[ექსკლუზივი] თემურ ჩოგაძე: დონეცკის ოლიმპიკში შესანიშნავად მიმიღეს, ვთამაშობთ კიევის დინამოს სტადიონზე...

"ლელომ" ექსკლუზიურად გაცნობათ, რომ 21 წლის თემურ ჩოგაძე დონეცკის "ოლიმპიკის" ფეხბურთელი გახდა. უკრაინის ჩემპიონატის უმაღლეს ლიგაში გადასვლა უდავოდ წინგადადგმული ნაბიჯი უნდა იყოს ამ ნიჭიერი ფეხბურთელის კარიერაში.

ჩოგაძეს ქართველი გულშემატკივარი კარგად იცნობს. ის ჩვენი ქვეყნის ახალგაზრდული ნაკრების წევრია. "საბურთალოს" აღზრდილს, ამ გუნდის გარდა, უთამაშია ბათუმის "დინამოში", "რუსთავსა" და "ტორპედოში".

რაც შეეხება "ოლიმპიკს", ამ გუნდმა უკრაინის ჩემპიონატის პირველი წრე მე-9 ადგილზე (მთავარი ლიგა 12-გუნდიანია) დაასრულა და პირველობის განახლების შემდეგ უკეთესი პოზიციის დასაკავებლად იბრძოლებს.  ამ ბრძოლაში დონეცკელებს ქართველი ლეგიონერის იმედიც ექნება.

ჩოგაძის გარდა, გუნდში კიდევ არიან ლეგიონერები - ირანელი, კოსოვოელი, ფრანგი, სენეგალელი, ბრაზილიელი, ნიგერიელი და მაკედონიელი ფეხბურთელები. "ოლიმპიკს" ესპანელი სპეციალისტი ვისენტე გომესი წვრთნის.

"ლელო" უკრაინაში დაუკავშირდა ჩოგაძეს და მასთან ინტერვიუ ჩაწერა...

- თემურ, უკვე შეგვიძლია, ახალ კლუბში გადასვლა მოგილოცოთ?

- დიახ, დონეცკის "ოლიმპიკთან" 1,5-წლიან ხელშეკრულებას რამდენიმე წუთის წინ მოვაწერე ხელი.

- როგორი გუნდია "ოლიმპიკი"?

- საკმაოდ კარგი გუნდია. ამ დროისთვის, უკრაინის ჩემპიონატში მე-9 ადგილზეა, მაგრამ ქულებში არ არის დიდი განსხვავება. ყველანაირი შანსი გვაქვს იმისთვის, რომ მდგომარეობა გავიუმჯობესოთ.

- გუნდში როგორი სიტუაციაა?

- ნამდვილად კარგი სიტუაციაა!.. ჩვენ კიევის "დინამოს" სტადიონზე ვთამაშობთ. შესანიშნავად მიმიღეს, ვარჯიშებიც კიევში გვაქვს...

- ესპანელ მწვრთნელს თუ ელაპარაკეთ?

- კი, ველაპარაკე. ძალიან მახარებს, რომ ჩემი დიდი იმედი აქვს და ვეცდები, ეს იმედი და ნდობა ბოლომდე გავამართლო.

- შეკრება სად გექნებათ?

- ანთალიაში 24-დღიანი შეკრება გვექნება, 22 თებერვალს კი უკრაინის ჩემპიონატი განახლდება...

1811
მკითხველის კომენტარები / 1 /
სანდრო
0
წარმატებები თემო.
მსგავსი ამბები
რუბრიკის სხვა სიახლეები
;