ეს არის სიკვდილ-სიცოცხლის საკითხი და აუცილებლად უნდა მოვიგოთ! სახლში მჯდომ გიორგი მერებაშვილს ფეხბურთი უზომოდ ენატრება

26 მარტს გასართ ევრო 2020-ის პლეი ოფის შეხვედრები გადაიდო. მიზეზი გასაგებია - მთელ მსოფლიოში ახალი კორონავირუსის გაზრდილი მასშტაბები და ქვეყნების მიერ დაწესებული შეზღუდვები. ბევრ ქვეყანაში, როგორც სახმელეთო, აგრეთვე საჰაერო მიმოსვლა შეჩერებულია და მატჩების გამართვა წარმოუდგენელია.

17 მარტს უეფას საგანგებო ვიდეოკონფერენციაზე გადაწყდა, რომ ეს მატჩები, მათ შორის კი "დინამო-არენაზე" დანიშნული საქართველო-ბელარუსი, სავარაუდოდ ივნისში გაიმართება.

წინადადებას ყველა ეროვნული ასოციაციის წარმომადგენელი დათანხმდა და გადაწყვეტილება უეფას აღმასკომმა დაამტკიცა. თუმცა, არც ივნისში გარანტირებული მატჩის ჩატარება - ყველაფერი დამოკიდებული იქნება იმაზე, ჩაცხრება თუ არა ამ დროისთვის კორონავირუსის პანდემია.

საქართველოს ეროვნული ნაკრებისა და პლოცკის "ვისლას" შემტევ ნახევარმცველს "ლელო" პოლონეთში დაუკავშირდა - გიორგი მერებაშვილს უეფას გადაწყვეტილებაზე, მეტოქეებსა და საქართველოს ევროფინალურ ეტაპზე გასვლის შანსებზე ველაპარეთ. თუმცა, უპირველესად, მისი მდგომარეობით დავინტერსდით...

- გიორგი, თავს როგორ გრძნობთ?

- სახლში ვარ და ვცდილობ, გარეთ არ გავიდე. ახლა ყველა ცდილობს სიფრთხილე გამოიჩინოს და გამონაკლისი არც მე ვარ. სამწუხაროა, რომ კორონავირუსის გამო ყველაფერი შეჩერდა.

- მოგენატრა ვარჯიში და თამაში?

- კი, უზომოდ. პოლონეთში 13 მარტის ტური ჩატარდა და მერე გაჩერდით. 21 მარტიდან თამაშები გადადებულია და ფეხბურთელებიც სახლებში ვსხედვართ. სიგიჟემდე მენატრება მწვანე მინდორი...

- ბელარუსთან თამაშის გადადებაზე რას ფიქრობთ?

- ძალიან კარგი და საჭირო გადაწყვეტილება იყო. მსჯელობდნენ, რომ ბელარუსისთვის მაყურებლის გარეშე გვემასპინძლა. ამას გადადება ნამდვილად ჯობდა.

- თქვენი აზრით, საქართველოს ნაკრები ივნისისთვის უკეთ მომზადებული იქნება?

- სხვა გზა არც გვაქვს! ისეთი მნიშვნელობის თამაშია, რომ რაც არ უნდა მოხდეს, უნდა გავიმარჯვოთ და მხოლოდ გამარჯვებისთვის ვიყოთ მზად. "სიკვდილი ან გამარჯვება!" - აი, ზუსტად ასე დგას საკითხი.

- თქვენი აზრით, ზოგადად ჩვენი ნაკრებისთვის მარტი უკეთესი თვეა თუ ივნისი?

- ჩემთვის მარტი უკეთესია. თუმცა, ახლა შესაძლოა, ივნისი უკეთესი იყოს.

- რას გულისხმობ?

- იმას, რომ ჩემთვის ახლა თამაში იყო უკეთესი. ეს გამომდინარეობს იქიდან, რომ კარგ ფორმაში ვარ და თავს კარგად ვგრძნობ. მეორე წრეში პლოცკის "ვისლამ" ექსტრაკლასაში 6 თამაში ჩაატარა და 6-ვეში ძირითადში ვითამაშე, მხოლოდ 2-ჯერ შემცვალეს. ფიზიკურად თავს ძალიან კარგად ვგრძნობ.

- ერთა ლიგის ნახევარფინალში ჩვენი მეტოქე ბელარუსია, მასთან მოგების შემთხვევაშ კი ჩრდილოეთ მაკედონიასა და კოსოვოს წყვილის გამარჯვებულს შევხდებით. თქვენი აზრით, ამ სამეულში რომელი ნაკრებია უკეთესი და რატომ?

- პირადად ჩემთვის არ აქვს მნივშვნელობა. მთავარი ის არის, რომ მიზანი ერთია - მხოლოდ გამარჯვება!

- და მაინც, რომელ ნაკრებს გამორჩევ?

- ალბათ, კოსოვოს ნაკრებს.

- რატომ კოსოვო?

- იმიტომ, რომ ბოლო შესარჩევი ციკლი კოსოვომ ძალიან კარგად ჩაატარა.

- ფეხბურთელებიდან ვის გამოარჩევ?

- ასე კონკრეტულად არავის გამოვარჩევდი. თუმცა კარგი ფეხბურთელები ნამდვილად ჰყავთ.

- ჩრდილოეთ მაკედონიის ნაკრების შემადგენლობას რომ გადავხედოთ, რამდენიმე ფეხბურთელი სერია A-დან ჰყავთ. ესეც არანაკლებ ძლიერი ნაკრებია...

- დიახ, მაკედონიაც ძალიან ძლიერი გუნდია. გამორჩეული ფეხბურთელი ყველას ჰყავს. მაგრამ არა მგონია, საქართველოს ნაკრებს ვინმეზე ნაკლები ფეხბურთელები ჰყავდეს.

725
მკითხველის კომენტარები / 0 /
მსგავსი ამბები
რუბრიკის სხვა სიახლეები
;