[ექსკლუზივი] გორის დილას წერილი ფიფას: რატომ არ ჩამოდის ადებაიორი, რომელმაც დილასთან კონტრაქტი უკვე გააფორმა?

საქართველოს ეროვნული ლიგის მორიგ ტურში გორის "დილამ" შინ 2:0 მოუგო საჩხერის "ჩიხურას". ეს იყო გიორგი დეკანოსიძის გუნდის ზედიზედ მესამე გამარჯვება...

დღეს ეს უკვე ყველამ იცის, თუმცა აქამდე უცნობი იყო ის, რომ "დილა" ფიფაში გასაგზავნ წერილს ამზადებს. "ლელო" გორული კლუბის აღმასრულებელ დირექტორ გიორგი ჯოხაძეს დაუკავშირდა და საქმის ვითარებაზე ჰკითხა. საინტერესოა, რატომ დასჭირდა "დილას" ასეთი უკიდურესი ზომის მიღება. აი, რას გვეუბნება ჯოხაძე:

"რაც შეეხება ზედიზედ სამ გამარჯვებას, რა თქმა უნდა, ეს სასიამოვნოა. ჩემი აზრით, გუნდის თამაშის ხარისხი წინა მატჩებშიც კარგი იყო, უბრალოდ, ხდებოდა ისე, რომ თან გვდევდა დიდი უიღბლობა. სწორედ ეს იყო იმის მიზეზი, რომ მოგება გვიჭირდა...

ბოლო სამ შეხვედრაში უკვე იღბალიც ჩვენს მხარეს იყო. რა თქმა უნდა, კარგია ზედიზედ სამი მოგება, მაგრამ ჩვენ სულაც არ ვფიქრობთ, რომ ყველაფერი იდეალურად არის, პირიქით, ბევრი უნდა ვიმუშაოთ იმისთვის, რომ სასურველ შედეგს მივაღწიოთ...

როგორც იცით, ჩვენი გუნდის ერთ-ერთი ლიდერი, დიდიე კუგბენია, დისკვალიფიკაციის გამო არ თამაშობდა. გარკვეული პრობლემები ჰქონდა ჯანმრთელობასთან დაკავშირებით ჯეიკობ ნჯოკუს. ცალკე თემაა ნიგერელი (არ აგერიოთ ნიგერიელში - რედ) თავდამსხმელის, ვიქტორიენ ადებაიორის საკითხი, რომელზეც ასევე დიდ იმედებს ვამყარებდით...

ადებაიორთან ყველაფერზე შეთანხმებულები ვართ. ფეხბურთელსა და კლუბს შორის კონტრაქტი უკვე გაფორმებულია, ოღონდ, ეს არის, რომ ფეხბურთელი არ ჩამოდის საქართველოში სამედიცინო შემოწმების გასავლელად, რათა გუნდს შეუერთდეს...

როგორც ირკვევა, მას შემდეგ, რაც ჩვენთან გააფორმა კონტრაქტი, ადებაიორმა შეთავაზება მიიღო ერთ-ერთი ფრანგული კლუბისგან და იქ სურს კარიერის გაგრძელება. ამიტომაც არ ჩამოდის საქართველოში.

რა თქმა უნდა, ჩვენ ჩვენი სიმართლე და ბერკეტები გვაქვს. საქართველოს ფეხბურთის ფედერაცია უკვე ჩავაყენეთ საქმის კურსში. ახლა წერილს ვამზადებთ, რომელსაც უახლოეს მომავალში გავაგზავნით ფიფაში", - გვითხრა ჯოხაძემ.

3103
მკითხველის კომენტარები / 0 /
მსგავსი ამბები
რუბრიკის სხვა სიახლეები
;