[ექსკლუზივი] ირაკლი ცირეკიძე: არავისთვის არაფერი დაგვიკლია!

ევროპის ჩემპიონატზე განცდილი მარცხის შემდეგ თავის მოსაზრებებს გვიზიარებს ძიუდოისტთა ნაკრების აწ უკვე ყოფილი მთავარი მწვრთნელი ირაკლი ცირეკიძე, ვინც ამ ინტერვიუს შემდეგ ფედერაციის პრეზიდენტმა დავით ქევხიშვილმა დაკავებული თანამდებობიდან გაათავისუფლა.
ვფიქრობთ, მაინც საინტერესოა ევროპის ჩემპიონატზე გუნდის გამოსვლის მისეული შეფასება.

- რა მიგაჩნიათ მომხდარის მიზეზად, რატომ წავაგეთ ევროპის ჩემპიონატი?

- ამ ტურნირისთვის ბიჭები საგანგებოდ არ ემზადებოდნენ, თუმცა მათი რეალური ფიზიკური მდგომარეობიდან გამომდინარე, მაინც შეიძლებოდა, ევროპის ჩემპიონატზე ის შედეგი მიგვეღო, რაც დასახული გვქონდა და რაც ბიჭებს ეკუთვნოდათ, მაგრამ რაც დავინახე, ოფიციალური შეჯიბრების სტატუსმა იმოქმედა და ეს ყველაფერი გადაიზარდა ფსიქოლოგიაში, ვერ გაუძლეს. ეს რომ ყოფილიყო ჩვეულებრივი ტურნირი, იმავე შემადგენლობით სულ სხვა შედეგის ჩვენება შეიძლებოდა.

- დებიუტანტები რომ ყოფილიყვნენ, კიდევ შეიძლებოდა ფსიქოლოგიაზე ლაპარაკი, მაგრამ ამათგან?

- მე ვფიქრობ, არ არიან მიჩვეულები, რომ ევროპის ჩემპიონატს ასეთი მდგომარეობით შეხვდნენ, თუმცა ჩვენ ყველანაირად შევეცადეთ. ჩემი სპორტული თუ სამწვრთნელო კარიერიდან გამომდინარე ისიც შემიძლია ვთქვა, რომ მართებულია, ევროპის ჩემპიონატის ხარვეზების გამოყენება და მსოფლიოს ჩემპიონატზე ფორმის პიკში ყოფნა.

- თითქოს, მთელი გუნდი ცოტა შებოჭილი იყო, აკლდათ გახსნა, უჭირდათ მოძრაობა თუნდაც იმავე შავდათუაშვილს, ლიპარტელიანს, სხვებსაც...

- შავდათუაშვილზე რომ ვთქვათ, იმდენად მოტივირებულია და იმდენადაა გადართული ძიუდოზე, რომ ბევრს ვარჯიშობს, ვერ წყდება სავარჯიშო პროცესს. რამდენჯერმე ვიკამათეთ კიდეც, რომ ამდენი არ სჭირდებოდა, ძალით გავაჩერე და დავასვენე. ხშირად მივუთითებდი, რომ უნდა შეგვეწყვიტა იმ კონკრეტული რაღაცის კეთება. აი, ამიტომ ვამბობ, რომ ეს ევროპის ჩემპიონატი ისეთი რამეა, რომელიც ამ ხარვეზების გამოსწორებით მიგვიყვანს მომდევნო დიდ შეჯიბრებამდე. ჩემს მაგალითზეც რომ ავიღოთ, ვერ გავხდი ევროპის ჩემპიონი, თუმცა არ მიმაჩნია, რომ ეს შეჯიბრება მსოფლიოს პირველობაზე ან ოლიმპიადაზე უფრო ძლიერი ტურნირია.

- ანუ იმედოვნებთ, რომ მსოფლიომდე ეს ხარვეზები გამოსწორდება?

- უნდა გამოსწორდეს და მათ შორის უნდა გამოსწორდეს ტაქტიკური კუთხითაც, რაზეც ხშირად მისაუბრია. ის, რომ ჩავლებაში ძლიერები უნდა ვიყოთ, რადგან ეს ძიუდოში ერთ-ერთი უმთავრესი კომპონენტია, ამაზე კამათიც არ შეიძლება. კი ხდება ხოლმე ტალანტის ხარჯზე, როცა შედეგიც გაუკეთებიათ, მაგრამ ის უმაღლესი, რაც საჭიროა და რისი სრულყოფაც აუცილებელია, რომ იდეალურად გვქონდეს ყველაფერი, ამაზე ყველამ ბევრი უნდა იმუშაოს და ბოლომდე აღმოფხვრას.

- ესე იგი, არ ეთანხმებით იმ მოსაზრებას, რომ კონკრეტულად ამ ევროპის ჩემპიონატისთვის მოსამზადებელ პროცესში რაღაც შეცდომაა დაშვებული?

- მე მომზადების კუთხით იმდენად არ ვიტყოდი შეცდომას. ჩვენი ტურნირიც იმიტომ ჩავსვი მოსამზადებელ გეგმაში, რომ, ჯერ ერთი, ქართველი გულშემატკივრის წინაშე წარმსდგარიყვნენ და მეორეც - ამას არ უნდა შეეშალა ხელი ევროპის ჩემპიონატისთვის მომზადებაში, თუმცა ჩვენი მიზანი მაინც იყო მსოფლიოს ჩემპიონატი. აქ ვინმეს ზედმეტი თუ მოუვიდა, თორემ დაკლებით არა მგონია, ვინმეს რამე დაჰკლებოდა. ცხადია, იმ შემთხვევების გარდა, ვინმეს ტრავმა თუ არ აწუხებდა.

- როგორც ვიცი, ასეთებიც იყვნენ გუნდში.

- კი, იყვნენ. მაგალითად, ვალერი ლიპარტელიანი, ბექა ღვინიაშვილი, ბოლო დღეებში უშანგი მარგიანიც მკურნალობდა.

- მსოფლიოსთვის გუნდის გაახალგაზრდავება თუ იგეგმება? ახალი სისხლის საჭიროება ზოგიერთ წონაში აუცილებელი ჩანს.

- კი, აუცილებლად იქნება, სადაც რეალური რეზერვი ჩანს. თუნდაც იმიტომ, რომ ლიდერებმა კიდევ უფრო მეტად მოინდომონ.

- ნაკრებში ადგილის დაბევებაზე რა აზრის ხართ, გამართლებულად მიგაჩნიათ ეს მიდგომა?

- ეს მიდგომა განხორციელდა ისეთ ადამიანებზე, რომლებიც დისციპლინირებულნი და მოტივირებულნი იყვნენ. მათ ვაკვირდებოდით მსოფლიოს ჩემპიონატიდან წლის დასაწყისამდე, ვიდრე ბიჭებს ამ გადაწყვეტილების შესახებ გამოვუცხადებდით. თუმცა ამის შემდეგაც ვაკვირდებოდით მათ, რომ არ ეფიქრათ, მაინც გარანტირებული მაქვს ოფიციალურ შეჯიბრებაზე ჭიდაობაო.

3780
მკითხველის კომენტარები / 0 /
მსგავსი ამბები
რუბრიკის სხვა სიახლეები
;