ეროვნული ლიგა. XVIII ტური: 'სამტრედია' 1:3 'საბურთალო' - ქალაქელები შეუჩერებელნი არიან

"სამტრედია" 1:3 "საბურთალო"

04.07. ლანჩხუთი. ევგრაფი შევარდნაძე
0:1 ვოლკოვი (20), 0:2 კოხრეიძე (31. გვარაძის პასით), 1:2 გიი (38. პ), 1:3 გონსალვესი (81. დიასამიძის პასით)

სამტრედია (3-5-2): ი. სტურუა - ჩაჩუა, ფატიჩი, ჯგერენაია - დ. კირკიტაძე, ბაჩიაშვილი (73. ოლხოვი), კერძევაძე, ახალაძე (76. ა. ნინუა), ულიანოვი (88. გიორ. გიორბელიძე) - გიი, ხაბეიშვილი

სათადარიგოები: ო. სტურუა, მანჯგალაძე, ქარქუზაშვილი, მესიაჩენკო
მწვრთნელი: ლევან ჯოხაძე

საბურთალო (4-3-3): კუპატაძე - მარგველაშვილი, რეხვიაშვილი, თედ. გრიგალაშვილი (61. ალთუნაშვილი) - გვარაძე (68. დიასამიძე), ტერა, გორგიაშვილი, ლაკვეხელიანი - ვოლკოვი (56. გოშთელიანი), კოხრეიძე, ვაგნერი

სათადარიგოები: ბ. ქურდაძე, ტატანაშვილი, გულიაშვილი, მალი
მწვრთნელი: გიორგი ჭიაბრიშვილი

გაფრთხილებები: ფატიჩი (10), თედორე გრიგალაშვილი (37), კოხრეიძე (40), ბაჩიაშვილი (62), ალთუნაშვილი (71), გონსალვესი (90+2)
არბიტრი: გიორგი ყრუაშვილი

"საბურთალომ" ზედიზედ მეოთხე მატჩი მოიგო და 8 ქულით უსწრებს თბილისის "დინამოს", რომელიც დღეს გორის "დილას" შეხვდება. "სამტრედიას" კი 9 ქულა დარჩა და მხოლოდ იმის წყალობით არ არის ბოლო ადგილზე, რომ ფოთის "კოლხეთს" 6 ქულა ჩამოაკლეს...

სწორი დასკვნები

სულ რაღაც სამი წლის წინ, როდესაც "საბურთალო" ეროვნულ ლიგას უშინაურდებოდა, ამ გუნდების შეხვედრის შედეგი ადვილი გამოსაცნობი იყო. გია ცეცაძის "სამტრედია" აღმავლობის გზაზე იდგა და "ეროსი მანჯგალაძეზე" "საბურთალო" 8:2 გაანადგურა.

წლების გადასახედიდან ჩანს, რომ ამ მატჩიდან თბილისელებმა და მისმა მთავარმა მწვრთნელმა, გიორგი ჭიაბრიშვილმა სწორი დასკვნები გამოიტანეს, მოღონიერდნენ, საკადრო რევოლუციებით საქმე არ გაირთულეს და შედეგი სახეზეა - სამი წლის შემდეგ, "საბურთალო" "სამტრედიას" ლიდერის რანგში ესტუმრა.

ეს მიმდინარე სეზონში ჭიაბრიშვილის გუნდის საუკეთესო თამაში ნამდვილად არ იყო. მეტიც, პირველი ტაიმის დასაწყისსა და მეორე ნახევრის შემდეგ გუნდი მოშვებული ჩანდა და სამტრედიელებს მეტი კლასი რომ ჰქონოდათ, ანგარიშს გაათანაბრებდნენ.

საქმეც ისაა, რომ ამ მოშვებულმა "საბურთალომ" ახლა იოლად სძლია იმ გუნდს, ვისთანაც სამი წლის წინ განადგურდა - გულდასაწყვეტია, რომ წლების განმავლობაში ნაშენები "სამტრედია" ევროპის ლიგას ასეთ დღეში ხვდება.

ცეცაძე ჯერ
არ არის მთავარი...

გია ცეცაძის "სამტრედიაში" დაბრუნება ცნობილი ამბავია. მაგრამ ამ შეხვედრაში მთავარი მწვრთნელის გრაფაში ლევან ჯოხაძე ეწერა. ხოლო მწვრთნელი, რომელსაც "სამტრედიას" ყველაზე დიდი წარმატებები უკავშირდება, გუნდს მხოლოდ ევროპის ლიგის მატჩებისთვის დაუბრუნდა - სამტრედიელები ნიკა კვეკვესკირისა და ჯაბა კანკავას ყაზახურ "ტობოლს" 10 და 19 ივლისს დაუპირისპირდებიან.

ცხადია, ცეცაძე უკვე გუნდს ავარჯიშებს და საკადრო გადაწყვეტილებებსაც იღებს. მაგრამ ის კარგი მწვრთნელია და არა ჯადოქარი, რომ არეული გუნდი ერთ დღეში შეცვალოს.

