ეფენბერგი: გააგდეთ იოზილი და გიუნდოგანი!

შტეფან ეფენბერგმა სკანდალური განცხადება გააკეთა. ლეგენდარული გერმანელი ფეხბურთელი მიიჩნევს, რომ ქვეყნის საფეხბურთო კავშირმა ეროვნული გუნდიდან სასწრაფოდ უნდა მოკვეთოს ნახევარდაცვის ორი ლიდერი - მესუთ იოზილი და ილქაი გიუნდოგანი.

"ეფე" მათ ვერ პატიობს იმას, რომ ამასწინათ ფოტოები გადაიღეს თურქეთის პრეზიდენტ რეჯებ ტაიიპ ერდოღანთან. ეფენბერგი არ არის ერთადერთი, ვინც ამ ფოტოს გამო ბუნდესნაკრებიდან იოზილისა და გიუნდოგანის მოკვეთა მოითხოვა.

ანალოგიური მოთხოვნით ქომაგებმა პეტიციაც "გამოაცხვეს" და ხელმოწერებსაც აგროვებდნენ, მაგრამ იოახიმ ლიოვი შეუვალი აღმოჩნდა.

"გერმანიის საფეხბურთო კავშირი ორმაგი სტანდარტებით მოქმედებს. ისინი მუდამ ამბობენ, რომ აქვთ გარკვეული ღირებულებები, რომელთაც არასოდეს გადაუხვევენ, მაგრამ რეალობა სულ სხვა რამეს ამტკიცებს. თუ ასე არ არის, მაშინ გიუნდოგანი და იოზილი სასწრაფოდ უნდა მოეკვეთათ ნაკრებიდან.

როცა მე რაღაც დავაშავე, გერმანიის საფეხბურთო კავშირმა ძალიან სწრაფად მიიღო გადაწყვეტილება და ნაკრების კარი დამიხურა. მაშინ იქ სხვა ხალხი მუშაობდა და მეტი სიხისტე იყო.

ვფიქრობ, იმ პერიოდში მეც არანაკლებ საჭირო ვიყავი ნაკრებისთვის, ვიდრე ახლა არიან იოზილი და გიუნდოგანი", - თქვა ეფენბერგმა.

ვეჭვობთ, ლიოვს ახლა ძალიან აინტერესებდეს "ეფეს" მოწოდებები. ის სრულ იგნორირებას უკეთებს ამ თემას და ამბობს, რომ რუსეთში ყველაფერი აკმაყოფილებს და ახლა მხოლოდ იმაზე ფიქრობს, როგორ მოუგოს მექსიკას მუნდიალის პირველივე მატჩში:

"ამ დროისთვის ბოლო ტაქტიკურ ნიუანსებს ვაშალაშინებთ. მუნდიალის პირველი შეხვედრა უმნიშვნელოვანესია და ძალიან გვინდა, მექსიკას მოვუგოთ. მოწინააღმდეგე ძალიან ძლიერი, აგრესიული გუნდია, მასთან მთელი ძალების მობილიზება იქნება საჭირო".

ყოველდღიური სპორტული გაზეთი "ლელო"
364
მკითხველის კომენტარები / 0 /