ეროვნული ლიგა. XXII ტური: 'რუსთავი' 0:2 'საბურთალო' - აგვისტოში ენერგიაც ისვენებს

'რუსთავი' 0:2 'საბურთალო'

25.08. თბილისი. მიხეილ მესხი
0:1 მარგველაშვილი (22. რეხვიაშვილის პასით), 0:2 ვოლკოვი (75. ვაგნერის პასით)

რუსთავი (4-3-3): მიგინეიშვილი - ღონღაძე, პაპავა, ბუგულოვი, ჩუკურა - თარხნიშვილი, გუჯაბიძე (46. კლიმიაშვილი), ციცქიშვილი - ხ. კვარაცხელია (46. კვირკვია), ლობჯანიძე, ფონიავა (76. ბ. ქავთარაძე)

სათადარიგოები: სეფიაშვილი, ჩოგაძე, ზვიადაძე, გადრანი
მწვრთნელი: ვარლამ კილასონია

საბურთალო (4-2-3-1): ლ. კუპატაძე - ჩაბრაძე, მარგველაშვილი, რეხვიაშვილი ლაკვეხელიანი - ალთუნაშვილი (80. თარგამაძე), ცნობილაძე (26. ტერა) - ვაგნერი, გორგიაშვილი, ვოლკოვი - გოშთელიანი (59. კოხრეიძე)

სათადარიგოები: ბ. ქურდაძე, ნადარაია, ტატანაშვილი, დიასამიძე
მწვრთნელი: გიორგი ჭიაბრიშვილი

გაფრთხილება: თარხნიშვილი (28), ვოლკოვი (79)
არბიტრი: პ. მაჭარაძე

ზაფხულის შემდეგ ეროვნულ ლიგაზე გადართვა ძნელია. ზაფხულის ხვატისა და იმედგაცრუებების შემდეგ გულშემატკივარი ჩვენს ფეხბურთს კიდევ უფრო ნაკლებად სწყალობს...
მაგრამ მიმდინარე სეზონში "საბურთალო" ისეთ ფეხბურთს თამაშობს, მის სანახავად წასვლა ნამდვილად ღირს...

გაიზარდნენ...

...არის ამ გუნდში რაღაც პერსპექტიული და საინტერესო. თავისი გამოკვეთილი სტილით გიორგი ჭიაბრიშვილის გუნდი საერთო მასაში აშკარად გამოირჩევა და ისევე მოულოდნელად და ლამაზად შემოიჭრა ქართულ საფეხბურთო სივრცეში, როგორც თავის დროზე - "მრეტები", "თბილისი", "ზესტაფონი", "სამტრედია". თან "საბურთალო" თამაშიდან თამაშამდე იზრდება. ეს მატჩმაც დაადასტურა.

არადა, "რუსთავთან" გამარჯვება ნამდვილად არ ყოფილა "საბურთალოს" საუკეთესო მატჩი ამ სეზონში, უფრო პირიქით - შეიძლება, ერთ-ერთი ყველაზე ცუდი თამაშიც იყო, მაგრამ საჭირო 3 ქულა მაინც მოიპოვა. სწორედ ეს აჩვენებს, რომ ჭიაბრიშვილიც თავის გუნდთან ერთად გაიზარდა.

არეულის დასალაგებლად...

"რუსთავი" სეზონის დასაწყისში ისე აირია, ახლა ვარლამ კილასონიას კატასტროფულად არ ჰყოფნის დრო საიმისოდ, რომ გუნდი თავის გემოზე გადააწყოს და დაალაგოს. კი ბატონო, კილასონიას ეს კარგად ეხერხება და, ადრე თუ გვიან, გუნდს მაინც ააწყობს, მაგრამ... დრო ბევრი აღარ არის და ეს სეზონის ბოლოსკენ თუ მოხერხდება.

რუსთაველებს აკლიათ სწორედ ის, რითაც მეტოქემ აჯობა - პარტნიორს თვალდახუჭული რომ გრძნობ, ანუ, შეთამაშება. არადა, გუნდი საკმაოდ კარგი ფეხბურთელებითაა დაკომპლექტებული. თუმცა ესეც დროთა განმავლობაში მოდის...

