ეროვნული ლიგა. XX ტური: 'ჩიხურა' 1:2 'დინამო' (თბ): როცა 'ჩიხურას' ძალა აღარ ჰქონდა...

'ჩიხურა' 1:2 'დინამო' (თბ)

31.08. ივანწმინდა
0:1 ზივზივაძე (7. შულაიას პასით), 1:1 გაბედავა (28. კაკუბავას პასით), 1:2 კუცია (72. შულაიას პასით)

ჩიხურა (4-4-2): ჰამზიჩი - ჩიტეიშვილი, მირცხულავა, მაისაშვილი, ჩიკვაიძე - კახაბრიშვილი, დობროვოლსკი (76. ჩიხლაძე), კაკუბავა, ბუღრიძე - გაბედავა, სარდალიშვილი (88. ბუხაიძე)

სათადარიგოები: მწყერაშვილი, ზ. კაპანაძე, იონანიძე, მეგრელიშვილი
მწვრთნელი: სოსო ფრუიძე

დინამო (4-2-3-1): სიკაჩი - რუხაია, ქაფიანიძე (74. ლოჩოშვილი), თოთაძე, ხარაბაძე - ივანისენია, ნინუა - შულაია, კუცია (76. ქარდავა), კობოური (65. შენგელია) - ზივზივაძე

სათადარიგოები: ბულისკერია, ვაწაძე, ქოჩლაძე, ერგემლიძე
მწვრთნელი: კახა კაჭარავა

გაფრთხილება: ჩიკვაიძე (50), დობროვოლსკი (57), კუცია (66), რუხაია (79)
გამოუყენებელი პენალტი: ნინუა (55. დინამო)
არბიტრი: გ. ვადაჭკორია

ამ შეხვედრას განსაკუთრებული ინტერესით ველოდით. ერთმანეთის წინაშე წარდგა ორი კლუბი, რომელიც ცოტა ხნის წინ საქართველოს პრესტიჟს ევროთასებზე იცავდა. უნდა ითქვას, თამაშმა მოლოდინი გაამართლა და ის თავიდან ბოლომდე საინტერესო ორთაბრძოლაში წარიმართა...

კურიოზი და ორი პროტესტი

თავიდანვე უნდა აღინიშნოს, რომ ორივე გუნდის უკანახაზელები ხშირად ცდებოდნენ, რაც სახიფათო მომენტების სიმრავლეს განაპირობებდა და მცირერიცხოვანი მაყურებელიც ხშირად ღელავდა.

თამაში ისე დაიწყო, "დინამო" უკეთესს ვერ ინატრებდა. თბილისელთა მრავალსვლიანი კომბინაციის შემდეგ აკაკი შულაიამ თავით კარგად მოათვინიერა ბურთი და ორ მცველს შორის გაუჭრა ბუდუ ზივზივაძეს, რომელმაც ახლო მანძილიდან უპრობლემოდ აიღო საჩხერელთა კარი.

ამის შემდეგ უკვე "ჩიხურას" ჯერი დადგა. ჯერ მიხეილ სარდალიშვილი უგდებდა ბურთს თავზე სტეფან სიკაჩს, მაგრამ ძალა დააკლო, მერე კი იყო პროტესტი - ირაკლი ბუღრიძემ მსაჯს მიანიშნა, რომ მისი დარტყმის შემდეგ ერთ-ერთ დინამოელს ბურთი ხელზე მოხვდა და 11-მეტრიანი უნდა დანიშნულიყო. ცხადია, ამას შედეგი არ მოჰყოლია. გიორგი გაბედავასაც ჰქონდა მწვავე მომენტი, მაგრამ ვერ შეაგდო...

"ჩიხურამ" მაინც გაათანაბრა ანგარიში, თან კურიოზულ ვითარებაში - სიკაჩმა ბურთი თამაშში დროულად ვერ შეიყვანა, ყურადღებაც მოადუნა და ამ დროს ლევან კაკუბავა წამოეპარა და მეკარისგან დავარდნილი ბურთი გაბედავას მიუგორა, ბომბარდირმა კი დაახლოებით 18 მეტრიდან დაუცველ კარში ჩაახვია.
ახლა დინამოელებმა გააპროტესტეს ეპიზოდი - კაკუბავამ სიკაჩს ბურთი წესების დარღვევით აართვაო, მაგრამ არბიტრმა გიორგი ვადაჭკორიამ, ეტყობა, ასეთი რამ ვერ დაინახა.

როცა ვერგატანა  უფრო რთულია...

გოლის შემდეგ სოსო ფრუიძის გუნდი მწვავედ ათამაშდა. ლაშა ჩიკვაიძემ კარგად ითამაშა გადმოვარდნილ ბურთზე და ძლიერად დაარტყა - "დინამო" გოლს გადაურჩა. იქვე, საჩხერელებმა კარგად დაატრიალეს ბურთი. მათ შორის ერთ-ერთმა საუკეთესომ, ბუღრიძემ, თავით შორეულ კუთხეს კი დაუმიზნა, მაგრამ ააცილა.

მეორე ტაიმში პირველი მომენტი კახა კაჭარავას გაწვრთნილებს ჰქონდათ. ზივზივაძის მიერ დარტყმულ ბურთს საჩხერელთა მეკარე დინო ჰამზიჩი ადგილზე დახვდა. სულ მალე კი "დინამომ" გოლის გატანის ასპროცენტიანი შანსი გაანიავა...

ამ ეპიზოდზე დაწვრილებით უნდა ვთქვათ - დინამოელთა მცველმა ლუკა ქაფიანიძემ, ვინც პირველ მატჩს თამაშობდა ძირითად შემადგენლობაში, მეტოქის საჯარიმოში შესანიშნავი პასი მიაწოდა შულაიას, რომელსაც ორი საჩხერელი ეთამაშებოდა. რატომღაც, გამოცდილმა ჩიკვაიძემ თამაშის წესი დაარღვია. უმაღლესი საფეხბურთო სასჯელის აღსრულება ნიკა ნინუამ ითავა. ჰამზიჩმა უხეიროდ შესრულებული დარტყმის შემდეგ ბურთის მოგერიება შეძლო, დამატებაზე კი ზივზივაძემ რაღაც სასწაულით ვერ შეაგდო. ეს ისეთი მომენტი იყო, ვერგატანა რომ უფრო რთულია...

მეორე ტაიმში "დინამო" მეტოქეზე უკეთესი იყო. არ ვიცით, "ჩიხურამ" სასურველზე მეტი ძალა შეალია ევროთასებს, თუ მიზეზი სხვა რამ არის, მაგრამ ფაქტია - მასპინძლებს ნაადრევად გამოეცალათ ძალები.

...72-ე წუთზე, მატჩის საუკეთესო მოთამაშე შულაიამ შესანიშნავი სოლო შემოგვთავაზა და ასეთივე გადაცემა გაუკეთა გიორგი კუციას, ვისაც სიზუსტემ არ უმტყუნა - 1:2.

ყოველდღიური სპორტული გაზეთი "ლელო"
184
მკითხველის კომენტარები / 0 /
მსგავსი ამბები
რუბრიკის სხვა სიახლეები