ეროვნული ლიგა. XXIV ტური: 'სამტრედია' 3:5 'დილა' - მატჩის მიმოხილვა

'სამტრედია' 3:5 'დილა'
14.09. თბილისი. მიხეილ მესხი (სათ)
0:1 კოვტალიუკი (28. რიბეიროს პასით), 0:2 რიბეირო (47. კოვტალიუკის პასით), 1:2 ტუღუში (60. მამასახლისის პასით), 1:3 რიბეირო (72), 2:3 ერისთავი (81-პენ), 3:3 ლიპარტია (85. ენდელაძის პასით), 3:4 ჯოოფი (90+2. კორიფაძის პასით), 3:5 კოვტალიუკი (90+5. ჯოოფის პასით)

სამტრედია (4-2-3-1): პოგორილი - ჩაჩუა, გოგიაშვილი, გურული, ჯგერენაია - შ. კერძევაძე (54. ენდელაძე), მამასახლისი - ტუღუში, ლიპარტია, კოშმანი (72. ერისთავი) - კუჭუხიძე

სათადარიგოები: კუპატაძე, სმირნოვი, ა. ნინუა, მესიაჩენკო
მწვრთნელი: გიორგი დარასელია

დილა (4-2-3-1): გუგეშაშვილი - თორ. გრიგალაშვილი, ჩადუნელი, სანტოსი, სუხიაშვილი - გოგუა (87. ჯოოფი), ლემპტი (61. რაჟამაშვილი) - ნ. ქავთარაძე (74. კორიფაძე), ნონიკაშვილი, რიბეირო - კოვტალიუკი

სათადარიგოები: ბეგაშვილი, ნონდი, კობერიძე, კორიფაძე, გ. სამუშია
მწვრთნელი: რამაზ სოღოლაშვილი

გაფრთხილებები: ენდელაძე (55), ჩაჩუა (88), ჩადუნელი (90+5)
არბიტრი: გ. ყრუაშვილი

ეს ისეთი მატჩი იყო, ქართული ფეხბურთის რეკლამად რომ გამოდგება. ჩვენ ვერ დავიკვეხნით ტოპლიგების დონის ფეხბურთით, მაგრამ ზოგჯერ ჩვენი გუნდები ისეთებს გამოაცხობენ, რომელთა ხილვაც, სულ მცირე, დაგაინტრიგებთ მაინც.
ძნელი გასახსენებელია, ეროვნული ლიგის ერთ შეხვედრაში ამდენი რეალური საგოლე მომენტი როდის შეიქმნა...

ყოფილების წინააღმდეგ

მთავარი მწვრთნელის რანგში "სამტრედიას" პირველად გაუძღვა გიორგი დარასელია, რომელიც თავის ყოფილ გუნდს დაუპირისპირდა. ეს ამ შეხვედრის მთავარი ინტრიგა იყო - მოარგებდა სამტრედიელთა ახალი დამრიგებელი თავის ყოფილ კლუბს გასაღებს?

მიუხედავად წაგებისა, სამტრედიელებს 0:0-ზე რეალური საგოლე მომენტები ჰქონდათ, როცა ბექა ტუღუშის საჯარიმოს შემდეგ გუნდი მეკარე ლუკა გუგეშაშვილმა გადაარჩინა. მოვლენებს გავუსწრებთ და ვიტყვით - მართალია, ეს ახალგაზრდა კიპერი ერთ გოლზე შეცდა, მაგრამ აშკარაა, რომ მისი სახით საქართველოს პერსპექტიული მეკარე ეზრდება...

რეალურად, მატჩი გორელთა ლეგიონერებმა მოიგეს. მათ დაიწყეს საქმე და ბოლომდე მიიყვანეს. ანგარიში 28-ე წუთზე, ლამაზი კომბინაციის შემდეგ, მიკოლა კოვტალიუკმა გახსნა - ლეანდრო რიბეირომ ბურთი გოგიტა გოგუას გაუთამაშა, შემდეგ ორ მცველს შორის გაძვრა და მეკარესთან პირისპირ დატოვა უკრაინელი თავდამსხმელი, რომელსაც კარის აღება აღარ გასჭირვებია - 0:1.

