ეროვნული ლიგის II წრის რჩეულნი - კიტეიშვილი და ჭაღიაშვილი აღიარეს

საქართველოს ჩემპიონატმა ეკვატორს უწია და ერთთვიანი პაუზა გამოცხადდა, ეროვნული ლიგის ოფიციალურმა ვებგვერდმა კი მეორე წრის საუკეთესოები დააასახელა...

კიტეიშვილი უკონკურენტოა

მეორე წრის საუკეთესო მოთამაშედ თბილისის "დინამოს" ნახევარმცველი და კაპიტანი ოთარ კიტეიშვილი დასახელდა. გასაკვირი არცაა და მარტო ეს მონაცემიც კმარა - 18 ტურის შემდეგ კიტეიშვილი 11 გოლით ბომბარდირებში ლიდერობს, ხოლო 9 საგოლე პასით - ასისტენტებში. მეორე წრეში კიტეიშვილმა 9 შეხვედრაში 7 გოლი გაიტანა და ამით ყველაფერი ნათქვამია.

გასაკვირი არ არის ისიც, რომ "დინამოს" კაპიტანს, საქართველოს ჩემპიონატის დაბალი რეიტინგის მუხედავად, გერმანულმა სამენეჯერო ინტერნეტპორტალმა "ტრანსფერმაკტმა" ფასი აუწია და ეროვნული ლიგის მოთამაშისთვის უჩვეულოდ მაღალი მაჩვენებელი - 800 ათასი ევრო დაუწერა.

საუკეთესო მწვრთნელი

ეროვნული ლიგის მეორე წრის საუკეთესო მწვრთნელად თბილისის "ლოკომოტივის" თავკაცი ლაშა ჭაღიაშვილი აღიარეს.

პირველი წრის შემდეგ მისი გუნდი 4 ქულით ლიგის გამოკვეთილი აუტსაიდერი იყო, მაგრამ ბოლო 9 ტურში "რკინიგზელებმა" მდგომარეობა რადიკალურად გამოასწორეს - 4 მოგება, 3 ფრე და მხოლოდ 2 წაგება, ანუ, სულ - 15 ქულა. და ეს იმ დროს, როცა პირველ წრეში 7 წაგება ჰქონდა. შედეგად გუნდი 19 ქულით მე-7 ადგილზე აღზევდა.

განსაკუთღებით შთამბეჭდავი მეორე წრის ოთხი შეხვედრა იყო: "სამტრედიასთან" საგარეო ფრის (1:1) შემდეგ, "ლოკომოტივმა" ზედიზედ სამჯერ დაამარცხა ლიგის გამორჩეული გუნდები - სტუმრად "დინამო" (1:0) და "ჩიხურა" (3:1), შინ - ქუთაისის "ტორპედო" (1:0), ხოლო მეოთხე შეხვედრაში ჭაღიაშვილის გაწვრთნილებმა ქულა წაართვეს "საბურთალოს". ამჟამად, "ლოკომოტივი" ერთადერთი გუნდია, რომელსაც ლიდერთან არ წაუგია (პირველ წრეში 2:1 მოუგო).

რაც შეეხება "საბურთალოს", გიორგი ჭიაბრიშვილის ხელში ამ გუნდმა მეორე წრეში 9 შეხვედრიდან 7 მოიგო, 1 წააგო, 1 ფრედ ითამაშა და დააგროვა 22 ქულა - უფრო მეტი, ვიდრე პირველ წრეში. შესაძლოა, ლოგიკურად, საუკეთესო მწვრთნელობას ჭიაბრიშვილიც იმსახურებდა, მაგრამ ჩანს, გათვალისწინებულია ის გარემოება, რომ ჭაღიაშვილმა აუტსაიდერი კარგად "დაქოქა", მდგომარეობა გამოასწორა და ახლა ევროპალიგის საგზურისთვის ბრძოლაც შეუძლია.
შეიძლება, ეს უტოპია იყოს იქიდან გამომდინარე, რომ "ლოკომოტივი" სამეულს 15 ქულით ჩამორჩება, მაგრამ ასეთებიც გვინახავს, მსგავსი ჩამორჩენა რომ აღმოუფხვრიათ. დარჩენილ 18 ტურში ეს შეუძლებელი არ არის.

