[ინტერვიუ] 'ვიტ ჯორჯიას' პრეზიდენტი გურამ რუხაძე ჩაწყობილ მატჩებზე

ბოლო დროს ერთ-ერთი ყველაზე თვითმყოფადი ქართული კლუბის, "ვიტ ჯორჯიას" გარშემო არასასიამოვნო მოვლენები განვითარდა. ბათუმის "დინამოსთან" საგარეო მატჩის (0:2) შემდეგ მომხდარზე მთელმა საქართველომ შეიტყო და ამაზე სიტყვას აღარ გავაგრძელებთ.

4 ივნისს კი საქართველოს ფეხბურთის ფედერაციაში სადისციპლინო და საფეხბურთო დავების განმხილველი კომიტეტის სხდომა გაიმართა, რომელმაც მოისმინა მატჩის შედეგსა და მსვლელობაზე მანიპულირებაში ბრალდებული ფეხბურთელების საკითხი და მიიღო შემდეგი გადაწყვეტილება: "ვიტ ჯორჯიას" ხუთ მოთამაშეს - გიორგი გეთიაშვილს, ჯონი შეროზიას, ნიკოლოზ მაისურაძეს, ნოდარ კიკნაველიძესა და პაატა ღუდუშაურს სანქციის სახით დაეკისრათ საფეხბურთო საქმიანობის სამუდამო აკრძალვა, ხოლო თავად კლუბს დააკლდა 6 ქულა და დაჯარიმდა 50 ათასი ლარით.

ამასობაში, გავრცელდა ინფორმაცია, რომ "ვიტ ჯორჯია" ოთხმა ფეხბურთელმა დატოვა. სხვა კლუბებში გააგრძელებენ კარიერას გიორგი გაფრინდაშვილი, დავით საჯაია, ზურაბ ღირდალაძე და ალეკო ჩაკვეტაძე.

მოკლედ, სალაპარაკო დაგროვდა და "ლელომ" ექსკლუზიური ინტერვიუ ჩაწერა "ვიტ ჯორჯიას" პრეზიდენტ გურამ რუხაძესთან:

- ბატონო გურამ, ყველამ ვიცით, რა მოხდა ბოლო დროს "ვიტ ჯორჯიაში" და მის გარშემო. მთავარია, რომ კლუბი ცოცხალია. ეს გვახარებს. "ვიტ ჯორჯიამ" შეძლო და მომხდარის შემდეგ ჩემპიონატის ერთ-ერთი ლიდერი, ქუთაისის "ტორპედო" დაამარცხა. რა ხდება დღესდღეობით კლუბში, როგორ მიდის ცხოვრება ბოლო მოვლენების შემდეგ?

- თქვენს კითხვაშივე არის პასუხი - "ვიტ ჯორჯია" ცოცხალია და ესაა მთავარი! მოხარული ვარ, რომ ამ ამბების შემდეგ პრინციპული თამაშის მოგება მოვახერხეთ ქუთაისის "ტორპედოსთან". ეს იყო ძალიან მნიშვნელოვანი. ახლა "ვიტ ჯორჯია" ისეთი შეკრული და ერთიანია, როგორც არასდროს. როგორც იცით, რამდენიმე ფეხბურთელი დავაწინაურეთ ახალგაზრდული გუნდიდან, რომელიც თამაშობს ძალიან კარგად და არის პერსპექტიული გუნდი.

- გავრცელდა ინფორმაცია, რომ "ვიტ ჯორჯია" ოთხმა ფეხბურთელმა დატოვა. მიზეზად ფინანსური პრობლემები დასახელდა...

- ინფორმაციის პირველ ნაწილს ვადასტურებ. ოთხმა ფეხბურთელმა მართლაც გადაწყვიტა წასვლა, მეორე ნაწილს კი, თითქოს ფინანსური პრობლემების გამო გადაწყვიტეს წასვლა, ვერანაირად ვერ დავადასტურებ. პირდაპირ ვამბობ - ეს არის სიცრუე. ჩვენ დავსხედით მათთან ერთად და ვილაპარაკეთ, ისინი ისე წავიდნენ, მადლობა გადაგვიხადეს. ერთადერთი, რაც არის დასარიგებელი, არის პრემიალური თანხა და მას დავარიგებთ მაშინვე, როგორ კი ჩაირიცხება ფული. სიტყვაზე, ორი კვირის დავალიანება, შეიძლება, ყველგან იყოს. ამ ფეხბურთელებთან ბოლომდე ვართ შეთანხმებული გრაფიკზე და ისინი სრულად მიიღებენ იმ თანხას, რომელიც ეკუთვნით ჩვენს გუნდში ყოფნის პერიოდიდან.

- ახალწვეულები თუ იქნებიან "ვიტ ჯორჯიაში"?

- ორი ახალწვეული ძალიან მალე შემოგვიერთდება. ამ ეტაპზე, არ მინდა მოვლენებს დავასწრო და დავასახელო მათი ვინაობა. ვფიქრობ, დავიმატებთ კიდევ 2-3 ფეხბურთელს. ამას გარდა, არიან მოთამაშეები, რომლებიც მეორე გუნდიდან დავაწინაურეთ.