მერე რა იქნება, არავინ უწყის. რა გუნდს გაიყვანს ცეცაძე ევროპალიგაზე, ესეც უცნობია. მაგრამ უმძიმესი სამუშაო რომ ელის, ეს ფაქტია. "სამტრედიას" მარტის შემდეგ აღარ მოუგია და ამ შეხვედრამაც გამოაჩინა, რომ გუნდი მორალურად გატეხილია და რაც მთავარია, შემსრულებლების დეფიციტია.

ჭიაბრიშვილის ხერხი

...ლანჩხუთის სტადიონის მაღალსაფარიან და არც ისე საუკეთესო მინდორზე საბურთალოელებმა ბურთის გაგორება მაინც მოახერხეს. თუმცა ჭიაბრიშვილმა ხერხი იხმარა და ბურთი მხოლოდ დაბლა არ გორავდა, თბილისელები ჩაკიდებებსაც ხშირად მიმართავდნენ...

სტუმრებმა ანგარიში მალე გახსნეს: მე-20 წუთზე ლუკა ლაკვეხელიანის ჩაწოდებაზე მეკარე ილია სტურუა შეცდა, ბურთი ხელიდან გაუვარდა და კარის წინ პოლიციელივით ჩასაფრებულმა დავით ვოლკოვმა ანგარიში გახსნა - 0:1

23-ე წუთზე, "საბურთალოს" სხვაობის გაზრდის რეალური შანსი ჰქონდა: გიორგი კოხრეიძე საჯარიმოში ფლანგიდან შევარდა და კარგ პოზიციაში თორნიკე გორგიაშვლი მოძებნა, რომელმაც ზუსტად, მაგრამ სუსტად დაარტყა და მეკარემ ბურთი უპრობლემოდ დაამიწა.

31-ე წუთზე "საბურთალომ" მეორე მაინც გაიტანა: ბექა გვარაძის მოწოდებული კუთხურის შემდეგ მცველებს კოხრეიძემ დაასწრო და თავით ზუსტად დაარტყა - 0:2.

ასეთი უპირატესობის მოპოვების შემდეგ სტუმრები მოეშვნენ, სამტრედიელები კი გამოფხიზლდნენ და 38-ე წუთზე პენალტი მოიპოვეს: კუთხურიდან მოწოდებულ ბურთზე ზაურ ხაბეიშვილს თედორე გრიგალაშვილმა ხელი ჰკრა და ინტერს გიიმ უნაკლოდ შეასრულა პენალტი - 1:2.

ცივი შხაპი

"სამტრედიამ" მეორე ნახევარიც აქტიურად დაიწყო და გათანაბრების რამდენიმე შანსი ჰქონდა. მაგალითად, გიის ფლანგური გადაცემის შემდეგ კარში კირკიტაძე რომ არტყამდა, მაგრამ ოდნავ ააცილა.

52-ე წუთზე, კუთხურიდან მოწოდებული ბურთი კარში დაუხანებლად კირკიტაძემ გააგზავნა - მას ლაკვეხელიანი გადაეფარა და ვითარება განმუხტა. სამტრედიელებს ქულის გადარჩენის იმედი გაუჩნდათ. მაგრამ "საბურთალომ" ამ იმედებს ცივი შხაპი გადაასხა.

სტუმრები ქულების დაკარგვის საფრთხემ გამოაფხიზლა და თამაში ისევ გაამწვავეს. 65-ე წუთზე, ვაგერ გონსალვესმა მეკარესთან პირისპირ გურამ გოშთელიანი დატოვა, რომელმაც მეკარეს ვერ აჯობა. 74-ე წუთზე კი სტურუას კარს უკვე გონსალვესი დაემუქრა და მეკარე ისევ საიმედო იყო.

სახიფათო გამოდგა 79-ე წუთზე საბურთალოელთა სწრაფი კონტრშეტევა, რომელიც გონსალვესმა წამოიწყო, ელვინ ტერამ და კოხრეიძემ განავითარეს და გოშთელიანმა ვერ დააგვირგვინა. მაგრამ სტუმრებმა კუთხური მოიპოვეს, რომელიც გეგა დიასამიძემ შეასრულა, გოშთელიანმა თავით კარში გაუშვა ბურთი და სტურუამ "სამტრედია" აშკარა გოლისგან იხსნა.

81-ე წუთზე "საბურთალოს" შეტევას მეკარე ვეღარ გადაეღობა: გონსალვესმა ბურთი საჯარიმოში დიასამიძეს გაუთამაშა და მეკარეს შორეულ კუთხეში ძლიერად და ზუსტად დაურტყა - 1:3.

ყოველდღიური სპორტული გაზეთი "ლელო"
719
მკითხველის კომენტარები / 0 /
მსგავსი ამბები
რუბრიკის სხვა სიახლეები
;