სიმბოლური ნაკრები

ეროვნული ლიგის გვერდმა მეორე წრის სიმბოლური ნაკრებიც შეადგინა. სათამაშო სქემად 4-4-2 შეირჩა. რჩეულთა შორის მოხვდნენ:

ლაზარე კუპატაძე (საბურთალო) - გუჯა რუხაია (დინამო თბ), გაგი მარგველაშვილი (საბურთალო), ბაქარ მირცხულავა (ჩიხურა), ლუკა ლაკვეხელიანი (საბურთალო) - ლეანდრო რიბეირო (დილა), ოთარ კიტეიშვილი (დინამო თბ), ლევან ნონიკაშვილი (დილა), ვაგნერ გონსალვესი (საბურთალო) - გიორგი გაბედავა (ჩიხურა), მიკოლა კოვტალიუკი (დილა).

ამგვარად, სიმბოლურ ნაკრებში ყველაზე მეტი მოთამაშე "საბურთალოდანაა" - 4, მერე მოდის გორის "დილა" - 3, ხოლო თბილისის "დინამოსა" და "ჩიხურადან" 2-2 მოთამაშე მოხვდა.



ეროვნული ლიგა 2
საუკეთესოები ეროვნულ ლიგა 2-შიც გამოავლინეს და გასაკვირი არ არის, რომ წარმატებულები ბათუმის "დინამოდან" აღმოჩდნენ...

გეგუჩაძე მწვრთნელებში

მეორე წრის საუკეთესო მწვრთნელად ბათუმის "დინამოს" დამრიგებელი გია გეგუჩაძე დასახელდა. შეგახსენებთ, რომ ჩემპიონატის ეს ეტაპი ბათუმელებმა დაუმარცხებლად განვლეს - 5 მოგება, 4 ფრე. შესაბამისად, "დინამომ" მესამე ადგილიდან პირველზე გადაინაცვლა.

ჯოვინიოს 9 გოლი

ეროვნული ლიგა 2 -ის მეორე წრის საუკეთესო მოთამაშედაც ბათუმის "დინამოს" წარმომადგენელი აღიარეს - ბრაზილიელი შემტევი ნახევარმცველი ჯოვინიო ფლამარიონი. 21 წლის ლეგიონერმა ბოლო 9 შეხვედრაში 9 გოლი გაიტანა, გუნდს გალიდერებაში დაეხმარა და ლიგა 2-ის ბომბარდირთა დავაში "ნორჩი დინამოს" გამოცდილ თავდამსხმელ იაგო დეისაძეს გადაუსწრო - ახლა ბათუმელთა გოლეადორის ანგარიშზე 12 გოლია.

სიმბოლური ნაკრები

ეროვნული ლიგა 2-ის მეორე წრის სიმბოლური ნაკრებიც 4-4-2 განლაგებით შეარჩიეს:

მიხეილ ალავიძე (დინამო ბთ) - გიორგი ცერცვაძე (ცხინვალი), ვაჟა ფაცაცია (მერანი), გიორგი გეთიაშვილი (ვიტ ჯორჯია), ლაშა ჩალაძე (დინამო ბთ) - პაატა ღუდუშაური (ვიტ ჯორჯია), რატი ცაცკრიალაშვილი (გაგრა), ჯერალდო ჯეფერსონი (შუქურა), ირაკლი რუხაძე (თელავი) - ჯოვინიო ფლამარიონი (დინამო ბთ), იაგო დეისაძე (ნორჩი დინამო).

სიმბოლურ ნაკრებში გუნდების წარმომადგენლები რაოდენობრივად ასე განაწილდნენ: 3 მოთამაშე - ბათუმის "დინამო", 2 - "ვიტ ჯორჯია", თითო - "ცხინვალი", "მერანი", "გაგრა", "შუქურა", "თელავი" და "ნორჩი დინამო".

ყოველდღიური სპორტული გაზეთი "ლელო"
849
მკითხველის კომენტარები / 0 /
მსგავსი ამბები
რუბრიკის სხვა სიახლეები
;