ეს იყო მსაჯის მოქრთამვა? დინამო-ლინფილდი, ჯერ სიხარული, შემდეგ სკანდალი

1993 წლის 18 აგვისტო დაუვიწყარი თარიღია დამოუკიდებელი ქართული ფეხბურთის ისტორიაში. ამ დღეს თბილისის "დინამო" დამოუკიდებელი საქართველოს სახელით პირველად გავიდა ევროასპარეზზე და ჩემპიონთა ლიგაზე თბილისური მატჩი 2:1 მოუგო ჩრდილოირლანდიულ "ლინფილდს".
მერე იყო ბელფასტური მატჩი, რომელიც ფრედ დასრულდა და "დინამო" შემდეგ ეტაპზე გავიდა. ზეიმი ნაადრევი აღმოჩნდა - უეფამ ქართული კლუბი თურქი მსაჯის, ერმან თოროღლუს მოქრთამვაში დაადანაშაულა და გათამაშებიდან მოკვეთა. 

დინამო (თბ)
2
ლინფილდი
1
18 აგვისტო, 1993. საკვალიფიკაციო ეტაპი. თბილისი, ბორის პაიჭაძის სახელობის ეროვნული სტადიონი, 65000
გოლები: 1:0 შოთა არველაძე (7), 1:1 რიჩი ჯონსტონი (56), 2:1 გელა ინალიშვილი (66)
დინამო: ირაკლი ზოიძე, მურთაზ შელია, გიორგი ნემსაძე, ნუგზარ ლობჟანიძე, გელა ინალიშვილი, რევაზ არველაძე, გოჩა ჯამარაული, გიორგი ქინქლაძე, მიხეილ ყაველაშვილი (კაპ) (გიორგი ანჩაბაძე 81), შოთა არველაძე, არჩილ არველაძე
მწვრთნელი: გივი ნოდია
ლინფილდი: უესლი ლემონი, ჯონ ისტონი, ჯონ მაკკონელი, ნოელ ბეილი, ალან დორნანი (კაპ), გარი პიბლზი, ლი დოჰერტი, გარი ჰეილოკი (სტივენ ბიტი 53), დესი გორმანი, იან მაკქუში, რიჩი ჯონსტონი
მწვრთნელი: ტრევორ ანდერსონი
გაფრთხილება: რიჩი ჯონსტონი, უესლი ლემონი
მსაჯები: ერმან თოროღლუ; მეთინ სეიაბაქანი, ესტემირ ორჰანი (თურქეთი)

 და მაინც, ეს ორი მატჩი განსაკუთრებული და დაუვიწყარია ჩვენთვის. მათი გახსენება ვთხოვეთ მაშინდელი "დინამოს" საყრდენს, გელა ინალიშვილს, ვინც საქართველოს დედაქალაქში გამართულ შეხვედრაში საუკეთესო გახლდათ მინდორზე - გოლი და საგოლე პასი მიითვალა.

"ვიცოდით, რამხელა ტვირთის ზიდვა მოგვიწევდა. ეს იყო დამოუკიდებელი საქართველოს წარმომადგენელი კლუბის პირველი გასვლა ევროასპარეზზე. ვერ ვიტყვი, რომ მეტოქეზე ბევრი რამ ვიცოდით და ეს მაშინდელ დროსა და რეალობაში გასაკვირი არც იყო, მაგრამ თამაშისათვის ძალიან სერიოზულად მოვემზადეთ.

სტადიონზე რომ გამოვედით, ყველას განუმეორებელი შეგრძნება დაგვეუფლა. მეამაყება, რომ თბილისურ შეხვედრაში საუკეთესო ფეხბურთელად დამასახელეს. ისე კი, ცხადია, მთელი გუნდის დამსახურება იყო ეს გამარჯვება.

ამ თამაშს თავისთავად ახლდა თან დიდი ნერვიულობა. ამას მივაწერ იმას, რომ მხოლოდ 2:1 მოვიგეთ. არადა, თამაშის ხასიათი ისეთი იყო, იმდენი მომენტი შევქმენით მოწინააღმდეგის კართან, რომ სულ მცირე 5:1 მაინც უნდა მოგვეგო.