კილასონიას ადრინდელი გუნდებიც გვახსოვს, არაფრისგან რომ ქმნიდა და მოთამაშეებსაც საუკეთესო კუთხით გამოაჩენდა ხოლმე. მაგრამ არეულმა სტარტმა და ზაფხულის პაუზისას შემადგენლობის საკმაოდ მკვეთრმა ცვლილებამ თავისი ქნა...

იმ დღეს რუსთაველები თუ რამით გამოირჩეოდნენ, ეს იყო გულშემატკივარი - ფანკლუბი, რომელიც გუნდს გულიანად ქომაგობდა.

მცველების გოლი

...ანგარიში ისე გაიხსნა, ერთი შეხედვით რომ ამას არაფერი მოასწავებდა. დამუშავებული "სტანდარტივით" იყო - ლუკა ლაკვეხელიანმა ბურთი შორეულ ძელთან ჩაჰკიდა, სადაც "მეორე სართულის" "სპეციალისტმა" გიორგი რეხვიაშვილმა თავით კართან გახსნილ მეორე ცენტრალურ მცველს, გაგი მარგველაშვილს უპასა და - 1:0.

დასანანია დაჩი ცნობილაძის უიღბლობა. თბილისელთა საყრდენ ნახევარმცველს წელს ძირითად შემადგენლობაში თამაშის შანსი პირველად მიეცა და... 26-ე წუთზე, ტრავმის გამო, მოედანი იძულებით დატოვა.

...ტემპი დაბალი იყო, თამაში - ძალიან კორექტული. ეტყობა, აგვისტოში ენერგიაც "ისვენებს". პირველ ტაიმში ცოცხალი ეპიზოდი მე-40 წუთზეც ვიხილეთ, როცა "საბურთალომ" სწრაფი კონტრშეტევა წამოიწყო, გურამ გოშთელიანმა მეკარესთან პირისპირ დატოვა ვაგნერ გონსალვეში, რომლის დარტყმა ომარ მიგინეიშვილმა მოიგერია და გუნდი აშკარა გოლს გადაარჩინა.

რამდენიმე წუთში "საბურთალოც" გადარჩა - ზაზა ციცქიშვილმა ერთი შეხებით "გაისროლა", მაგრამ კარს ოდნავ ააცილა.

ლამაზი კომბინაციით...

"საბურთალო" ბურთს და თამაშს მეორე ტაიმშიც აკონტროლებდა. 58-ე წუთზე თბილისელებმა პატარა საფეხბურთო სპექტაკლი დადგეს. დავით ვოლკოვმა საჯარიმოში ბურთი ეფექტურად და სწრაფად გაუთამაშა თორნიკე გორგიაშვილს, რომელმაც კარის წინ გოშთელიანი დატოვა, მაგრამ... ამ უკანასკნელმა კარის აღება ვერ მოახერხა.

კარგი იყო ეპიზოდი, რომელიც 73-ე წუთზე ვიხილეთ - გია ჩაბრაძემ საჯარიმოში ჩააწოდა და ვოლკოვმა მშვენიერი პოზიციიდან ააცილა.

ძალიან ლამაზი იყო კომბინაცია, რომელსაც მეორე გოლი მოჰყვა - გიორგი კოხრეიძემ მეტოქეს ბურთი აართვა, ლაკვეხელიანს გაუთამაშა, სწრაფად დაიძრა საჯარიმოსკენ, სადაც ვოლკოვი მოძებნა, მერე ბურთს თითოჯერ შეეხნენ სანდრო ალთუნაშვილი და ჩაბრაძე, რომელმაც საჯარიმოში შეტევა ვაგნერს გაუგრძელა, ამან კი კარის ხაზთან ვოლკოვს უპასა და სხვაობა ორამდე გაიზარდა.

მე-80 წუთზე, საბურთალოელთა სწრაფი კონტრშეტევის შემდეგ "რუსთავი" მესამე გოლს გადაურჩა. "მასპინძელს" კი თამაშის გადარჩენის შანსი 82-ე წუთზე ჰქონდა, როცა თორნიკე თარხნიშვილის გადაცემის შემდეგ კართან გახსნილმა ბექა ქავთარაძემ თავით ახლოდან ააცილა. სახიფათო იყო კოხრეიძის შეტევაც, რომელსაც მიგინეიშვილი გადაეღობა.

ყოველდღიური სპორტული გაზეთი "ლელო"
808
მკითხველის კომენტარები / 0 /
მსგავსი ამბები
რუბრიკის სხვა სიახლეები
;