ეს დრიმ თიმი არ არის - აშშ-ის ნაკრები რთულ საკადრო სიტუაციაში მოხვდა

2006 წლის 1 სექტემბერი - ბოლო დღე, როცა აშშ-ის ნაკრებმა ოფიციალური მატჩი წააგო. იქედან მოყოლებული, ამერიკელებს 57 მოგება და ნული წაგება აქვთ დიდი ტურნირების ფინალურ სტადიებში.

2004 წლის ოლიმპიადაზე სირცხვილის შემდეგ, ამერიკის კალათბურთის ფედერაციამ გადახედა თავის სტრატეგიას. ნაკრებს მუდმივი მწვრთნელი დაუნიშნეს, საწვრთნელი ბანაკები უფრო გრძელი და ორგანიზებული გახდა, ხოლო გუნდში თამაში ისევ პრესტიჟული იყო. შედეგი: სამი ოქრო ოლიმპიადებზე, ორი - მსოფლიოს ჩემპიონატებზე და ამდენივე ამერიკის თასზე.

მაგრამ პრესტიჟი სულაც სტაბილური მცნება არ არის. 2008 წელს, პეკინში წარმოდგენილი იყო Redeem Team (გუნდი, რომელსაც ოთხი წლის წინანდელი ბრალი უნდა გამოესყიდა). მას მიზნად დაუსახეს ამერიკისთვის იმის დაბრუნება, რაც მას სამართლიანად ეკუთვნოდა:

სწორედ საკალათბურთო გუნდი იყო ყოველთვის ამერიკული სპორტის ფლაგმანი. 2012 წელს, ამერიკელებს ლონდონში სურდათ ეჩვენებინათ „დრიმ-თიმის“ თანამედროვე ვერსია: ლებრონი, კობი და დურანტი ერთ გუნდში (და მათთან ერთად ახალგაზრდა ჰარდენი, უესტბრუკი, ახალბედა დევისი).

2016 წელს რიოში კი უკვე დაიწყო მასობრივი უარის თქმები, რისი ერთ-ერთი მიზეზი იყო სამხრეთ ამერიკაში მძვინვარე ვირუსი ზიკა. ისინი, ვისაც უკვე ჰქონდათ მოპოვებული ოქროს მედლები, აზრს ვერ ხედავდნენ ახალი ჩემპიონობის მოსაპოვებლად საკუთარი ზაფხული დაეხარჯათ. გარდა ამისა, უმედლებო ვარსკვლავებიც უარზე იყვნენ: სტეფ კარიმ დაღლილობა მოიმიზეზა, დამიენ ლილარდმა ტერფის ტრავმა, კავაი ლეონარდმა უბრალოდ თქვა - „არ ჩამოვალ“.

მიუხედავად ამისა, 2016 წლის ნაკრები მაინც შედგებოდა NBA-ის „ყველა ვარსკვლავის მატჩის“ 11 მონაწილისგან და ჰარისონ ბარნსისგან, მაგრამ ის უფრო მეტად მოგაგონებდათ იმ გუნდებს, რომლებიც აშშ-ს მსოფლიოს ჩემპიონატებზე მიჰყავდა.

ამ ტურნირებზე აშშ-ის ნაკრების შემადგენლობაში მეორე ეშელონის ვარსკვლავები ჭარბობენ: დენი გრეინჯერი, რუდი გეი, კენეტ ფარიდი, ერთ-ერთი ძმა პლამლი და მათი მსგავსი მოთამაშეები. 2017 წლის ამერიკის თასზე კი საერთოდ D-ლიგის ნაკრები წაიყვანეს.

მსოფლიოს 2019 წლის ჩემპიონატის წინ კი აშშ-ის ნაკრები კიდევ უფრო რთულ საკადრო სიტუაციაში მოხვდა, ვიდრე ეს სხვა ჩემპიონატების შემთხვევაში იყო. და ეს იმ მომენტში ხდება, როცა NBA-ს უცხოელები იპყრობენ:

MVP ბერძენია, საუკეთესო ახალბედა - სლოვენიელი, საუკეთესო დამცველი - ფრანგი. მათ ემატებიან ვარსკვლავები კამერუნიდან, ავსტრალიიდან, კანადიდან, სერბეთიდან... მსოფლიოს ჩემპიონატზე უარის თქმა სხვა ქვეყნის ნაკრებებშიც ხდება: ავსტრალიაში არ ითამაშებს ბენ სიმონსი, ახალ ზელანდიაში - სტივენ ადამსი, კანადა ისევ ვერ იკრიბება ოპტიმალური შემადგენლობით. მაგრამ მოთამაშეების ასეთი დაკარგვა აშშ-ს არასოდეს არ ჰქონია.

