'ეროვნული ლიგის დაფინანსების პრიორიტეტები შესაცვლელია'

გულშემატკივრის ხმა ყველაზე მნიშვნელოვანი და საინტერესოა. ეს ხალხი ამომრჩეველივითაა, რომელსაც უნდა აუცილებლად უსმინო, რადგან მათ უყვართ ქართული ფეხბურთი და ისინი უკეთეს ხვალინდელ დღეზე ფიქრობენ.

ერთი მათგანი გიორგი კანდელაკია - ქართული ფეხბურთის მოყვარულებსა და სოციალურ ქსელში აქტიურობით გულშემატკივრებში კარგად ცნობილი პიროვნება. საინტერესო, გონებამახვილი და აქტიური გულშემატკივარია.

მან ფეხბურთის ფედერაციის პრეზიდენტს, ლევან კობიაშვილს ეროვნული ლიგის დაფინანსების შეცვლის წინადადებით მიმართა. შესაძლოა, მისი წინადადება საკამათოა და არ ვეთანხმებოდეთ, მაგრამ ამ თემაზე პოლემიკის დაწყება ნამდვილად ღირს.

"ბატონო ლევან, ქართული საკლუბო ფეხბურთი არის უფსკრულში. ვხედავ, რომ ცდილობთ განვითარებას, ინფრასტრუქტურის მოწყობას, რაც ძალიან კარგია და ამისთვის დიდი მადლობა. მაგრამ იქნებ ფონდის დაფინანსების მიზანი შეიცვალოს და მომავალი წლისთვის თანხების გადანაწილებისას პრიორიტეტი იყოს ევროთასებზე გამსვლელი გუნდები, სხვანაირად ამ უფსკრულიდან ვერასდროს ვერ ამოვალთ" - წერს კანდელაკი.

მის დაფინანსების პრიორიტეტების შეცვლის აუცილებლობას ასე ასაბუთებს: "ყველა ჩვენი ზომის ქვეყანაში გამოკვეთილია რამდენიმე ძლიერი გუნდი, რომლებიც ევროთასებზე ყოველ წელს სტაბილურად თამაშობენ.

ასევე არიან სუსტი გუნდები, რომლებიც ამ გუნდებს ამარაგებენ. ფედერაციისთვის მნიშვნელოვანი უნდა იყოს საერთაშორისო წარმატებები და ეს საერთაშორისო წარმატებები ფინანსების გარეშე ვერანაირად ვერ მოვა, ქვედა ლიგებში ამხელა ფულის დახარჯვა ფულის წყალში გადაყრაა.

აქცენტი ევროთასებზე უნდა გაკეთდეს, მეორე ლიგაში საბაზისო თანხა 700,000 ლარი ძალიან ბევრია. ზოგიერთ ამ გუნდს კერძო მეპატრონე ჰყავს და ნება იბოძონ და ფული დახარჯონ. კერძო მფლობელები ჰყავთ "გაგრას", "ვიტ ჯორჯიას", "შევარდენს", "ნორჩი დინამოს" და "მერანს" და მათთვის 400-ათასიანი საბაზისო დაფინანსებაც სრულიად საკმარისი იქნება. ასევე მესამე ლიგაშიც 250 ათასი ლარი თითოეულ გუნდზე ბევრია - სამოყვარულო ჩემპიონატია და ცოტა თანხა აქაც უნდა მოაკლდეს და უმაღლეს ლიგას დაემატოს".

კანდელაკი ამაში მთავარი ლიგის გუნდების ფინანსური მდგომარეობიდან გამოსავალს ხედავს: "ჩვენი პრიორიტეტი უნდა იყოს უმაღლესი ლიგის დონე - მისი დონე კი დღევანდელ მდგომარეობაში კატასტროფულია. ამიტომ ევროთასებზე მონაწილე გუნდებს მეტი თანხები უნდა ჰქონდეთ, რომ კლუბი შესაბამისად გააძლიერონ.

ნამდვილად არ ღირს ამხელა ფულის ხარჯვა მეორე-მესამე ლიგაში დაფინანსების გამო ხელოვნურად წარმოქმნილ გუნდებზე. და ეს თანხებიც მკაცრად უნდა იყოს გაკონტროლებული. დიდი მადლობა, რასაც აკეთებთ - ყველაფერი ნამდვილად მოსაწონია, მაგრამ დონის მოსამატებლად უმთავრესი უმაღლესი ლიგა უნდა იყოს. იმედია, რამე შეიცვლება, თორემ ასე მოგვიწევს ყოველ წელს იმის ხილვა, პირველი ეტაპიდან 3 გუნდი როგორ ვარდება - სხვა გამოსავალი, უბრალოდ, არ არის".

შესაძლოა, არ დავეთანხმოთ იმ აზრს, რომ დაბალ ლიგებში დაფინანსება შეამცირონ, მაგრამ კერძო მესაკუთრეების მიმართ დამოკიდებულება შესაცვლელია, რომლებიც სულ უფრო ნაკლებ სახსრებს აბანდებენ. ეს ნამდვილად მისახედია. მაგრამ გიორგი კანდელაკს მადლობა იმიტომ ეთქმის, რომ ეს თემა წამოწია.

ყოველდღიური სპორტული გაზეთი "ლელო"
1123
მკითხველის კომენტარები / 0 /
მსგავსი ამბები
რუბრიკის სხვა სიახლეები
;