[ექსკლუზივი] კითხვები ვლადიმირ ვაისის გამო და ალექსანდრე იაშვილის განმარტება: ვინ უხელმძღვანელებს საქართველოს ნაკრებს მარტის პლეი ოფში?

სანაკრებო თემა ქართულ ფეხბურთში ახლა ყველაზე მნიშვნელოვანია. მარტში ეროვნულ გუნდს უმნიშვნელოვანესი მატჩი ელის თბილისში ბელარუსის ნაკრებთან. გვეიმედება, რომ ამ მატჩს მოვიგებთ და რამდენიმე დღეში ვუმასპინძლებთ ჩრდილოეთ მაკედონიასა და კოსოვოს შორის გამარჯვებულს, ამ თამაშის მოგების შემთხვევაში კი ჩვენი ფეხბურთის ისტორიაში პირველად ვითამაშებთ ევროპის ჩემპიონატის ფინალურ ეტაპზე.

"ლელო" ესაუბრა საქართველოს ფეხბურთის ფედერაციის ვიცე-პრეზიდენტსა ალექსანდრე იაშვილს, ვისაც სანაკრებო ამბებზე დავეკითხეთ და მისგან ბევრი საინტერესო რამ მოვისმინეთ...

- ერთა ლიგის პლეი ოფით დავიწყოთ. წილისყრისას აშკარად გაგვიმართა. ეს ძალიან კარგია, მაგრამ ამავე დროს უდიდესი პასუხისმგებლობაცაა...

- რა თქმა უნდა, მნიშვნელოვანია მასპინძლის სტატუსი, მაგრამ ამან არ უნდა მოგვადუნოს. თავისთავად, პასუხისმგებლობა დიდია. ამ ეტაპზე მხოლოდ ბელარუსთან მატჩზე ვართ კონცენტრირებულები.

- ბელარუსის ნაკრებს ჩვენთან ერთი კონკრეტული უპირატესობა აქვს: ისინი, დიდი ალბათობით, მოახერხებენ საქართველოსთან თამაშამდე შეკრების მოწყობას და ორი ამხანაგური შეხვედრის ჩატარებას. საქართველოს ნაკრები კი ამას ვერ შეძლებს, რადგან ჩვენი ფეხბურთელების აბსოლუტური უმრავლესობა, ბელარუსებისგან განსხვავებით, ლეგიონერია და მათი გამოძახება დადგენილ დროზე ადრე ვერ მოხერხდება. გამოდის, რომ ქართველი ფეხბურთელები თავიანთ კლუბებში მაქსიმალურად კარგად უნდა მოემზადონ ბელარუსთან მატჩისთვის...

- რა თქმა უნდა, პირველ რიგში თავიანთ კლუბებში უნდა მოემზადონ კარგად. გარდა ამისა, ჩვენ უკვე დავიწყეთ კომუნიკაციები იმ კლუბებთან, რომლებშიც ჩვენი ფეხბურთელები თამაშობენ - კარგი იქნება, თუ მოხერხდება ჩვენი მოთამაშეების გამოშვება თუნდაც ერთი კვირით ადრე და მოხდება ისე, რომ მათ არ ჩაატარონ ბოლო თამაში კლუბში. რა თქმა უნდა, ცოტა რთული საკითხია და შეიძლება, არ დაგვთანხმდეს ყველა კლუბი, მაგრამ მინდა შეგახსენოთ, რომ ასეთ ვითარებაში პირველად არ ვართ. ყაზახებმაც ერთი თვით ადრე დაიწყეს თავის დროზე ჩვენთან თამაშისათვის მომზადება, მაგრამ ყველამ ვიცით, რა შედეგიც მივიღეთ...

- ვლადიმირ ვაისის გადაბირების სურვილი რუსულმა კლუბმა "სოჩიმაც" გამოთქვა. ვიცით, რომ მას წლის ბოლომდე აქვს კონტრაქტი საქართველოს ფეხბურთის ფედერაციასთან. ხომ არაა იმის საფრთხე, რომ მან პლეი ოფებამდე დატოვოს ნაკრები?

- ვაისს კონტრაქტი აქვს 31 მარტამდე და სწორედ ის უხელმძღვანელებს საქართველოს ნაკრებს მარტში გასამართ შეხვედრებში. ხოლო ის, რომ ვაისის მიმართ არის ინტერესი, ერთი რამის მანიშნებელია - გამოდის, რომ ის კარგად მუშაობს საქართველოს ნაკრებში. ისე, ასეთი ჭორები ადრეც არაერთხელ გავრცელებულა და გასაკვირი არ არის.

- ბოლო დროს მომხდარის ფონზე, თუნდაც არაფორმალურ ვითარებაში, ხომ არ დაგისვამთ უეფაში მსაჯობის საკითხი? არის რისკი, რომ ანალოგიური რამ შეიძლება პლეი ოფის მატჩებშიც მოხდეს...

- სულ ვერიდები მსაჯებზე და მსაჯობაზე ლაპარაკს. მხოლოდ ის შემიძლია გითხრათ, რომ დიდი ალბათობით, პლეი ოფის მატჩებში დაშვებული იქნება ვიდეორეფერი.

2206
მკითხველის კომენტარები / 0 /
მსგავსი ამბები
რუბრიკის სხვა სიახლეები
;