ეროვნული ლიგა. XXXIV ტურის წინათქმა: ჩემპიონი? შეიძლება ამ ტურშიც...

სანაკრებო მატჩებით გამოწვეული თითქმის ორკვირიანი პაუზა დასრულდა და დღეს, 18 ნოემბერს, ეროვნული ლიგა განახლდება. ეს იყო ბოლო პაუზა ჩემპიონატში. სეზონის ბოლომდე სამი ტურიღაა დარჩენილი. თანაც, ამ სამი ტურის მნიშვნელობას თავი რომ დავანებოთ, სხვა ფაქტორიც ექნებათ გასათვალისწინებელი ეროვნული ლიგის გუნდებს - როგორი საქმეა, სეზონის ფინიშზე, 9 დღის განმავლობაში, 3 მატჩის ჩატარება?!

სატურნირო მდგომარეობის მხრივ, ოფიციალურად ჯერ არაფერია გარკვეული. თუმცა, არსებობს რამდენიმე ვარიანტი საიმისოდ, რომ სწორედ ამ უქმეებზე გაირკვეს ბევრი რამ. უპირველეს ყოვლისა, ჩემპიონის გამოვლენას ვგულისხმობთ - იმისთვის, რომ თბილისის "დინამომ" წელიწადნახევრიანი პაუზის შემდეგ კვლავ მოიგოს ქვეყნის უმთავრესი ჯილდო, ამ ტურში თავად უნდა გაიმარჯვოს, ხოლო მისმა ერთადერთმა კონკურენტმა ქუთაისის "ტორპედომ" - ვერ მოიგოს.

საჩემპიონოს გარდა, ეროვნულ ლიგაში სხვაც არაერთი საინტრიგო თემაა. "სამტრედიას" დარჩენილ სამ ტურში 1 ქულაც ჰყოფნის, III ადგილი რომ დაიბევოს. IV ადგილზე კი სულაც 3 გუნდი აცხადებს პრეტენზიას, ხოლო ცხრილის ქვედა ნაწილში კვლავაც ბევრი რამაა გაურკვეველი. მოკლედ, მოახლოებული ტურიც დიდ ინტერესსა და ინტრიგას გვპირდება და, საერთოდ, ჩემპიონატის ფინიშიც...

18.11. სამტრედია. ეროსი მანჯგალაძე. 14:00
სამტრედია-კოლხეთი
ურთიერთშეხვედრები
36: +11 =9-16, 39-55
I-II-III წრე: 2:1, 1:1, 3:1

საქართველოს აწ უკვე ექსჩემპიონმა ბოლო ორი მატჩი წააგო და ამ ტურში აუცილებლად ეცდება რეაბილიტაციას საკუთარი გულშემატკივრების თვალში. როგორც აღვნიშნეთ, "სამტრედიას" დარჩენილ სამ ტურში 1 ქულაც ჰყოფნის, ჩემპიონატი III ადგილზე რომ დაასრულოს.

ისე, ურიგო შედეგი არ უნდა იყოს, როცა პერიფერიული გუნდი ბოლო სამ სეზონს ლიდერთა სამეულში ამთავრებს: ჯერ იყო ვერცხლის მედლები, მერე - ოქროსი და ახლა - ბრინჯაოსი! თანაც, "სამტრედიას" ახალი დამრიგებლის, უჩა სოსიაშვილისთვისაც ვერ იქნება ჩვეულებრივი ამბავი საპრიზო სამეულში მოხვედრა: 28 წლის ასაკში ბევრი მწვრთნელი ვერ დაიკვეხნის საქართველოს ჩემპიონატის ორგზის ბრინჯაოს პრიზიორობასა და, რაც მთავარია, ჩემპიონობას!..

მასპინძლები დარჩენილ სამ ტურში როგორმე მოიპოვებენ III ადგილის გასანაღდებელ იმ ერთ ქულას. აი, "კოლხეთისთვის" კი, ეს მატჩი განსაკუთრებით მნიშვნელოვანია: წინა ტურში მოპოვებული, მართლაც ნანატრი გამარჯვების შემდეგ, ალექსანდრ შტელინის გუნდმა ბოლოადგილოსან "შუქურასთან" სხვაობა ხუთ ქულამდე გაზარდა, რაც იმას ნიშნავს, რომ უშუალო კონკურენტთან შედარებით, ფოთელებს აშკარად მეტი შანსი დარჩათ, რომ პლეი აუტში იასპარეზონ.

