[ექსკლუზივი] ალექსანდრე იაშვილი: ასეთი შანსი გვაქვს და ამაზე მეტი მოტივაცია რა შეიძლება იყოს?! თუ კანონი არ შეიცვალა, ჩვენ ვერაფერს ვიზამთ...

საქართველოს ნაკრებთან დაკავშირებით სასაუბრო ბევრი დაგროვდა. ამდენად, "ლელოს" მკითხველისთვის ძალიან საინტერესო უნდა იყოს ექსკლუზიური ინტერვიუ ფეხბურთის ფედერაციის ვიცე-პრეზიდენტ ალექსანდრე იაშვილთან, რომელიც უშუალოდ სანაკრებო საკითხებს კურირებს...

- თავდაპირველად, საქართველოს ეროვნული ნაკრების ბოლო ორი მატჩის შეფასება უნდა გთხოვოთ. რა თქმა უნდა, დანიასთან მოპოვებული ქულა დადებითად უნდა შევაფასოთ, მაგრამ არც ეიფორიაში არ უნდა ჩავვარდეთ...

- მართალი ხართ, არ უნდა ჩავვარდეთ ეიფორიაში და არც არასოდეს ვყოფილვართ ეიფორიაში... სხვათა შორის, არც მაშინ, როცა საქართველოს ნაკრებმა ერთა ლიგის ჯგუფური ეტაპი მოიგო. რა თქმა უნდა, ჩვენც და გულშემატკივარსაც ყოველთვის მოგება გვინდა, აღარაფერს ვამბობ თავად მწვრთნელ-ფეხბურთელებზე, მაგრამ გასათვალისწინებელია, რა ძალის მეტოქესთან გვქონდა საქმე. დანია ძალიან ძლიერი გუნდია. ხარისხობრივი თვალსაზრისით კმაყოფილი დავრჩით ორივე თამაშით. კორეასთან თამაშს თუ ავიღებთ, თქვენც ნახეთ, არაერთი საგოლე შანსი ვერ გამოვიყენეთ და ამაზე მუშაობა გვმართებს. დანიასთან შეხვედრა ჩვენი გუნდისთვის ძალიან მნიშვნელოვანი იყო. ჩემი აზრით, ვაჯობეთ, უფრო  მეორე ტაიმში და შესაძლებელი იყო მოგებაც... არაერთი ტრავმირებული ფეხბურთელი გვყავდა - გიორგი ჩაკვეტაძე, დავით ხოჭოლავა, საბა კვირკველია, გუნდის კაპიტანი ჯაბა კანკავა, ნიკა კვეკვესკირი... ასეთ ვითარებაში კარგად წარმოაჩინეს თავი ახალგაზრდა ფეხბურთელებმა. ეს ძალიან მნიშვნელოვანია თუნდაც გუნდში კონკურენციის გაზრდის მხრივ. კონკურენცია კი წარმატების ერთ-ერთი აუცილებელი წინაპირობაა.

- ბევრი აღარ დარჩა საქართველოს ნაკრების ოქტომბრის მატჩებამდე...

- პირველი თამაში ირლანდიის ნაკრებთან თბილისში გვიწევს და ამდენად, ნაკრები თბილისში შეიკრიბება, ყველა ფეხბურთელი დროულად გამოცხადდება შეკრებაზე...

- უკვე დაზუსტებით შეიძლება ითქვას, რომ ირლანდიასა და გიბრალტართან შეხვედრებშიც დაგვაკლდება გიორგი ჩაკვეტაძე...

- სამწუხაროდ, ასეა...

- საინტერესოა, რა ხდება ზაურ მახარაძესა და ბექა ვაჩიბერაძესთან დაკავშირებით. ვიცით, რომ საქართველოს ნაკრებში მათი თამაში კანონმდებლობის გამო ფერხდება... და მაინც, როდის შეიძლება ვიხილოთ ისინი ეროვნულ გუნდში?

- ძალიან მნიშვნელოვანი თემაა და ეს არ ეხებათ მხოლოდ მათ. ჩვენი სურვილია, საქართველოს ნაკრებში ითამაშოს ყველა იმ ფეხბურთელმა, რომელიც არის ქართველი და გუნდს სარგებლობას მოუტანს. ეს ეხება გიორგი წიტაიშვილსაც. ამ ეტაპზე საქმე ასეა: ისინი უპრობლემოდ ითამაშებდნენ საქართველოს ნაკრებში, უკრაინის ნაკრებში თამაშის დროს ორმაგი მოქალაქეობა რომ ჰქონოდათ. მაშინ ეს ასე არ იყო და ჰქონდათ მხოლოდ უკრაინის მოქალაქეობა.

- როდის შეიძლება გადაწყდეს ეს პრობლემა?

- სხვათა შორის, ეს არ არის მხოლოდ ჩვენი პრობლემა. არის კიდევ არაერთი ქვეყანა, რომელსაც იგივე რამ აწუხებს. ჩვენ ამ დროისთვის ყოველდღიური კონტაქტი გვაქვს ფიფასთან. მიდის ამ საკითხზე მუშაობა და არის შანსი, რომ კანონი შეიცვალოს.

- წიტაიშვილი ახსენეთ. ვიცით, რომ ვაჩიბერაძესა და მახარაძეს სურთ საქართველოს ნაკრებში თამაში. წიტაიშვილის შემთხვევაში როგორ არის საქმე?

- მე შევხვდი ფეხბურთელის მამას. რა თქმა უნდა, ჩვენი დიდი სურვილია, რომ გიორგიმ საქართველოს ნაკრები გააძლიეროს. უბრალოდ, სანამ არ შეიცვლება კანონი, შესაბამისად, ჩვენც ვერაფერს შევცვლით.

- იგივე მდგომარეობაა აკაკი გოგიასთან დაკავშირებითაც?

- ამ შემთხვევაში სხვა პრობლემაცაა. საქმე ისაა, რომ გერმანიის კანონმდებლობით არ არის დაშვებული ორმაგი მოქალაქეობა და იმ შემთხვევაში, თუ გოგია გახდება საქართველოს მოქალაქე, მან ავტომატურად უნდა თქვას უარი გერმანიის მოქალაქეობაზე...

- და ბოლოს, ერთა ლიგის პლეიოფებზე გკითხავთ. წინ გადამწყვეტი მატჩები გველის. ხომ არ ფიქრობთ, რომ უპრიანი იქნებოდა ამ თამაშებისთვის ფეხბურთელების წახალისება?

- არ ყოფილა ამაზე საუბარი და არც მგონია, რომ საჭირო იყოს. საქართველოს ნაკრებს ისტორიაში ყველაზე მნიშვნელოვანი შეხვედრები ელის და ამაზე მეტი მოტივაცია რა შეიძლება იყოს?! ასეთივეა ფეხბურთელიების პოზიციაც.

2468
მკითხველის კომენტარები / 0 /
მსგავსი ამბები
რუბრიკის სხვა სიახლეები
;