ესტონელებმა ჰიმნი ვერ შეგვირჩიეს - ოქრო-ვერცხლი ევროპის ჩემპიონატიდან

2-2 ოქრო-ვერცხლისა და 6 ბრინჯაოს მედალი -პირველი საშეჯიბრო დღე ჩვენებმა ოქროთი დაიწყეს - 21-წლამდელთა გუნდურ პაექრობაში საქართველოს ნაკრებმა ზედიზედ დაამარცხა იტალიის (3:0), პოლონეთის (2:1), უკრაინის (2:1) გუნდები და პირველი ადგილი დაიკავა.

ამავე ასაკის მძიმე წონაში (+115) ვერცხლის მედალს დასჯერდა 18-წლამდელებში კონტინენტის ჩემპიონი ზურა წიქორაძე, ხოლო ბრინჯაო ბადრი ხატისკაცს ერგო. უმედლოდ დარჩნენ დავით კაცაძე (85 კგ) და ნაკრების დებიუტანტი დავით ხარებავა (-100 კგ), აბსოლუტურ წონაში - გიორგი ბურჯალიანი და ბადრი ხატისკაცი. 

ჩემპიონატის მეორე დღეს საქართველოს დელეგაციის ყულაბას 4 მედალი შემატეს 23-წლამდელებმა: მძიმე წონაში (+115 კგ) მოასპარეზე ლაშა ჯელაძემ და გიორგი ფარადაშვილმა ერთი ამოსუნთქვით გაიარეს ყველა წრე და ასპარეზობა ქართული ფინალით დააგვირგვინეს. გადამწყვეტი ორთაბრძოლა ჯელაძემ იორიკირით მოიგო და ოქროს მედალი დაისაკუთრა, ვერცხლი ფარადაშვილს ხვდა.

ჩვენები კვარცხლბეკზე რომ ავიდნენ, მასპინძლებმა ჩემპიონის პატივსაცემად საქართველოს ძველი ჰიმნი ააჟღერეს, რაზეც საქართველოს სუმოს ფედერაციის ვიცე-პრეზიდენტმა თენგიზ რუხაძემ, სრულიად სამართლიანად, პროტესტი გამოთქვა. ესტონელებმა ძველი ჰიმნი გამორთეს, ახალი კი ორგანიზატორებს არ აღმოაჩნდათ... 

ქართველი მძიმეწონოსნები - ჯელაძე და ფარადაშვილი კიდევ ერთხელ წარდგნენ ერთმანეთის პირისპირ დოჰიოზე, ამჯერად - აბსოლუტურ წონით კატეგორიაში, ოღონდ მესამე ადგილისთვის. ეს პაექრობაც ჯელაძის გამარჯვებით დასრულდა. სხვა წონით კატეგორიებში ვერაფერს გახდნენ დავით ხარებავა (100 კგ), გელა ბურჯანაძე (100 კგ), დავით კაცაძე (85 კგ), გიორგი გახოკიძე (70 კგ). სამაგიეროდ, გუნდურში ჯელაძემ, ფარადაშვილმა და ხატისკაცმა ბრინჯაოს მედალი მოიპოვეს.

მეოთხედფინალში ჩვენებმა პოლონეთს მოუგეს, ნახევარფინალში უკრაინასთან არკვევდნენ ურთიერთობას. როცა ანგარიში იყო 1:1, ხატისკაცი უკრაინის სახელით მებრძოლ ვაჟა დაიაურთან დამარცხდა. მესამე ადგილისთვის პაექრობაში ქართველებმა ესტონელები დაჯაბნეს. 

ევროპის ჩემპიონატის დასკვნით დღეს დოჰიო უფროსი ასაკის სუმოტორებს დაეთმოთ. საქართველოს სპორტის ღირსებას 6 ფალავანი იცავდა. ჩვენმა ბიჭებმა 3 ბრინჯაოს მედლის მოპოვება შეძლეს. აქედან ერთი - გუნდურში, ორიც - პირადში, თანაც ეს ორი ბრინჯაო ლაშა ჯელაძემ დაიმსახურა: კვარცხლბეკის მესამე საფეხურზე იგი ჯერ მძიმე წონაში (+115 კგ), მერე კი აბსოლუტურში ავიდა, თან მძიმე წონის ბრინჯაოს ფინალში ჩვენი ნაკრების კაპიტანი ზურა აქუბარდია დაამარცხა, აბსოლუტურში კი პოლონელ მატეუშ ლინკას სძლია. 

ამ ასაკის პირად პირველობაში უმედლოდ დარჩნენ ლაშა მეშვილდიშვილი (-115 კგ), გელა ბურჯანაძე (-100 კგ), გიორგი გოგობერიშვილი (-100 კგ) და გიორგი გახოკიძე (-70 კგ), გუნდურში კი ჯელაძე-აქუბარდია-მეშვილდიშვილის ტრიომ უნგრეთი უპრობლემოდ გაიარა, მაგრამ ოქროსკენ გზა ჩვენებს ისევ დაიაურმა გადაუღობა - მეშვილდიშვილს აჯობა და უკრაინას მომგებიანი ქულა მოუტანა. ბრინჯაოსთვის პაექრობაში კი ქართველებმა პოლონელები დაამარცხეს - 2:1.

924
მკითხველის კომენტარები / 0 /
მსგავსი ამბები
რუბრიკის სხვა სიახლეები
;