დაბოლოს, ამ წყვილის უცნაურობაზეც: მიმდინარე სეზონში ეს მართლაც უიშვიათესი შემთხვევაა, როცა ორივე გუნდი მოედანზე ისე გავა, რომ არც ერთი დისკვალიფიცირებული ფეხბურთელი არ ეყოლება.

18.11. ბათუმი. რაგბი არენა. 14:00
შუქურა-დინამო (თბ)
ურთიერთშეხვედრები
9: +0 =2 -7, 4-23
დისკვალიფიკაცია: გიორგი სომხიშვილი, რომან პომაზანი (ორივე შუქურა) - ბაქარ ქარდავა (დინამო)
I-II-III წრე 0:5, 1:4, 1:1

უცნაურია, მაგრამ ფაქტია: სატურნირო ცხრილში საპირისპირო პოლუსებზე მყოფი გუნდების დაპირისპირება ამ ტურის ყველაზე საინტრიგო მატჩია. ეს ის შემთხვევაა, როცა გამოკვეთილი აუტსაიდერისა და ერთპიროვნული ლიდერის თამაშში დაფიქსირებული ნებისმიერი შედეგი ჩვეულებრივ ამბად უნდა აღვიქვათ.

თავად განსაჯეთ: წაგების შემთხვევაში, მასპინძლები ძალიან მიუახლოვდებიან ქვედა ლიგას (ამ შემთხვევაში, "კოლხეთის" შედეგიც იქნება გასათვალისწინებელი). სამაგიეროდ, შესაძლო გამარჯვებით, თბილისის "დინამო" გადადგამს დიდ ნაბიჯს ჩემპიონობისკენ და დარჩენილ ორ ტურში 3 ქულაც ეყოფა მორიგი ტიტულის მოსაპოვებლად.

თუმცა, როგორც ზემოთ ვთქვით, არსებობს იმის ალბათობაც, რომ "დინამომ" სწორედ ამ ტურში იზეიმოს ჩემპიონობა, ოღონდ, გვეეჭვება, რომ "ტორპედო" იყოს "თანახმა" მოვლენების ასეთ განვითარებაზე...

საქართველოს ჩემპიონატების ისტორიაში "შუქურას" არასდროს დაუმარცხებია თბილისის "დინამო". ქობულეთელებს ეს ამ სეზონში შეეძლოთ და ძალიან ახლოსაც იყვნენ მიზანთან, როცა III წრის მატჩში გიორგი შაშიაშვილის გუნდს რამდენიმე წამი დააკლდა მიმდინარე ჩემპიონატის, ალბათ, ყველაზე ხმაურიან სენსაციამდე...

სეზონის ერთ-ერთ გადამწყვეტ მატჩს "შუქურა" სერიოზული საკადრო პრობლემებით ხვდება. თუმცა, უფრო უარეს დღეშია მეტოქე - სანაკრებო პაუზის გამო, "დინამოს" თითქმის ყველა ფეხბურთელი, სერგეი ლიტოვჩენკოსა და ლაშა სალუქვაძის გარდა, საქართველოს ეროვნულ თუ სხვადასხვა ასაკობრივ ნაკრებში იყო გამოძახებული.

18.11. თბილისი. მიხეილ მესხი. 16:00 (LIVE II არხზე)
ჩიხურა-ტორპედო
ურთიერთშეხვედრები
17: +7 =5 -5, 22-18
დისკვალიფიკაცია: დიმიტრი ტატანაშვილი (ჩიხურა)
I-II-III წრე: 1:2, 0:3, 2:0

ტურის კიდევ ერთი საინტერესო მატჩი - იმერული დერბი, რომელსაც... თბილისმა უნდა უმასპინძლოს. თან არ დაგვავიწყდეს, რომ ეს იქნება საქართველოს თასის ფინალის ერთგვარი რეპეტიციაც - 2 დეკემბერს ხომ გორში ერთმანეთს სწორედ ეს გუნდები დაუპირისპირდებიან...

ფინალამდე ჯერ კიდევ სამი კვირაა და ესეც არ იყოს, ორივე გუნდს ჩემპიონატშიც დარჩათ საკმარისზე მეტი მოტივაცია. მოგეხსენებათ, "ჩიხურას" ჯერ კიდევ აქვს IV ადგილის დაკავების შანსი, ოღონდ, მისმა ორმა კონკურენტმაც ("ლოკომოტივი", "საბურთალო") მაქსიმალურად უნდა... დაკარგონ ქულები.

