ეროვნული ლიგა. XXII ტური: 'სამტრედია' 1:0 'კოლხეთი' - ხუთი თვის შემდეგ

'სამტრედია' 1:0 'კოლხეთი'

26.08. თბილისი. მიხეილ მესხი (სათ)
1:0 კოშმანი (26. ლიპარტიას პასით)

სამტრედია (3-4-3): პოგორილი - გურული, ფატიჩი, გოგიაშვილი - ჩაჩუა, მამასახლისი (67. ფანცულაია), ენდელაძე, ჯგერენაია - ლიპარტია, ტუღუში, კოშმანი (88. ერისთავი)

სათადარიგოები: დ. კუპატაძე, სმირნოვი, კერძევაძე, მესიაჩენკო
მწვრთნელი: გიორგი ცეცაძე

კოლხეთი (4-4-2): კნიგა - კერელეიშვილი, ციკოლია, ჭეიშვილი, კაბორე - აშორტია (73. ყანჩაშვილი), დოროშენკო, ტყემალაძე, კაკულია (61. ძაძამია) - გოგბერაშვილი (84. ჭეჭელაშვილი), იმნაძე

სათადარიგოები: ნანავა, მჭედლიშვილი
მწვრთნელი: ნუგზარ თვარაძე

გაფრთხილება: გოგბერაშვილი (11), ფატიჩი (33), ტყემალაძე (56), ჯგერენაია (80), პოგორილი (90+2)
გაძევება: ლაშა მჭედლიშვილი (90+4. სათადარიგოებიდან)
არბიტრი: გ. ვადაჭკორია

"მიხეილ მესხის" სათადარიგო მოედანზე აუტსაიდერთა შეხვედრა შედგა. "სამტრედია" ფოთის "კოლხეთს" მხოლოდ ორი ქულით უსწრებდა და შანსი ორივე გუნდს ჰქონდა.

აქედან მომდინარეობდა თამაშის საკმაოდ დაძაბული ხასიათი. ფოთის "კოლხეთი" აქტიური თამაშით შეტევის წამოწყებას ცდილობდა, თუმცა სტუმრებს შეტევების ორგანიზება და სახიფათო მომენტების შექმნა უჭირდა.

"სამტრედიამ" კი მოწინააღმდეგე მატჩის პირველივე ნახევარში შეაწუხა. მე-18 წუთზე, ცეცაძის გუნდს ანგარიშის გახსნა შეეძლო, მაგრამ ოლეგ მამასახლისის ძლიერი დარტყმა კარს მცირე მანძილით ასცდა, ხოლო 25-ე წუთზე ავთო ენდელაძის უძლიერეს "გასროლას" სტუმართა მეკარე დენის კნიგა გადაეღობა და სტუმრები გადაარჩინა.

საერთოდ, ეპიზოდებში იგრძნობოდა, რომ "სამტრედია" ცეცაძის ხელწერას იბრუნებს - გუნდი ბურთის კონტროლს, აზრიანად გათამაშებას და სწრაფი კონტრშეტევების ორგანიზებას ცდილობდა. 26-ე წუთზე მათ ეს მოახერხეს: ჯაბა ლიპარტიამ ერთი შეხებით ბურთი მცველებში გააძვრინა, იგორ კოშმანი კი ქარივით გაიქცა და მეკარესთან პირისპირ დარჩენილმა სამტრედიელთა თავდამსხმელმა საქართველოს ეროვნულ ლიგაში სადებიუტო გოლი გაიტანა - 1:0.

თამაში ახალი განახლებული იყო, "სამტრედიას" უპირატესობის გაზრდის შანსი რომ მიეცა, თუმცა გიორგი ჯგერენაიას გადაცემის შემდეგ კარგ პოზიციაზე გასული კოშმანის დარტყმა სტუმართა მეკარემ მოიგერია.

დამატებულ დროში, პეტერსონ კაბორეს გადაცემის შემდეგ, ლუკა იმნაძე საჯარიმოში ჯგერენაიასთან ბრძოლისას წაიქცა და კოლხები პენალტს ითხოვდნენ. არბიტრმა გიორგი ვადაჭკორიამ თამაშის გაგრძელება ბრძანა, რამაც სათადარიგოთა სკამზე მყოფი ლაშა მჭედლიშვილის უკმაყოფილება გამოიწვია და წითელი ბარათითაც დაისაჯა.

ანგარიში თამაშის ბოლომდე არ შეცვლილა და "სამტრედიამ" 5 მარტის შემდეგ (როცა თბილისში "ლოკომოტივი" 2:1 დაამარცხა) პირველად გაიმარჯვა, თანაც - უშუალო კონკურენტთან, რომელსაც 5 ქულით უსწრებს.

ყოველდღიური სპორტული გაზეთი "ლელო"
878
მკითხველის კომენტარები / 0 /
მსგავსი ამბები
რუბრიკის სხვა სიახლეები
;