პირველი გოლი შოთიკო არველაძემ შეაგდო. პასი ჩემი იყო. შოთამ მართლა დიდებულად ითამაშა. მეორე მე გავიტანე - გიო ქინქლაძემ მაგარი პასი მომცა და მეც გავიტანე. გოლებს შორის დავიბენით და გავუშვით...

კარგად გახსოვთ, რა მდგომარეობა იყო მაშინდელ საქართველოში. ძმათამკვლელი ომი მძვინვარებდა ჩვენს ქვეყანაში. ზუსტად ვიცი, ფეხბურთმა დროებით მაინც შეძლო დაპირისპირებულ მხარეებს შორის დაძაბულობის განმუხტვა. ორივე მხარე ერთად იჯდა სტადიონზე და "დინამოს" მხურვალედ ქომაგობდა. მორჩა თამაში და ისევ დაიწყო...

მეორე თამაში ბელფასტში ფრედ ვითამაშეთ. ვერ ვიტყვი, რომ ძალიან გაგვიჭირდა. ბურთიც დავუმალეთ მოწინააღმდეგეს. ეგაა, ჩვენი არ იყოს, ჩრდილოეთ ირლანდიის დედაქალაქშიც ძალიან დაძაბული მდგომარეობა იყო. იქ რომ ჩავედით, დიდი აფეთქება მოხდა. ზოგადადაც, დაძაბულობა იგრძნობოდა და მთელი ღამე არ გვიძინია.

მერე მოხდა ის, რაც ყველამ ვიცით და "დინამო" მოკვეთეს. ჩვენ მაშინ ძალიან კარგი გუნდი გვყავდა და შორს წასვლაც შეგვეძლო. არაფერი ვიცოდით, რა ხდებოდა. ჩვეულებრივად ვემზადებოდით, შეკრებაზეც ვიყავით საფრანგეთში...

ლინფილდი
1
დინამო
1
1 სექტემბერი, 1993. საკვალიფიკაციო ეტაპი. ჩრდილოეთ ირლანდია, ბელფასტი
უინძორ პარკი. 6500
გოლები: 1:0 შოთა არველაძე (49), 1:1 გარი ჰეილოკი (71)
ლინფილდი: უესლი ლემონი, ალან დორნანი (კაპ), ჯონ ისტონი, ლი დოჰერტი, ჯონ მაკკონელი, სტივენ ბიტი (ტრევორ ანდერსონი 79), ფილიპ კნელი (დესი გორმანი 46), რიჩი ჯონსტონი, გარი ჰეილოკი, გარი პიბლზი, ნოელ ბეილი
მწვრთნელი: ტრევორ ანდერსონი
დინამო: ირაკლი ზოიძე, გიორგი ნემსაძე, გოჩა ჩიქოვანი, მურთაზ შელია, გელა ინალიშვილი, მიხეილ ყაველაშვილი (კაპ), არჩილ არველაძე (გიორგი ანჩაბაძე 65), გოჩა ჯამარაული (ბესიკ ბერაძე 75), რევაზ არველაძე, გიორგი ქინქლაძე, შოთა არველაძე
მწვრთნელი: გივი ნოდია
მსაჯები: როი ჰელგე; არილ ტორპი, ფროდე კვამი (ნორვეგია)

 გუნდის კრებაზე გამოგვიცხადეს ამ ფაქტის თაობაზე. ეს იყო ნამდვილი შოკი. პირდაპირ შემიძლია ვთქვა, რომ მკვდრები ვიყავით ყველა. არადა, როგორი იმედი გვქონდა, რა აჟიოტაჟი და მოლოდინი იყო...

როგორც მერე გაირკვა, მსაჯს მისცეს იმაზე ცოტა მეტი თანხა, ვიდრე ეკუთვნოდა. ალბათ, ძველი დროდან გადმოყოლილი ჩვევის ამბავი იყო, მაგრამ ის თურქი მსაჯიც ძალიან ცუდად მოიქცა. როგორც მე ვიცი, რაიმე სასწაული დარღვევა არ ყოფილა. სიტყვაზე რომ ვთქვათ, ეკუთვნოდა ლარი და მისცეს ლარი და ათი თეთრი...

2728
მკითხველის კომენტარები / 0 /
მსგავსი ამბები
რუბრიკის სხვა სიახლეები