აი, "ტორპედო" კი, ერთდროულად ორივე ფრონტზე აგრძელებს მაქსიმალური მიზნებისთვის ბრძოლას და ქუთაისელთა ასეთი ამბიციური მიზნებიც, რა თქმა უნდა, მისასალმებელია.

ცალკე თემაა მწვრთნელების ტაქტიკური დუელიც, მით უფრო, რომ "ტორპედოს" ამჟამინდელი თავკაცი კახა ჩხეტიანი, ფეხბურთელობისას, გარკვეული პერიოდის განმავლობაში სოსო ფრუიძის შეგირდი გახლდათ...

18.11. გორი. თენგიზ ბურჯანაძე. 18:00
დილა-ლოკომოტივი
ურთიერთშეხვედრები
28: +4 =8 -16, 19-43
დისკვალიფიკაცია: პედრინიო (დილა) - მამუკა კობახიძე (ლოკომოტივი)
I-II-III წრე: 3:3, 0:2, 2:4

ესეც საინტრიგო მატჩია, სადაც ასევე ვერც ერთ გუნდს ვერ მივაკუთვნებთ ფავორიტის სტატუსს. მასპინძლები ეროვნულ ლიგაში ადგილის შენარჩუნებისთვის იბრძვიან, სტუმრებს კი მშვენიერი შანსი აქვთ, IV ადგილზე გავიდნენ.

ერთი შეხედვით, "დილას" მეტ-ნაკლებად კომფორტული პოზიცია აქვს - VII ადგილზეა (რომელიც ლიგაში დარჩენის გარანტიას იძლევა) და პლეი აუტის ზონისგან 4 ქულა აშორებს. ამას გარდა, გორელები კალენდარსაც ვერ დაემდურებიან. ანუ, ისეთი სიტუაციაა, გიორგი დარასელიას "დილა", ფაქტობრივად, საკუთარ თავზეა დამოკიდებული.

არანაკლები სატურნირო მოტივაცია აქვს "ლოკომოტივსაც". გიორგი დევდარიანის გუნდი ურთიერთშეხვედრებში კი ჩამორჩება "საბურთალოს", მაგრამ თავის უშუალო კონკურენტისგან განსხვავებით, ბევრად უკეთესი კალენდარი აქვს. "საბურთალოს" დარჩენილი სამივე მატჩი ძლიერ მოტივირებულ მეტოქეებთან უწევს.

18.11. ბათუმი. რაგბი არენა. 20:00
დინამო (ბთ)-საბურთალო
ურთიერთშეხვედრები
7: +2 =1 -4, 4-11
დისკვალიფიკაცია: დაჩი ცნობილაძე (საბურთალო)
I-II-III წრე: 0:2, 0:1, 0:5

ბათუმურმა მატჩმა, რომლითაც მთავრდება ტური, ბევრ კითხვას უნდა გასცეს პასუხი: მასპინძლებმა ეს მატჩი რომ ვერ მოიგონ, უკვე ძალიან დიდი ალბათობით, პლეი აუტისთვის მოუწევთ მზადება. არადა, აჭარლებს მოტივირებული მეტოქეები ჰყავთ ბოლო სამ ტურში...

ჩემპიონატის ასეთ გადამწყვეტ ეტაპს ბათუმის "დინამო" უსიამოვნო სერიით (4 მოუგებელი მატჩი) ხვდება. "დინამოში" მთავარ მწვრთნელად ახლახან მისულ ასლან ბალაძეს გვარიანი მუშაობა დასჭირდება გუნდში ფსიქოლოგიური მიკროკლიმატის გასაუმჯობესებლად.

თავის მხრივ, არანაკლები პრობლემები უნდა ჰქონდეს მის ახალგაზრდა ოპონენტ გიორგი ჭიაბრიშვილსაც - "საბურთალოს" ფეხბურთელთა ძალიან დიდი ჯგუფი ხომ სანაკრებო პაუზის დროს საქართველოს სხვადასხვა ასაკობრივ ნაკრებში იყო გამოძახებული...

ბომბარდირები
ი. სიხარულიძე (ლოკომოტივი) 25
ბ. მიქელთაძე (დინამო თბ) 15
დ. ტატანაშვილი (ჩიხურა) 13
გ. ხარაიშვილი (საბურთალო) 13
გ. კუხიანიძე (ტორპედო) 11
თ. კაპანაძე (ტორპედო) 11.

(იბეჭდება მცირე ცვლილებით)
ყოველდღიური სპორტული გაზეთი "ლელო"
1401
მკითხველის კომენტარები / 0 /
მსგავსი ამბები
რუბრიკის სხვა სიახლეები
;