[ექსკლუზივი] გვარად შიოლაშვილია, ჩვენი პატრიარქის ნათესავი... იცოდით? ყაზახეთში საფეხბურთო აკადემიას ქართველი მწვრთნელი ხელმძღვანელობს!

ყაზახეთის ქალაქეზკაზგანის საფეხბურთო აკადემიას ქართველი სპეციალისტი, გელა კაკულია ხელმძღვანელობს. ეს ინფორმაცია "ლელომ" ექსკლუზიურად შეიტყო. რა თქმა უნდა, მაშინვე დავუკავშირდით ახალგაზრდა ქართველ სპეციალისტს და ინტერვიუ ჩავწერეთ:

- მოგვიყევით თქვენი ამჟამინდელი საქმიანობის თაობაზე...

- ყაზახეთში ვარ, სადაც "სპორტინგის" საფეხბურთო აკადემიას ვხელმძღვანელობ ჩემს მეგობარ რაულ ჭეჟიასთან ერთად. ის ჩემი პარტნიორი და კლუბის დამფუძნებელიცაა. რაული სოხუმელია, საფეხბურთო ოჯახიდანაა. მამამისი ცნობილი მწვრთნელია, საბჭოთა კავშირის დროს მწვრთნელთა უმაღლესი სკოლა აქვს დამთავრებული. ფეხბურთს თამაშობდა რაულის ძმაც. თავად რაული ყაზახეთში აფხაზეთის ომის შემდეგ ცხოვრობს და საქმიანობს...

ჟეზკაზგანი დიდი ქალაქია. მინდოდა, უცხოეთში მომესინჯა ძალა და ჩემი შესაძლებლობები. ეს შანსი აქ მომეცა. ქალაქში 80 ათასი მცხოვრებია და ფეხბურთი ძალიან უყვართ. 

უეფას A ლიცენზია მაქვს. აქაურებისგან ძალიან დიდი სითბო და დაფასება ვიგრძენი... ამ დროისთვის "სპორტინგში" 150 ბავშვი ვარჯიშობს. ინტერესი ფეხბურთის მიმართ ძალიან დიდია. ახლო მომავალში გოგონების ჯგუფის გახსნასაც ვფიქრობთ...

ცოტა ხნის წინ ვიყავით ყოფილ ასტანაში, ყაზახეთის დედაქალაქში, რომელსაც ახლა ნურსულთანი ჰქვია. შესანიშნავი ქალაქია, ახლა კიდევ უფრო მეტად შენდება და მშვენდება. გადაწყვეტილი ამბავია, რომ აქაც ჩამოვაყალიბებთ საფეხბურთო აკადემიას, რომელსაც მე ვუხელმძღვანელებ, ჩემი მეთოდიკით წარიმართება ვარჯიშები...

სხვათა შორის, მქონდა შეთავაზება ალმათიდანაც, მაგრამ ნურსულთანის ვარიანტზე შევაჩერე არჩევანი. ჟეზკაზგანში გუნდის ჩამოყალიბებაც უნდოდათ, რომელიც ყაზახეთის რანგით მეორე ლიგაში ითამაშებდა, მაგრამ ამ ეტაპზე თავი შევიკავეთ. ისე კი, ერთი ადგილის ტკეპნას არ ვაპირებ, მომავალში დიდ ფეხბურთშიც მინდა მოვსინჯო ძალები...

- სხვა ქართველი მწვრთნელების სამსახურით ხომ არ ხართ დაინტერესებულები?

- ყაზახეთში ქართველებს და ქართულ ფეხბურთს მართლაც რომ უდიდეს პატივს სცემენ. ყველაფერი ახსოვთ, რა და როგორ იყო წარსულში. გარდა ამისა, ზოგადად ყაზახეთში ძალიან კარგად თამაშობენ ქართველი ფეხბურთელები, განსაკუთრებით - ჯაბა კანკავა და ნიკა კვეკვესკირი. ქართველი მწვრთნელების ავტორიტეტიც დიდია. მაგალითად, ძალიან წარმატებით მუშაობენ აქ კახა ცხადაძე და გიორგი ჩიხრაძე. ახლა არ გვყავს ქართველი მწვრთნელი, თუმცა უსათუოდ დაგვჭირდება მათი ცოდნა და გამოცდილება. როგორც გითხარით, ყაზახეთის დედაქალაქშიც ვხსნით საფეხბურთო აკადემიას...

- თქვენი აკადემიის გუნდები ყაზახეთის ასაკობრივ ჩემპიონატებში თუ თამაშობენ?

- რა თქმა უნდა, ვთამაშობთ სხვადასხვა ქალაქების კლუბებთან. ესაა, რომ ყაზახეთში არ ტარდება ასაკობრივი ჩემპიონატები. ქალაქებს შორის ძალიან დიდი მანძილია. ხშირად, ქალაქიდან ქალაქში რომ მოხვდე, თვითმფრინავით ათასობით კილომეტრი უნდა დაფარო. ეს ართულებს საქმეს.

- დიდ ფეხბურთში ვაპირებ ძალების მოსინჯვასო, თქვით. უფრო კონკრეტულად არ გვეტყვით?

- იყო ვარიანტი, რომ რანგით მეორე ლიგაში გვეთამაშა, მაგრამ არ ვიჩქარეთ. რა თქმა უნდა, ამის დროც მოვა...

- ყაზახი ბავშვები ნიჭიერები არიან?

- რამდენიმე მათგანი მართლაც ძალიან ნიჭიერია. შეხედავ და ქართველი ბავშვი გეგონება - ტექნიკა, აზროვნების სისწრაფე, პასის კულტურა...

- შემთხვევით ქართველი შეგირდი ხომ არ გყავთ?

- პირველად რომ ჩამოვედი ყაზახეთში, გავიგე, რომ ერთი ბავშვი ვარჯიშის დროს რუსულად ლაპარაკობდა. ვიკითხე, ვინ არის-მეთქი. გვარად შიოლაშვილი აღმოჩნდა, გრიგოლ შიოლაშვილი, ჩვენი პატრიარქის ნათესავია. 2007 წელსაა დაბადებული, ძალიან კარგი ბიჭია!

- ბოლოს, მოკლედ შევახსენოთ მკითხველს თქვენ მიერ განვლილი საფეხბურთო გზა...

- "შევარდენის" მეკარე ვიყავი. მერე ტრავმა მივიღე და ნაადრევად დავასრულე კარიერა. 19 წლის ვიყავი, როცა "ირაოში" მივედი. არაერთ ცნობილ მწვრთნელთა მიმუშავია - კობა ჟორჟიკაშვიოლთან, ნოდარ აკობიასთან, გოჩა ავსაჯანიშვილთან, თამაზ კოსტავასთან... ბოლოს "გაგრაში" ვიყავი, ანატოლი პისკოვეცთან და გაგა კირკიტაძესთან ვიმუშავე. ვიყავი კირკიტაძის ასისტენტიც და ამის პარალელურად ვმუშაობდიი 35-ე საფეხბურთო სკოლაში. ძალიან მწყდება გული, ამ ბავშვების მიტოვება რომ მომიხდა...

3764
მკითხველის კომენტარები / 0 /
მსგავსი ამბები
რუბრიკის სხვა სიახლეები
;