მოულოდნელი ინტრიგა

47-ე წუთზე გატანილი გოლიც იმავე ლეგიონერების მონაწილეობით გავიდა: რიბეირომ კარის წინ კოვტალიუკი დატოვა, რომლის დარტყმაც მეკარე სერგეი პოგორილიმ მოიგერია, მაგრამ კოვტალიუკმა თავით კარის წინ რიბეიროს დაუგდო და ბრაზილიელმა "დილას" უპირატესობა გაზარდა - 0:2.

მე-60 წუთზე გორელთა ლიდერი რიბეირო შეცდა, საჯარიმოსთან ბურთი დაკარგა და სამტრედიელთა საყრდენმა ოლეგ მამასახლისმა საჯარიმოში ტუღუში მოძებნა, ამან კი ერიკ სანტოსი ცრუ მოძრაობით გააცურა და შორეულ კუთხეში მოარტყა - 1:2.

72-ე წუთზე რიბეირომ ორბურთიანი უპირატესობა აღადგინა. ამ ეპიზოდში გიორგი ერისთავი შეცდა, რომელიც ბურთს უკან აბრუნებდა, რიბეირომ კი ჩაჭრა გადაცემა და კარისკენ მოედნის ცენტრიდან ისეთი სისწრაფით დაიძრა და გაიტანა, ხელი ვერავინ შეუშალა - 1:3.

თითქოს ყველაფერი გარკვეული იყო, მაგრამ სამტრედიელებმა ბოლომდე იბრძოლეს და ქულის გადარჩენის შანსიც მიეცათ. ბოლო წუთები დრამატულად წარიმართა. ერისთავმა თავისი შეცდომა გამოასწორა: 81-ე წუთზე სამტრედიელთა თავდამსხმელი მცველს გაექცა და მეკარესთან პირისპირ დარჩენილი - ლუკა გუგეშაშვილმა მოცელა. პენალტი თავად გამოიყენა - 2:3.

ოთხ წუთში მასპინძელთა ნახევარმცველმა ჯაბა ლიპარტიამ საჯარიმოს სიახლოვიდან ძლიერად დაარტყა, გუგეშაშვილს ბურთი ხელიდან გაუვარდა და წონასწორობა პირველად აღდგა - 3:3.

დაკარგული შანსი

"სამტრედიამ" ქულის მოპოვების შანსი დამატებულ დროში დაკარგა, სამაგიეროდ, გადამწყვეტი როლი ითამაშა 87-ე წუთზე შესულმა გაირა ჯოოფმა - დავით რაჟამაშვილის მიერ შესრულებულ ჯარიმაზე გიორგი კორიფაძემ საჯარიმოში მცველს და მეკარეს ერთად დაასწრო და კარის წინ მარტო დარჩენილმა გამბიელმა თავდამსხმელმა "დილა" წინ გაიყვანა - 3:4.

ქულის გადასარჩენად "სამტრედია" მთელი გუნდით შეტევაში გადავიდა და უსწრაფესი კონტრშეტევა გამოეპარა - ჯოოფმა კარისკენ დაძრული სამი თანაგუნდელი დაინახა და კოვტალიუკი მოძებნა, რომელმაც მე-5 დამატებულ წუთზე საბოლოო ანგარიში დააფიქსირა - 3:5 და გორელთა უმნიშვნელოვანესი 3 ქულა!

საინტერესოა, რომ განვლილ 23 ტურში "დილას" მონაწილეობით გამართულ მატჩებში 74 გოლი გავიდა, ანუ 3 გოლზე მეტი საშუალოდ მატჩში. მოკლედ, გორელთა წყალობით უხვგოლიანი "თრილერები" გამოწერილი გვაქვს.

ყოველდღიური სპორტული გაზეთი "ლელო"
976
მკითხველის კომენტარები / 0 /
მსგავსი ამბები
რუბრიკის სხვა სიახლეები
;