ესპანეთში ქართველი მეკარე აღმოვაჩინეთ - ვინ არის19 წლის ზურაბ გაბრიჭიძე, რომელიც თავის ისტორაის გვიყვება

საინტერესო ამბავია - ესპანეთში ქართველი მეკარე აღმოვაჩინეთ, რომელიც კატალონიაში, საფეხბურთო კლუბ "მონტკადაში" თამაშობს. ეს ახალგაზრდა ზურაბ გაბრიჭიძეა. 19 წლის გოლკიპერი თავის ისტორიას გვიყვება...

"საქართველოში დავიბადე და გავიზარდე, ემიგრანტების შვილი არ ვარ - ჩემი ოჯახი დღემდე თბილისში ცხოვრობს. ფეხბურთზეც ბავშვობიდან თბილისში დავდიოდი. აკაკი დევაძის მეკარეების სკოლაში ვვარჯიშობდი და თენგიზ სულაქველიძის სახელობის აკადემიაში ვთამაშობდი.

გამოვდიოდი ელიტლიგაში, ბოლოს - საქართველოს მესამე ლიგაში. ერთ-ერთ შეხვედრას ესპანელი მწვრთნელი, რაულ რივას კოსტანი დაესწრო, რომელიც კატალონიაში საბავშო ჯგუფებს ავარჯიშებდა და ჩემით დაინტერესდა.

მერე ესპანეთში წასაღებად ვიდეოს გადაღება მომთხოვა, ნაცნობი მწვრთნელებისთვის რომ ეჩვენებინა. ერთ თვეში დამირეკეს, რომ უნდა ჩამოვსულიყავი. დავიწყე საბუთების შეგროვება, რათა ვარჯიშის და ტრანსფერის უფლება მიმეღო და წამოვედი", - ამბობს ზურაბ გაბრიჭიძე.

ახალგაზრდა მეკარის თქმით, ამის გამო უკრაინაში წასვლა გადაიფიქრა: "ესპანეთამდე, 2016 წლის 1 სექტემბერს, კიევის "დინამოს" ახალგაზრდული გუნდის სინჯებზე მიმიწვიეს. მაგრამ გადავწყვიტე, ესპანეთში წავსულიყავი - ფეხბურთის თამაში თუ გინდა, ამ ქვეყანას ვერაფერი შეედრება და ძალიან დიდი პერსპექტივაცაა. თავიდან დამაწყებინეს თამაში "რიპოლეტში", 19-წლამდელების გუნდია, სადაც ერთი წელი ვითამაშე და საკმაოდ წარმატებითაც.

სეზონის შუაში შემოთავაზება "საბადელის" 19-წლამდელებისგანაც მქონდა, რომლის მთავარი გუნდიც სეგუნდა B დივიზიონში გამოდის. ჩემი აყვანა უნდოდათ, მაგრამ უარი ვთქვი, რადგან სტაბილური სათამაშო დრო მქონდა, მთავარ მეკარეს ხშირად ვცვლიდი. "საბადელში" კი დარწმუნებული არ ვიყავი, რომ იგივე იქნებოდა.

როცა სეზონი დასრულდა, ჩვენი მთავარი მეკარე ახალ გუნდში, "მონტკადაში" გადავიდა და რეკომენდაცია მეც გამიწია. შემდეგ მათი მწვრთნელი დამელაპარაკა, დავთანხმდი და ახლა ამ გუნდში გამოვდივარ".

რა პერსპექტივა აქვს ესპანეთში? გაბრიჭიძე ამაზეც გველაპარაკა: "19 წლის ვარ და ვფიქრობ, აქ უფრო დიდი პერსპექტივა მაქვს, ვიდრე ნებისმიერ სხვა ქვეყანაში. იმიტომ, რომ თამაშებზე ძალიან ბევრი სკაუტი დადის და ფეხბურთელებს აკვირდებიან. რაც მთავარია, აქ საფეხბურთო ატმოსფეროა და გასაზრდელად კარგი პირობებია. ისე, ჩემი მიზანია, რაც შეიძლება მაღალ დივიზიონში ვითამაშო და მიმაჩნია, რომ ამის შესაძლებლობები გამაჩნია".

ყოველდღიური სპორტული გაზეთი "ლელო"
3181
მკითხველის კომენტარები / 0 /
რუბრიკის სხვა სიახლეები