პირველადი სია ჯერ კიდევ წელიწად-ნახევრის წინ შეადგინეს და იქიდან გაქრნენ ლებრონ ჯეიმსი, სტეფ კარი, კავაი ლეონარდი, კაირი ირვინგი, რასელ უესტბრუკი, პოლ ჯორჯი... ვიღაცები ტრავმის გამო, ვიღაცებმა, უბრალოდ, უარი თქვეს. ოლიმპიური ოქროების მქონე კალათბურთელებმა დაკარგეს ინტერესი ნაკრების მიმართ.

წელს, ჯერ კიდევ პირველი გაფართოებული შემადგენლობის გამოცხადებისას ცხადი იყო, რომ ეს „დრიმ თიმი“ არ არის. აი, როგორ გამოიყურებოდა პოპოვიჩის თავდაპირველი სია:

ჰარისონ ბარნსი (საკრამენტო), ბრედლი ბილი (ვაშინგტონი), ენტონი დევისი (ლეიკერსი), ანდრე დრამონდი (დეტროიტი), ერიკ გორდონი (ჰიუსტონი), ჯეიმს ჰარდენი (ჰიუსტონი), ტობიას ჰარისი (ფილადელფია), კაილ კუზმა (ლეიკერსი), დემიან ლილარდი (პორტლენდი), ბრუკ ლოპესი (მილუოკი), კევინ ლავი (კლივლენდი), კაილ ლაური (ტორონტო), სი ჯეი მაკოლუმი (პორტლენდი), კრის მიდლტონი (მილუოკი), პოლ მილსეპი (დენვერი), დონოვან მიტჩელი (იუტა), ჯეისონ ტეიტუმი (ბოსტონი), პი ჯეი ტაკერი (ჰიუსტონი), მაილს ტერნერი (ინდიანა), კემბა უოკერი (ბოსტონი).

შემდეგ, ამ სიას თანდათან გამოაკლდნენ: ბილი, დევისი, გორდონი, ჰარდენი, ჰარისი, ლილარდი, ლავი, მაკოლუმი და მილსეპი. ამიტომაც სამწვრთნელო შტაბი იძულებული გახდა განახლებული შემადგენლობა გამოექვეყნებინა, რომელიც მსოფლიოს ჩემპიონატისთვის უნდა მოემზადოს.

დღეისთვის, გრეგ პოპოვიჩის გუნდის შემადგენლობა ასე გამოიყურება:

ჰარისონ ბარნსი (საკრამენტო), ჯეილენ ბრაუნი (ბოსტონი), ანდრე დრამონდი (დეტროიტი), კაილ კუზმა (ლეიკერსი), ბრუკ ლოპესი (მილუოკი), კაილ ლაური (ტორონტო), კრის მიდლტონი (მილუოკი), დონოვან მიტჩელი (იუტა), მეისონ პლამლი (დენვერი), ჯულიუს რენდლი (ნიუ იორკი), მარკუს სმარტი (ბოსტონი), ჯეისონ ტეიტუმი (ბოსტონი), პი ჯეი ტაკერი (ჰიუსტონი), მაილზ ტერნერი (ინდიანა), კემბა უოკერი (ბოსტონი), ტადეუს იანგი (ჩიკაგო), ბემ ადებაიო (მაიამი).

როგორც ექსპერტები ვარაუდობენ, აშშ-ის სასტარტო ხუთეული მსოფლიოს ჩემპიონატზე ასეთი უნდა იყოს:

კემბა უოკერი (გამთამაშებელი)
კრის მიდლტონი (შემტევი მცველი)
ჯეისონ ტეიტუმი (მსუბუქი ფორვარდი)
მაილზ ტერნერი (მძიმე ფორვარდი)
ანდრე დრამონდი (ცენტრი)

5-9 აგვისტოს ეს შემადგენლობა საწვრთნელ შეკრებას გაივლის ლას ვეგასში.
პლანეტის პირველობა 31 აგვისტოდან 15 სექტემბრამდე ჩინეთში გაიმართება.

ყოველდღიური სპორტული გაზეთი "ლელო"
1297
მკითხველის კომენტარები / 0 /
მსგავსი ამბები
რუბრიკის სხვა სიახლეები
;