ეროვნული ლიგა. XXX ტურის მატჩი. 'კოლხეთი 1:1 'სიონი': მხოლოდ ორი უამრავიდან

27.10. ფოთი. პარკი არენა
1:0 აფხაზავა (76. კაკულიას პასით), 1:1 ლევან ხმალაძე (90+1. კირკიტაძის პასით)

კოლხეთი (3-4-3): კნიგა - აფხაზავა, ციკოლია, კაბორე - კერელეიშვილი (85. მთივლიშვილი), ტყემალაძე, პრიჩინენკო, ძაძამია (61. დოროშჩენკო) - აშორტია (81. ხატიაშვილი), იმნაძე, კაკულია
სათადარიგოები: მიქავა, ჭეჭელაშვილი, მახარაძე, შალიკაშვილი
მწვრთნელი: ვიქტორ დემიდოვი

სიონი (4-2-3-1): ზარქუა - მინდორაშვილი, თომაშვილი, გურეშიძე, გიორბელიძე - დათუნაიშვილი (81. უგულავა), ხმალაძე - ლეჟავა (46. ისიანი), კოშკაძე (71. სიხარულია), დ. კირკიტაძე - მახარობლიძე
სათადარიგოები: ორთოიძე, ნოზაძე, მანაგაძე, მიქაბერიძე
მწვრთნელი: თემურ შალამბერიძე
გაფრთხილება: ძაძამია (19), სიხარულია (73), იმნაძე (77), მთივლიშვილი (85)
არბიტრი: გ. ყრუაშვილი

ფოთის "პარკი არენაზე" გამართული მატჩი ბოლნისელებმა ძალიან კარგად დაიწყეს და ვერავინ წარმოიდგენდა, რომ ასეთი კარგი თამაშის შემდეგ გუნდს ქულის გადარჩენაც სანატრელი გაუხდებოდა...

რაც შეეხება ფოთის "კოლხეთს", ის მიზანთან ახლოს იყო და შეეძლო კიდეც მოგება, კონკურენტთან სხვაობის მინიმუმამდე შემცირება, რაც ეროვნულ ლიგაში დარჩენის შანსს გაუზრდიდა...

სიონის დომინირებით

თემურ შალამბერიძის გუნდმა აგრესიული პრესინგით მეტოქეს სათამაშო სივრცე შეუზღუდა, სწრაფი კონტრშეტევებით კი კოლხების დაცვაში თავისუფალ ზონებს ადვილად პოულობდა და რეალურ საგოლე მომენტებს ქმნიდა.

"სიონი" პირველ ტაიმში უპირატესობას ფლობდა, მაგრამ მეტოქეს ვერაფერი მოუხერხა. საიმედოდ თამაშობდა მეკარე დენის კნიგაც. მან ორ ეპიზოდში გადაარჩინა გუნდი: მე-2 წუთზე ალეკო კოშკაძის მიერ შესრულებული საჯარიმოს შემდეგ ბურთს ნახტომში გადაეფარა, მე-8 წუთზე კი კოშკაძე კარის წინ ბიძინა მახარობლიძეს ტოვებდა, მაგრამ კარიდან გამოვიდა და ვითარება განმუხტა.

ბიძინა შეტევაში

საინტერესოა, რომ ბოლნისელთა დამრიგებელმა თემურ შალამბერიძემ შემტევი ნახევარმცველი ბიძინა მახარობლიძე ცენტრალური თავდასხმელის პოზიციაზე დააყენა. რაც უნდა უცნაური იყოს, ამ მოულოდნელმა გადაწყვეტილებამ გაამართლა და ბიძინაც ზეაქტიური იყო - ბევრს მოძრაობდა, საჯარიმოში კარგად იხსნებოდა, სულ კარზე იყო დაგეშილი და კიდევ რამდენიმე რეალური საგოლე მომენტი შექმნა.

25-ე წუთზე, საჯარიმოში შევარდნილმა გურამ გიორბელიძემ მახარობლიძე პენალტის ნიშნულთან მოძებნა, დარტყმა კი ნახტომში მოიგერია მეკარე კნიგამ და კოლხები აშკარა გოლისგან იხსნა.

37-ე წუთზე "სიონის" თავდამსხმელი უკვე დავით კირკიტაძის ფლანგური ჩაწოდების დაგვირგვინებას ცდილობდა და ამჯერად მცველი გადაეღობა, ხოლო 38-ე წუთზე გურამ მინდორაშვილის ფლანგურ გადაცემას მიმართულება თავით შეუცვალა და კნიგამ გუნდი ისევ გადარჩინა.

შეცვლილი კოლხეთი

მეორე ტაიმში ვითარება შეიცვალა. მასპინძლები მოედანზე სრულიად შეცვლილი განწყობით გავიდნენ, გააქტიურდნენ და 51-ე წუთზე ანგარიშის გახსნის რეალური შანსი მიეცათ. საჯარიმოსთან ლევან კაკულიამ ძლიერად დაარტყა და ბურთი "ცხრიანში" მიდიოდა, საიდანაც მეკარე თორნიკე ზარქუამ "მოხსნა" და "სიონი" აშკარა გოლს გადაარჩინა.

69-ე წუთზე კი სტუმრები უკვე მინდორაშვილმა იხსნა, რომელმაც კირილ დოროშჩენკოს გადაცემა მოიგერია და ლუკა იმნაძეს დარტყმის საშუალება არ მისცა.
კოლხები არ ჩერდებოდნენ. მალე ვაკო ტყემალაძემ შეუტია და ზარქუამ კვლავ საიმედოდ ითამაშა, 74-ე წუთზე კი კაკულიას ახლოდან შეეძლო გატანა, მაგრამ მიზანს ააცილა.

კოლხებმა ანგარიში მაინც გახსნეს: 76-ე წუთზე, კაკულიას კუთხურის შემდეგ, მურად აფხაზავამ მცველებს დაასწრო და ლამაზი თავურით შეარხია ბადე - 1:0.

ბოლო წამებზე გადარჩენა

"სიონი" მხოლოდ ამის შემდეგ გამოფხიზლდა და მთელი ძალებით შეუტია. 86-ე წუთზე სტუმრები საჯარიმოში ვილი ისიანის წაქცევისთვის პენალტს ითხოვდნენ, მაგრამ არბიტრმა თამაშის გაგრძელება ბრძანა.

90-ე წუთზე, მინდორაშვილის ჩაწოდების შემდეგ, მცველმა ბურთი ცუდად მოიგერია, დამატებაზე კი ჯაბა უგულავამ თავით დაარტყა და ბურთი ახლა კარის ხაზიდან გამოიტანეს...

ბოლნისელთა შეტევები გაგრძელდა. ფოთელებმა გამარჯვება დამატებულ დროში გაუშვეს ხელიდან: მარცხენა ფლანგიდან კირკიტაძის მშვენიერი გადაცემის შემდეგ კარის წინ უმეთვალყურეოდ დარჩენილმა ლევან ხმალაძემ საბოლოო ანგარიში დააფიქსირა - 1:1.

ყოველდღიური სპორტული გაზეთი "ლელო"
587
მკითხველის კომენტარები / 0 /
მსგავსი ამბები
რუბრიკის სხვა სიახლეები
;