- როგორია თქვენი პოზიცია "ვიტ ჯორჯიასთან" დაკავშირებულ ვერდიქტზე, ფინანსურ სასჯელზე და დაკლებულ 6 ქულაზე?

- მოკლე პასუხს გაგცემთ. შევიტანთ აპელაციას საფეხბურთო დავების განმხილველ კომიტეტში. ჩვენი არგუმენტები იქნება ძალიან მტკიცე.

ვიტ ჯორჯია ცოცხალია, ჩვენ ახლა უფრო მყარად ვდგავართ, ვიდრე ოდესმე!..

- ...და რაც შეეხება ფეხბურთელებს?

- ჩვენ ამ ფეხბურთელებთან მაშინვე გავწყვიტეთ კონტრაქტები, როგორც კი ცნობილი გახდა მომხდარის შესახებ.

- ვლადიმერ ხაჩიძის მეთაურობით სამწვრთნელო შტაბი აგრძელებს მუშაობას?

- დიახ, ჩვენ სრულად ვენდობით შტაბს, რომელიც მუშაობს პროლიცენზიის მფლობელი მწვრთნელის, ვოვა ხაჩიძის მეთაურობით. ამ შტაბში არიან მისი ასისტენტები - გამოცდილი მერაბ კოჭლაშვილი და მეკარეების მწვრთნელი, თავისი საქმის პროფესიონალი - გრიგოლ ბედიაშვილი.

- ფაქტია, რომ არა ბოლო დროს განვითარებული მოვლენები, "ვიტ ჯორჯია", ალბათ, სულ სხვა მიზნებისთვის იბრძოლებდა, მაგრამ ახლა, ალბათ, უმაღლეს ლიგაში ადგილის შენარჩუნება იქნება უმთავრესი მიზანი...

- სამწუხაროდ, ახლა უკვე ასეა საქმე. მაგრამ მე მტკიცედ მჯერა, რომ მალე "ვიტ ჯორჯია" იბრძოლებს უმაღლესი მიზნებისთვის.

- დაბოლოს, ერთი კითხვა პირადად გურამ რუხაძეს. თქვენ წლების განმავლობაში ილაშქრებდით საეჭვო თამაშების წინააღმდეგ. რა თქმა უნდა, მომხდარი მძიმე დარტყმა იქნებოდა თქვენთვის...

- მართლაც ძალიან მძიმე დარტყმა იყო ეს... იცით, მანამდეც იყო მცდელობები, სხვა თამაშებს ვგულისხმობ... ვერ ჩაითრიეს აქამდე ეს ფეხბურთელები. ამის პრევენცია შეუძლებელია. პრეზიდენტის მხრიდან ვერ მოხდება ეს. ეჭვი ყოველთვის არის, მაგრამ... აგერ, ესპანეთში რა ამბები დატრიალდა... "ვალიადოლიდისა" და "ვალენსიას" თამაშს ვგულისხმობ. 22 წელია, ფეხბურთში ვარ და სულ ვებრძვი ასეთ რამეს. ეს და ფეხბურთი ერთად არ გამოდის, მე კი მთელი გულით მიყვარს ფეხბურთი. ბედნიერი ვარ იმით, რომ ახლა "ვიტ ჯორჯია" არის უზომოდ შეკრული და ერთიანი.

ყოველდღიური სპორტული გაზეთი "ლელო"
3098
მკითხველის კომენტარები / 1 /
Dg
0
რას ერჩით ფეხბურთელებს? რა დააშავეს? მაყურებელი არ მოეტყუებინოთ მაგათაც რა. კაციშვილი არ დადის არც ჩაწყობილ და არც ჩაუწყობელ თამაშებზე და რა მნიშვნელობა აქვს ერთით მეტი გოლი გავა, ერთით მეტ კუთხურს ჩააწოდებენ თუ ათით. მესი იყო ჩამოსული ბარსელონიან ფინალიანა და 50 ლარი ძლივს გააგდებინა ხელიდან ქართველ ვითომგულშემატკივარს და ქართცელმა ფეხბურთელებმა რითი აიღონ ხელფასი?? ან გუნდი რით შეინახონ? ქართველი გულშემატკივარი ჩემპიონთა ლიგის ნახევარფინალებზე ნაკლებს არ ვიკადრებთო ამბობს და გავაუქმოთ მაშინ ჯანდაცვის სამინოსტრო თავის დახმარებებიან პენსიებიან ჯანდაცვის დაფინანსებიანად და ვითამაშოთ ნახევარფინალში. არ ტრიალებს ფული ამ ქართულ ფეხბურთში და დაანებონ თავი თამაშს?? შეეშვით კაციშვილი არ უყურებს და არავის აინტერესებს და იქნება ტოტალიზატორებს რაღაცა ორი კაპიკი მაინც წაღლიტონ.
მსგავსი ამბები
რუბრიკის სხვა სიახლეები
;