ეროვნული ლიგა. XXXII ტური: საბურთალომ ხარაიშვილის დუბლით სამტრედიას მოუგო

28 ოქტომბერს, საქართველოს საფეხბურთო ჩემპიონატის 32-ე ტური სამტრედიაში გამართული მატჩით გაიხსნა, რომელშიც ადგილობრივმა "სამტრედიამ" თბილისის "საბურთალოს" უმასპინძლა და ანგარიშით 0:2 დამარცხდა.

ეს უჩა სოსიაშვილისთვის პირველი წაგებაა "სამტრედიას" თავკაცის თანამდებობაზე.

დავით აბაშიძის სახელობის სტადიონზე დუბლი გიორგი ხარაიშვილმა მიითვალა, რომელმაც ანგარიში 28-ე წუთზე, დავით კოხრეიძის გადაცემის შემდეგ გახსნა. ხარაიშვილმა მეორე გოლი 65-ე წუთზე გაიტანა, ასისტენტობა კი მას კვლავაც კოხრეიძემ გაუწია.

საბურთალოელთა თავდამსხმელის ანგარიშზე მიმდინარე ჩემპიონატში გატანილი 13 გოლია. ამ მაჩვენებლით ის ბომბარდირთა დავაში დიმიტრი ტატანაშვილს გაუთანაბრდა, ლიდერი კი 25 გოლით ირაკლი სიხარულიძეა.

"სამტრედიასთან" გამარჯვებით "საბურთალომ" 53 ქულა დააგროვა და მესამე ადგილოსან "სამტრედიასთან" (61) სხვაობა შეამცირა.

დღესვე მოგვიანებით გაიმართება კიდევ ორი მატჩი - "დილა"-"ტორპედო" და "ჩიხურა"-"დინამო" (თბ), ტური კი ხვალ, 29 ოქტომბერს, "ლოკომოტივი"-"კოლხეთისა" და "შუქურა"-"დინამოს" (ბთ) შეხვედრებით დასრულდება.

331
მკითხველის კომენტარები / 0 /
მსგავსი ამბები
რუბრიკის სხვა სიახლეები