო. კიტეიშვილი (13. ივანისენიას პასით), 2:0 თოთაძე (22), 3:0 ზივზივაძე (25. ო. კიტეიშვილის პასით), 4:0 ო. კიტეიშვილი (39. ივანისენიას პასით), 5:0 ზივზივაძე (59. ო. კიტეიშვილის პასით)

დინამო (4-2-3-1): ბულისკერია - რუხაია, თოთაძე, ლოჩოშვილი, კობოური - ივანისენია, ნინუა (76. ქარდავა) - ერგემლიძე (71. ვაწაძე), ო. კიტეიშვილი (81. ზარია), ივანიშვილი - ზივზივაძე

სათადარიგოები: მამარდაშვილი, კუცია, დარციმელია, ბაბუნაძე
მწვრთნელი: კახა კაჭარავა

დილა (4-1-2-3): ბეგაშვილი - კორიფაძე, მაჩაიძე, კვახაძე, სუხიაშვილი - რაზმაძე - ნონიკაშვილი, ლემპტი (46. ნონდი) - ქავთარაძე, კოვტალიუკი (75. კერელეიშვილი), რიბეირო (46. რაჟამაშვილი)

სათადარიგოები: გულუაშვილი, ფანცულაია, გ. სამუშია, ფორტესი
მწვრთნელი: გიორგი დარასელია

გაფრთხილება: რაზმაძე (22), ნონიკაშვილი (61)
გაძევება: სუხიაშვილი (55)
არბიტრი: გ. ვადაჭკორია

ტურის ცენტრალურ შეხვედრაში ერთმანეთს საქართველოს ჩემპიონატის ორი ფავორიტი, "დინამო" და "დილა" დაუპირისპირდა. კახა კაჭარავას გაწვრთნილი გუნდისათვის ეს იყო გენერალური რეპეტიცია სლოვაკურ "დუნაისკა სტრედასთან" შეხვედრის წინ...

ერთი ტაიმის ამბავი

გორელებთან მატჩს "დინამო" მნიშვნელოვანი დანაკლისით შეეგება. გუნდმა ორი ფლანგელი, აკაკი შულაია და ლევან ხარაბაძე მოისაკლისა. რა თქმა უნდა, ეს ორი მოთამაშე თბილისური კლუბისთვის დიდი ძალაა...

თამაში ორივე გუნდის მხრიდან დაზვერვით დაიწყო. ანგარიში უკვე მე-13 წუთზე გაიხსნა. დინამოელთა შეტევა ოთარ კიტეიშვილმა გამოზომილი და ზუსტი დარტყმით დაასრულა. იმ ეპიზოდში ალბათ უკეთ თამაში მართებდა გორელთა კიპერ გიორგი ბეგაშვილს.

მალევე "დინამოს" კიდევ ერთი საგოლე შანსი შეექმნა და კვლავ შესანიშნავად ითამაშა გუნდის ლიდერმა - კიტეიშვილმა მშვენიერი პასით პირისპირ შეჰყარა ბეგაშვილს ბუდუ ზივზივაძე, თუმცა სტუმართა მეკარემ ამჯერად შესანიშნავად ითამაშა.

"დინამომ" მალევე შეაგდო მეორე გოლი. გორელმა მცველებმა საჯარიმოს მისადგომებთან დასცეს დმიტრო ივანისენია. "სტანდარტი" უზუსტესად შეასრულა ლაშა თოთაძემ და თავისი გუნდის უპირატესობა ორბურთიანი გახადა.

ცოტა ხანში ანგარიში უკვე გამანადგურებელი გახდა. თბილისელთა კონტრშეტევას ისევ კიტეიშვილი აგვირგვინებდა. მის მიერ დარტყმული ბურთი ბეგაშვილმა ხელში ვერ შეიმაგრა, ზივზივაძე კი საჭირო დროს და საჭირო ადგილას აღმოჩნდა.

"დინამომ" დიდხანს არც მეოთხე გოლამდე ალოდინა ქომაგი. კარგი შეტევა უზუსტესი დარტყმით კვლავ კიტეიშვილმა დაასრულა. ლამაზი გოლი გამოვიდა - ისეთი, ფეხბურთის გურმანს რომ ასიამოვნებდა.

ბრუნდებიან...

მეორე ტაიმი "დილასთვის" ძალიან ცუდად დაიწყო. მეკარესთან პირისპირ გადიოდა კიტეიშვილი, რომელიც ანზორ სუხიაშვილმა აკრძალული ილეთით შეაჩერა. არბიტრმა გიორგი ვადაჭკორიამ სავსებით სამართლიანად გააძევა მინდვრიდან დამნაშავე.

"დინამო" ამაზე არ გაჩერდა. მატჩის უდავო გმირმა, კიტეიშვილმა, შესანიშნავი გადაცემა გაუკეთა ზივზივაძეს, რომელმაც პარტნიორს გარჯა წყალში არ ჩაუყარა. ოთარმა კიდევ ერთხელ გვასიამოვნა.

დარჩენილ დროში "დინამოს" თავი აღარ მოუკლავს და ეს ბუნებრივიცაა, რადგან სულ მალე "დუნაისკა სტრედასთან" გასვლითი შეხვედრაა, რომლის წინაც გუნდმა აუცილებლად უნდა აირიდოს თავიდან გაუთვალისწინებელი დანაკარგები.

"დინამოში" უკვე ითამაშა მათე ვაწაძემ, ვინც ახლახან დაუბრუნდა მშობლიურ კლუბს დანიური "სილკებორგიდან". შეცვლაზე შევიდნენ ბაქარ ქარდავა და გიორგი ზარია - ისინი კარგა ხნის განმავლობაში უქმობდნენ ტრავმის გამო და ევროთასების წინ "დინამოს" კარგ ფორმასთან ერთად ესეც სასიამოვნოა.
"დინამომ" გვიჩვენა, რომ "დუნაისკა სტრედასთან" შეხვედრას მართლაც კარგ ფორმაში ეგებება - "დილასთან"მატჩმა ეს ნათლად გვიჩვენა.

ყოველდღიური სპორტული გაზეთი "ლელო"
950
მკითხველის კომენტარები / 0 /
მსგავსი ამბები
რუბრიკის სხვა სიახლეები
;